កងកម្លាំងពិសេសកម្ពុជា ចេញទៅចូលរួមសមយុទ្ធនៅប្រទេសចិន

កងកម្លាំងពិសេសនៃកងយោធពលខេមរភូមិន្ទចំនួន៩២នាក់ ប្រដាប់ដោយសម្ភារៈបរិក្ខាយោធាបានចេញដំណើរទៅកាន់តំបន់កាវតាន ទីក្រុងស៊ាន់ជាំង ខេត្តក្វាងតុង ប្រទេសចិនហើយ នៅថ្ងៃទី១១ ខែវិច្ឆិកា ឆ្នាំ២០២៣ ដើម្បីចូលរួមក្នុងសមយុទ្ធពហុសាសន៍រួម «សន្តិភាព មិត្តភាព អាម៉ាន់ យូ យី ២០២៣»។

សមយុទ្ធរួមគ្នានេះ រៀបចំឡើងក្រោមប្រធានបទ «ប្រតិបត្តិការយោធាចម្រុះលើការប្រឆាំងភេរវកម្ម និងការថែរក្សាសន្តិសុខលម្ហសមុទ្រ»​ ដែលកងទ័ពរំដោះប្រជាជនចិន ធ្វើជាម្ចាស់ផ្ទះ និងមានការចូលរួមពីកងកម្លាំងទ័ពពិសេសរបស់កម្ពុជា វៀតណាម ឡាវ ម៉ាឡេស៊ី ថៃ និងការចូលរួមសង្កេតការណ៍ពីអ្នកតំណាងអង្គការសហប្រជាជាតិ។ សមយុទ្ធនេះ មានរយៈពេលជាង ១០ថ្ងៃ ចាប់ពីថ្ងៃទី១៣ ដល់ថ្ងៃទី២២ ខែវិច្ឆិកា ឆ្នាំ២០២៣។

ក្នុងឱកាសចុះត្រួតពិនិត្យមុនពេលចេញដំណើររបស់កងកម្លាំងរបស់កម្ពុជា លោកនាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ បានថ្លែងថា នេះគឺជាមោទនភាព និងជាមុខមាត់សម្រាប់ប្រជាជនកម្ពុជា ដែលកងយោធពលខេមរភូមិន្ទ ត្រូវបានភាគីចិន អញ្ជើញឱ្យចូលរួមក្នុងសមយុទ្ធពហុសាសន៍រួមដ៏មានសារសំខាន់នេះ។

 លោកនាយឧត្តមសេនីយ៍ ឥត សារ៉ាត់ បានគូសបញ្ជាក់ថា នេះមិនមែនជាលើកទីមួយទេ ដែលកងយោធពលខេមរភូមិន្ទ បានចេញទៅចូលរួមក្នុងសមយុទ្ធពហុសាសន៍ ដែលមានបណ្ដាប្រទេសជាច្រើនចូលរួម ដូច្នេះ លោក ជឿជាក់ថា កងកម្លាំងរបស់កម្ពុជា ដែលចូលរួមក្នុងប្រតិបត្តិការសមយុទ្ធនេះប្រកបដោយជោគជ័យ៕