លោក ហ្សង់ ហ្វ្រង់ស័រ តាន់ ៖ គួរឈប់និយា​យពីបញ្ហាមូលដ្ឋានយោធាបរទេសនៅកម្ពុជាតទៅទៀត

នៅក្នុងកិច្ចពិភាក្សាទូទៅ នៃសម័យប្រជុំលើកទី ៧៨ នៃមហាសន្និបាតអង្គការសហប្រជាជាតិ (UNGA) សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់យ៉ាងច្បាស់ថា កម្ពុជា មិនអនុញ្ញាតឲ្យមានមូលដ្ឋានយោធា នៅលើទឹកដីរបស់ខ្លួនឡើយ។ នេះបើតាមការឲ្យដឹងពីលោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឲ្យដឹងនេះ គឺនៅក្នុងសន្និសីទសារព័ត៌មាន បន្ទាប់ពីសម្ដេចធិបតី ហ៊ុន ម៉ាណែត និងលោកជំទាវ ពេជ ចន្ទមុន្នី ហ៊ុន ម៉ាណែត នៅព្រឹកថ្ងៃទី ២៥ ខែកញ្ញា ឆ្នាំ ២០២៣នេះ បានដឹកនាំគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជា អញ្ជើញមកដល់ប្រទេសកម្ពុជាវិញហើយ បន្ទាប់ពីបានទៅចូលរួមកិច្ចពិភាក្សាទូទៅ នៃសម័យប្រជុំលើកទី ៧៨ នៃមហាសន្និបាតអង្គការសហប្រជាជាតិ (UNGA) នៅទីក្រុងញូវយ៉ក សហរដ្ឋអាមេរិក។

លោក ហ្សង់ ហ្វ្រង់ស័រ តាន់ មានប្រសាសន៍ប្រាប់ក្រុមអ្នកសារព័ត៌​មានថា នៅក្នុងដំណើរបំពេញបេសសកម្មនេះ សម្ដេចធិបតី ហ៊ុន ម៉ាណែត​ បានឡើងថ្លៃសុរន្ទកថា នៅលើវេទិកា នៃមហាសន្និបាតអង្គការសហប្រជាជាតិ នៅថ្ងៃទី ២២ ខែកញ្ញា ឆ្នាំ ២០២៣។ ក្នុងវេទិកានោះ សម្ដេចធិបតី ហ៊ុន ម៉ាណែត បានលើកឡើងនូវសារនយោបាយសំខាន់ៗចំនួន ៣ ដើម្បីបញ្ជូនទៅកាន់សហគមន៍អន្តរជាតិ។

សារនយោបាយទាំងនោះ គឺសម្ដេចធិបតី ហ៊ុន ម៉ាណែត ថ្លែងទៅកាន់ពិភពលោកឲ្យយល់កាន់តែច្បាស់នូវជំហរឯករាជ្យ អព្យាក្រឹត្យរបស់ប្រទេសកម្ពុជា នៅលើឆាកអន្តរជាតិ។ លោក ហ្សង់ ហ្វ្រង់ស័រ តាន់ បានរំលឹកសារនយោបាយសំខាន់ៗ ៣ របស់សម្ដេចធិបតី ហ៊ុន ម៉ាណែត ដែលបានថ្លែងនៅលើវេទិកានៃមហាសន្និបាតអង្គការសហប្រជាជាតិ។ ទី១. កម្ពុជា ក៏ដូចជាបណ្ដាប្រទេសនានាដែរ លើកកម្ពស់ និងតម្កល់ផលប្រយោជន៍ជាតិរបស់កម្ពុជាជាធំ។ ទី២. កម្ពុជា ពង្រឹងមិត្តភាពដែលមានស្រាប់ និងពង្រីកមិត្តភាពបន្ថែម​ បើកដៃ បើកបេះដូង ទៅរកមិត្តភាពថ្មី។ ទី៣. កម្ពុជា មិនអនុញ្ញាតឲ្យមានមូលដ្ឋានយោធា នៅលើទឹកដីកម្ពុជាទេ ដែលចំណុចនេះមានចែងយ៉ាងច្បាស់នៅក្នុងរដ្ឋធម្មនុញ្ញ នៃព្រះរាជាណាចក្រកម្ពុជា។​

ចំណុចទី៣នេះ លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី បានលើកឡើងថា «ជារួម​ បើយើងវិលមករកករណីហ្នឹង បានន័យថា រឿងរ៉ាវជុំវិញមូលដ្ឋានយោធារាម អស់រយៈពេលជាច្រើនឆ្នាំមកហើយ ពេលនេះគួរតែបញ្ចប់ ត្រូវតែចប់ ពីព្រោះនេះជាលើកទីមួយ​បង្អស់ នៅលើវេទិកានៃមហាសន្និបាតអង្គការសហប្រជាជាតិ ដែលកម្ពុជាតាមរយៈសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា ប្រកាសយ៉ាងចំហទៅកាន់ពិភពលោក ដោយយកពិភពលោកជាសាក្សី មិនអាចកើតមានទៅរួចទេ មូលដ្ឋានយោធាបរទេសនៅក្នុងប្រទេសកម្ពុជា»។

លោករដ្ឋមន្ត្រីប្រតិភូអមនាយករដ្ឋមន្ត្រី បានលើកឡើងទៀតថា ចាប់ពីពេលនេះតទៅ គួរឈប់និយា​យពីបញ្ហាមូលដ្ឋានយោធាបរទេសនៅកម្ពុជាតទៅទៀត ពីព្រោះប្រមុខរាជរដ្ឋាភិបាលកម្ពុជា បានប្រកា​សប្រាប់ពិភពលោករួចហើយថា កម្ពុជា មិនអនុញ្ញាតឲ្យមានមូលដ្ឋានយោធា នៅលើទឹកដីរបស់ខ្លួន នោះឡើយ៕