ព័ត៌មានជាតិ

អាជ្ញាធរជាតិអប្សរា បញ្ជាក់ជាថ្មី យន្តការគ្រប់គ្រងការប្រើប្រាស់ និងថតរូបភាពរមណីយដ្ឋានអង្គរ

បានផុស

១ year មុន

នៅ

ថ្ងៃព្រហស្បតិ៍ ៥ តុលា ២០២៣

ដោយ

មន្ត្រីជាន់ខ្ពស់នៃអាជ្ញាធរជាតិអប្សរា បានថ្លែងបញ្ជាក់យ៉ាងច្បាស់លាស់ថា ការថតរូបភាពទេសចរ រូបភាពអនុស្សាវរីយ៍ និងរូបភាពសម្រាប់ការអប់រំ មិនមានការហាមឃាត់ទេ គឺហាមឃាត់ចំពោះការតែការថតណាសម្រាប់យកទៅធ្វើអាជីវកម្មប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គនាយករងនៃអាជ្ញាធរជាតិអប្សរា លោក ឡុង កុសល បានថ្លែងបញ្ជាក់ នៅក្នុងសន្និសីទសារព័ត៌មាន នាព្រឹកថ្ងៃទី៥ ខែតុលា ថា ចំពោះសាធារណជន ដែលមកទស្សនាតំបន់អង្គរ ក្នុងខេត្តសៀមរាប គឺអាចថតរូប អនុស្សាវរីយ៍ រូបទេសចរណ៍ ជាលក្ខណគ្រួសារ និងរូបភាពសម្រាប់យកទៅផ្សព្វផ្សាយ អប់រំបានដោយសេរី មិនមានការហាមឃាត់អ្វីឡើយ។ ដោយឡែក ចំពោះ ការថតភាពយន្ត ថតចម្រៀងកាយវិការ ឬក៏ឯកសារផ្សេងៗ ដោយយោងតាមអនុក្រឹត្យរបស់រដ្ឋាភិបាល គឺតម្រូវឲ្យផលិតករ ចាំបាច់ត្រូវតែសុំការអនុញ្ញាត ទៅក្រសួងវប្បធម៌ និងវិចិត្រសិល្បៈ ជាមុន ដោយដាក់ទាំងអត្ថបទនៃសាច់រឿងទៅជាមួយផង ដើម្បីឲ្យក្រុមអ្នកជំនាញផ្នែកវប្បធម៌ បានពិនិត្យមើលខ្លឹមសារនៃសាច់រឿង។

លោក ឡុង កុសល បានបញ្ជាក់យ៉ាងច្បាស់ថា ការដែលតម្រូវ ឲ្យផលិតករដាក់ទាំងអត្ថបទ ឲ្យអ្នកជំនាញពិនិត្យខ្លឹមសារនោះ គឺមិនមែនជាការរឹតត្បិតសេរីភាពនៃការសរសេររបស់ផលិតករទេ ដោយគ្រាន់តែចង់ចូលរួមកែសម្រួលនូវ ប្រវត្តិសាស្ត្រ ឬក៏ទម្រង់នៃវប្បធម៌ ឲ្យបានត្រឹមត្រូវប៉ុណ្ណោះ។

កន្លងមកមានប្រជាពលរដ្ឋជាច្រើន ដែលបានប្រកបរបរស្លៀកសំលៀកបំពាក់បុរាណខ្មែរ សម្រាប់ភ្ញៀវទេសចរដែលចូលទៅទស្សនាប្រាសាទ ហើយអ្នកជំនាញរបស់ក្រសួងវប្បធម៌ ក៏បានទៅពិនិត្យ និងជួយកែលំអ ឲ្យត្រូវទៅតាមទម្រង់នៃសំលៀកបំពាក់ខ្មែរផងដែរ។

មន្ត្រីនៃអាជ្ញាធរជាតិអប្សរា បានសំណូមពរ ឲ្យម្ចាស់ផលិតកម្ម ដែលត្រូវមកថតភាពយន្ត ថតចម្រៀងកាយវិការក្តី យោគយល់ចំពោះ ការអនុវត្តន៍យន្តការគ្រប់គ្រងការប្រើប្រាស់ និងការថតរូបភាព រមណីយដ្ឋានអង្គរ និងកន្លែងមួយចំនួនទៀតដែលស្ថិតនៅក្រោមដែនសមត្ថកិច្ចអាជ្ញាធរអប្សរា ដោយតម្រូវឲ្យសុំការអនុញ្ញាតទៅក្រសួងវប្បធម៌ និងវិចិត្រសិល្បៈនេះ ។

គោលបំណងនៃការតម្រូវឲ្យម្ចាស់ផលិតកម្ម ដែលត្រូវមកថតភាពយន្ត ថតចម្រៀង កាយវិការ នៅតំបន់អង្គរត្រូវសុំការអនុញ្ញាត ជាមុននេះ គ្មានអ្វីក្រៅពីចង់លើកតម្កើងអង្គរ វប្បធម៌ ប្រពៃណី និងស្ថាបត្យកម្ម អង្គរដែលជាសម្បត្តិបេតិកភណ្ឌដ៏មានតម្លៃ ដែលមិនអាចកាត់ថ្លៃបាននោះទេ។

លោក ឡុង កុសល បានប្រៀបធៀបអង្គររបស់ខ្មែរ ទៅនិងមេមាន់ ដែលពងចេញមាស ប៉ុន្តែប្រសិនបើប្រជាពលរដ្ឋខ្មែរគ្រប់រូប មិននាំគ្នាជួយថែរក្សាអង្គរឲ្យបានល្អទេ នោះមេមាន់នឹងលែងពងចេញមាសទៀតហើយ។

ក្រសួងវប្បធម៌ និងវិចិត្រសិល្បៈ រួមជាមួយអាជ្ញាធរជាតិអប្សរា មានគម្រោងធ្វើការកែលំអនីតិវិធីខ្វះខាតមួយចំនួន ដើម្បីធ្វើយ៉ាងណា ឲ្យផលិតករភាពយន្ត ឬអ្នកថតរូបធ្វើអាជីវកម្ម អាចស្នើសុំការអនុញ្ញាត ចូលថតរូបនៅក្នុងតំបន់អង្គរ បានកាន់តែងាយស្រួល និងរលូន។

ជាមួយគ្នានេះ អាជ្ញាធរអប្សរា ក៏មានគម្រោងរៀបចំឲ្យមាន Call Center ដើម្បីឲ្យអាជីវករដែលត្រូវការថតរូបក្នុងតំបន់អង្គរ អាចទាក់ទងបានងាយស្រួល ព្រមទាំងបង្កើតប្រព័ន្ធ Online ដើម្បីឲ្យអាជីវករអាចចូលស្នើសុំតាមប្រព័ន្ធបច្ចេកវិទ្យា បានយ៉ាងឆាប់រហ័សផងដែរ៕

អត្ថបទ៖ កុសល

សូមស្តាប់វីដេអូរបស់លោក ឡុង កុសល មន្ត្រីជាន់ខ្ពស់ នៃអាជ្ញាធរជាតិអប្សរា