ហេតុអ្វីរដ្ឋមិនអាចបញ្ចុះតម្លៃពន្ធនាំចូលរថយន្តថ្មី និងរថយន្តដឹកជញ្ជូន​តាមការស្នើរបស់​វិស័យឯកជន?

តំណាងវិស័យឯកជន លោកឧកញ៉ា សូ ងួន ម្ចាស់ក្រុមហ៊ុនដឹកជញ្ជូនដ៏ធំមួយនៅកម្ពុជា បានដាក់សំណើដោយផ្ទាល់​ទៅសម្តេច ហ៊ុន ម៉ាណែត នាយករដ្ឋមន្រ្តីកម្ពុជា នៅក្នុងវេទិការាជរដ្ឋាភិបាល និងផ្នែកឯកជនលើកទី១៩ នាថ្ងៃទី ១៣ វិច្ឆិកា ក្នុងការពិចារណាអនុគ្រោះពន្ធនាំចូលរថយន្តថ្មី លើកលែងអាករលើតម្លៃពិសេសនានា អាករលើតម្លៃបន្ថែម និងរថយន្តដឹកជញ្ជូនធុនធ្ងន់ ដល់ក្រុមហ៊ុនដឹកជញ្ជូនស្របច្បាប់ ដើម្បីបង្កើនប្រសិទ្ធភាពនៃការដឹកជញ្ជូន កាត់បន្ថយ​លើការប្រើប្រាស់ប្រេងឥន្ធនៈ  គ្រោះថ្នាក់ចរាចរណ៍ និងការបំពុលបរិស្ថានជាដើម។

ឆ្លើយតបនឹងសំណើនេះ សម្តេច ហ៊ុន ម៉ាណែត បានលើកឡើងថា រាជរដ្ឋាភិបាលមិនទាន់អាចមានលទ្ធភាព​បញ្ចុះតម្លៃ​ពន្ធបន្ថែមបានទេ ដោយសារចំណូលពីពន្ធ និង អាករលើរថយន្ត គឺជាប្រភពចំណូលមួយដ៏សំខាន់របស់រាជរដ្ឋាភិបាល។ ទោះយ៉ាងណា សម្តេចបានគូសបញ្ជាក់ថា រាជរដ្ឋាភិបាលបានបញ្ចុះ អាករពិសេសម្ដងរួចទៅហើយ តាមរយៈ​អនុក្រឹត្យលេខ ១៨ អនក្រ.បក ចុះថ្ងៃទី ៩ ខែ កុម្ភៈ ឆ្នាំ ២០២១, ក្នុងនោះ៖ ទី១. ពីអត្រា ៤០% មក ២៥% លើមុខ​ទំនិញ​រថយន្តសណ្តោង និងរ៉ឺម៉ក គ្រប់ប្រភេទ (រថយន្តដឹកកុងតឺន័រ);ទី២ ពីអត្រា ៤០% មក ៣០% លើមុខទំនិញ​រថយន្តដឹកទំនិញដែលមានទម្ងន់សរុប (GVW) លើសពី ៥ តោន; និង ទី៣. ពីអត្រា ៤០% មក ៣០% លើមុខទំនិញ​រថយន្តបែន, រថយន្តស្ទូច និងរថយន្ត ឯកទេសផ្សេងទៀត ។ ទន្ទឹមនេះដែរ, អត្រាពន្ធនាំចូលលើរថយន្តដឹក​ជញ្ជូន​ជាទូទៅ គឺ ១៥% ប៉ុណ្ណោះ; ប៉ុន្តែអត្រានេះ មានកម្រិត ០% ប្រសិនបើរថយន្តដឹកជញ្ជូន ត្រូវបាននាំចូលពី​ប្រទេសដៃគូ ដែលមានកិច្ចព្រមព្រៀងពាណិជ្ជកម្មសេរី ជាមួយកម្ពុជា ការបញ្ជូនទំនិញពីកន្លែងផលិតទៅកាន់ទីផ្សារ ក្នុងស្រុក និងអន្តរជាតិ ពឹងផ្អែកលើគុណភាពនៃសេវាឡូជីស្ទីក និងដឹកជញ្ជូន។

វិស័យឯកជនតែងលើកឡើងថា កង្វះសេវាឡូជីស្ទីក និងថ្លៃដឹកជញ្ជូនខ្ពស់ ប៉ះពាល់ដល់ភាពប្រកួតប្រជែងរបស់កម្ពុជា។ ក្នុងន័យនេះ, រាជរដ្ឋាភិបាល បានបង្កើនការវិនិយោគលើវិស័យដឹកជញ្ជូនជាបន្តបន្ទាប់ ជាពិសេសការវិនិយោគ​លើ​ការកសាងហេដ្ឋរចនាសម្ព័ន្ធ ។ សម្រាប់វិស័យនេះ, បញ្ហាមួយ ដែលមានការស្នើសុំកន្លងមក គឺការដំឡើងកម្រិត ទម្ងន់ដឹកជញ្ជូនសរុប ៤០ តោនទៅដល់ ៤៥ តោន ដើម្បីកាត់បន្ថយថ្លៃដឹកជញ្ជូន ជាពិសេសក្នុងវិស័យកសិកម្ម ។ ពាក់ព័ន្ធបញ្ហានេះ សម្រេចធិបតីបានផ្តល់ការអនុញ្ញាតជាគោលការណ៍លើការដំឡើងកម្រិតទម្ងន់រថយន្តដឹកទំនិញពី ៤០ តោនទៅដល់ ៤៥ តោន ។ ដើម្បីអនុវត្តការងារនេះ ឱ្យបានឆាប់ សម្តេច ហ៊ុន ម៉ាណែត បានណែនាំឱ្យក្រសួង​សាធារណការ និងដឹកជញ្ជូន ត្រូវធ្វើវិសោធនកម្មច្បាប់ និងលិខិតបទដ្ឋានគតិយុត្តពាក់ព័ន្ធ និងសិក្សាពីបច្ចេកទេស ឱ្យបាន​គ្រប់ជ្រុងជ្រោយ ដើម្បីកំណត់ប្រភេទរថយន្ត និងប្រភេទផ្លូវ ដែលអាចប្រើប្រាស់បានសម្រាប់​ការដំឡើងកម្រិត​ទម្ងន់នេះ៕