អគ្គស្នងការរង​ បញ្ជាឱ្យនគរបាល បន្តចុះបង្ក្រាបគ្រឿងញៀន ដើម្បីសុវត្ថិភាពសង្គមកម្ពុជា

អគ្គស្នងការរងនគរបាលជាតិ​ លោក ម៉ក់ ជីតូ បានបញ្ជាឱ្យសិក្ខាកាមដែលសិក្សាជំនាញបង្កា្របគ្រឿងញៀនជាមួយគ្រូជនជាតិបារាំង  និងនគរបាលជំនាញ​ បន្តចុះបង្ក្រាបគ្រឿងញៀន ដើម្បីសុវត្ថិភាពសង្គមកម្ពុជា។ នៅថ្ងៃទី០៦ ខែតុលា លោក ម៉ក់ ជីតូ បានបញ្ជាបែបនេះ នៅចំពោះមុខសិក្ខាចំនួន២០រូប ដែលទើបបញ្ចប់វគ្គបណ្ដុះបណ្ដាលបង្ក្រាបគ្រឿងញៀនជាមួយគ្រូជនជាតិបារាំង ក្រោមការជួយបណ្ដុះបណ្ដាលរបស់ក្រសួងមហាផ្ទៃ នៃប្រទេសបារាំង។

បើតាមការអះអាងរបស់លោក ម៉ក់ ជីតូ បញ្ហាគ្រឿងញៀន គឺជាកម្មវត្ថុកង្វល់ជាសកល មិនមែនតែកម្ពុជានោះទេ ដែលវាប៉ះពាល់ដល់សុខភាព និងបង្កមហន្តរាយជាច្រើនដោយសារបទឧក្រិដ្ឋនានា ដែលកើតមានឡើងក្នុងសកលលោក និងនៅកម្ពុជា ៧០ភាគរយ គឺឧក្រិដ្ឋជនដែលប្រព្រឹត្តិបទល្មើសតែងតែប្រើប្រាស់គ្រឿងញៀន។ ជុំវិញបង្ហានេះ លោក ម៉ក់ ជីតូ បានបញ្ជាឱ្យមន្ត្រីប្រឆាំងគ្រឿងញៀន ត្រូវតែរួមគ្នាបង្ការ បង្រ្កាបបទល្មើសគ្រឿងញៀនឱ្យសកម្ម ដើម្បីសុវត្ថិភាពសង្គម។

តាមរយៈកិច្ចសហការរវាង ក្រសួងមហាផ្ទៃ នៃប្រទេសបារាំង ជាមួយក្រសួងមហាផ្ទៃកម្ពុជា បានរៀបចំ  វគ្គបណ្ដុះបណ្ដាលជំនាញបង្រ្កាបគ្រឿងញៀនឡើង ចាប់ពីថ្ងៃទី២ ដល់ថ្ងៃទី៦ ខែតុលា ឆ្នាំ ២០២៣ ដោយមានសិក្ខាកាមសរុបចំនួន ២០រូប មកពីមន្ទីរប្រឆាំងគ្រឿងញៀន ,ស្នងការដ្ឋាននគរបាលខេត្តព្រះសីហនុ,ស្នងការដ្ឋាននគរបាលខេត្តកណ្ដាល ,ស្នងការដ្ឋាននគរបាលខេត្តកំពង់ចាម ,ស្នងការដ្ឋាននគរបាលខេត្តតាកែវ និងស្នងការដ្ឋាននគរបាលខេត្តស្វាយរៀង។

លោក ម៉ក់ ជីតូ បានចាត់វគ្គបណ្តុះបណ្តាលបំប៉នជំនាញបង្ក្រាបគ្រឿងញៀននេះ ថាបានផ្តល់បទពិសោធន៍ និងចំណេះដឹងថ្មីមួយទៀត សម្រាប់សិក្ខាកាមទាំងអស់ដែលជាមន្រ្តីអនុវត្តច្បាប់ ថ្វីត្បិតតែវគ្គបណ្ដុះបណ្ដាលមានរយៈពេលខ្លីក ក៏ប៉ុន្តែសិក្ខាកាមបានយល់ដឹងច្រើន ពីសភាពការណ៍សកល ពីសភាពការណ៍នៅប្រទេសបារាំង និងសភាពការណ៍គ្រឿងញៀននៅកម្ពុជា។

​ពីកម្មវិធីបិទវគ្គបណ្ដុះបណ្ដាលជំនាញបង្ក្រាបគ្រឿងញៀន លោក ម៉ក់ ជីតូ បានផ្តាំផ្ញើដល់សិក្ខាកាមទាំងអស់ ដែលបញ្ចប់វគ្គបណ្តុះបណ្តាលជាមួយគ្រូជនជាតិបារាំង ត្រូវយកចំណេះចេះដឹងទាំងនេះ ទៅបង្រៀន ផ្សព្វផ្សាយដល់មន្ត្រីក្រោមឱវាទ ក៏ដូចជានគរបាលរួម ដើម្បី បង្ការ ការពារខ្លួន ពេលដែលកងកម្លាំងជំនាញចុះប្រតិបត្តិការការងារប្រឈម ។

ជាមួយគ្នានេះ លោក ម៉ក់ ជីតូ ក៏បានអរគុណចំពោះក្រសួងមហាផ្ទៃ នៃសាធារណៈរដ្ឋបារាំង ដែលបានជួយបណ្តុះបណ្តាលជំនាញ ដល់ មន្រ្តីនគរបាលជាតិកម្ពុជា ឱ្យកាន់តែមានសមត្ថភាពបន្ថែមទៀត ក្នុងការប្រយុទ្ធប្រឆាំងបទល្មើសគ្រឿងញៀន ។

អគ្គស្នងការរងរូបនេះអំណរគុណដល់លោកស្រី Marianne Flour-Bourril ជាគ្រូឧទេសនាម, អ្នកបកប្រែ និងសិក្ខាកាមទាំងអស់ ដែលបានខិត ខំប្រឹងប្រែងរៀនសូត្រ ក្រេបជញ្ជក់យកចំណេះចេះដឹង ដើម្បីយកទៅបម្រើអង្គភាពឱ្យមានប្រសិទ្ធ ភាព៕