អ៊ីរ៉ង់ ព្រមាន អ៊ីស្រាអែល ឲ្យបញ្ឈប់ការវាយប្រហារនៅតំបន់ហ្គាហ្សា បើមិនដូច្នេះទេអាចជួបទុក្ខធំ

រដ្ឋមន្ត្រីការបរទេសអ៊ីរ៉ង់កាលពីថ្ងៃសៅរ៍បានអំពាវនាវឲ្យអ៊ីស្រាអែលបញ្ឈប់ការវាយប្រហាររបស់ខ្លួនលើតំបន់ហ្គាហ្សា ដោយព្រមានថា សង្រ្គាមអាចនឹងពង្រីកដល់ផ្នែកផ្សេងទៀតនៃមជ្ឈិមបូព៌ា ប្រសិនបើក្រុមហេសបូឡា ចូលរួមក្នុងសមរភូមិ ហើយវានឹងធ្វើឲ្យអ៊ីស្រាអែលជួបគ្រោះដូច “ការរញ្ជួយដីដ៏ធំមួយ” ផងដែរ ។

លោក Hossein Amirabdollahian បានប្រាប់អ្នកយកព័ត៌មាននៅទីក្រុង Beirut ថា ក្រុមហេសបូឡារបស់ប្រទេសលីបង់ បានយកសេណារីយ៉ូសង្គ្រាមទាំងអស់មកពិចារណា ហើយអ៊ីស្រាអែលគួរតែបញ្ឈប់ការវាយប្រហាររបស់ខ្លួនលើតំបន់ហ្គាហ្សាឲ្យបានឆាប់តាមដែលអាចធ្វើទៅបាន ។

ទន្ទឹមនឹងនេះ គេហទំព័រព័ត៌មាន Axios ក៏បានរាយការណ៍ដែរថា ទីក្រុងតេហេរ៉ង់បានផ្ញើសារទៅកាន់ទីក្រុងហ្សេរុយសាឡឹមតាមរយៈអង្គការសហប្រជាជាតិថា ខ្លួននឹងធ្វើអន្តរាគមន៍ ប្រសិនបើប្រតិបត្តិការនៅតំបន់ហ្គាហ្សានៅតែបន្ត ជាពិសេសការវាយលុកតាមដីគោក ។

ពាក់ព័ន្ធនឹងបញ្ហានេះដែរ បេសកជនរបស់អ៊ីរ៉ង់ប្រចាំអង្គការសហប្រជាជាតិបានព្រមាននៅក្នុងបណ្ដាញសង្គម X ថា “ប្រសិនបើឧក្រិដ្ឋកម្មសង្គ្រាម និងអំពើប្រល័យពូជសាសន៍របស់អ៊ីស្រាអែលមិនត្រូវបានបញ្ឈប់ភ្លាមៗទេនោះ វាអាចមានផលវិបាកទ្រង់ទ្រាយធំ ហើយស្ថានភាពអាចនឹងលើសពីការគ្រប់គ្រង” ។

អ៊ីស្រាអែលបានចាត់ទុកក្រុមហេសបូឡាជាក្រុមគំរាមកំហែដ៏ធ្ងន់ធ្ងរបំផុត ដោយប៉ាន់ស្មានថា ក្រុមនេះមានគ្រាប់រ៉ុកកែត និងកាំជ្រួចមីស៊ីលប្រហែល ១៥ ម៉ឺនគ្រាប់ រួមទាំងមីស៊ីលល្បឿនលឿនជាងសំឡេង ដែលអាចវាយប្រហារគ្រប់ទីកន្លែងក្នុងប្រទេសអ៊ីស្រាអែល ខណៈក្រុម​ដែល​មានអ្នកប្រយុទ្ធ​​រាប់​ពាន់​នាក់​ និង​បាន​ចូល​រួម​ក្នុង​ជម្លោះ ​១២ ​ឆ្នាំ​របស់​ស៊ីរីមួយនេះ ​ក៏​មាន​យន្តហោះ​គ្មាន​មនុស្ស​បើក​យោធា​ច្រើន​ប្រភេទផង​ដែរ ។

គួរបញ្ជាក់ថា ក្រុមយុទ្ធជនហេសបូឡាបានប្រកាសអាសន្នយ៉ាងពេញទំហឹងនៅតាមបណ្តោយព្រំដែននៃប្រទេសលីបង់ជាមួយអ៊ីស្រាអែល បន្ទាប់ពីការវាយប្រហារដ៏សាហាវកាលពីថ្ងៃសៅរ៍សប្ដាហ៍មុន ដោយក្រុមប្រដាប់អាវុធប៉ាឡេស្ទីនហាម៉ាស់ បណ្តាលឲ្យជនស៊ីវិល និងទាហានអ៊ីស្រាអែលប្រហែល ១,៣០០ នាក់បានស្លាប់ ខណៈមនុស្សរហូតដល់ ២០០ នាក់ត្រូវបានចាប់ពង្រត់ទៅកាន់តំបន់ហ្គាហ្សា ៕

ប្រែសម្រួលដោយ ៖ ជីវ័ន្ត

ប្រភព ៖ The Times of Israel

ចុចអាន ៖ អ៊ីស្រាអែល កំពុងរៀបផែនការទម្លាក់គ្រាប់បែកកម្ទេចតំបន់ហ្គាហ្សា អមដោយការវាយលុកតាមដីគោក