ADB ទម្លាក់ការព្យាករណ៍សេដ្ឋកិច្ច ថៃ មកនៅត្រឹម ២.៥ ភាគរយក្នុងឆ្នាំនេះ​

ធនាគារអភិវឌ្ឍន៍អាស៊ី (ADB) បានទម្លាក់ការព្យាករណ៍សេដ្ឋកិច្ចសម្រាប់ប្រទេសថៃក្នុងឆ្នាំ ២០២៣ ពីកំណើន ៣.៥ ភាគរយមកត្រឹម ២.៥ ភាគរយ ដោយសារតែកត្តាធ្លាក់ចុះនៃការនាំចេញ ការកាត់បន្ថយការចំណាយរបស់រដ្ឋាភិបាល និងការវិនិយោគទាបពីផ្នែកសាធារណៈ និងវិស័យឯកជន ។

ទន្ទឹមនឹងនេះ ADB ក៏បានកែសម្រួលការព្យាករណ៍សេដ្ឋកិច្ចថៃនៅឆ្នាំក្រោយផងដែរពីចំនួន​ ៣.៧ ភាគរយមក ៣.៣ ភាគរយវិញ ដោយសារការធ្លាក់ចុះនៃសេដ្ឋកិច្ចពិភពលោក ។

ចំណែកសម្រាប់ប្រទេសកំពុងអភិវឌ្ឍន៍នៅក្នុងតំបន់អាស៊ី និងប៉ាស៊ីហ្វិកទាំងមូល, ADB បានបង្កើនការព្យាករណ៍ដល់ ៤.៩ ភាគរយ បន្ទាប់ពីតម្រូវការក្នុងស្រុកដ៏រឹងមាំបានជំរុញឲ្យមានកំណើនខ្ពស់ជាងការរំពឹងទុកនៅក្នុងប្រទេសចិន និងឥណ្ឌា ប៉ុន្កែទស្សនវិស័យសម្រាប់ឆ្នាំក្រោយ​នៅរក្សា ៤.៨ ភាគរយដដែល ។

ការ​អភិវឌ្ឍ​ទស្សនវិស័យ​របស់​អាស៊ី​នៅ​តែ​មាន​ភាព​ប្រសើរ​ បើ​ទោះ​ជា​មាន​បញ្ហា​ប្រឈម​ជា​សាកល​ក៏ដោយ ស្របពេលដែលអតិផរណានៅក្នុងតំបន់ នឹងធ្លាក់ចុះពី ៤.៤ ភាគរយពីឆ្នាំមុនមក ៣.៥ ភាគរយនៅឆ្នាំនេះ មុនពេលកើនឡើងទៅ ៣.៦ ភាគរយវិញនៅឆ្នាំ ២០២៤ ។

ដោយឡែក ហានិភ័យធ្លាក់ចុះត្រូវបានផ្សារភ្ជាប់ជាចម្បងជាមួយនឹងអត្រាការប្រាក់ខ្ពស់ជាងមុនក្នុងប្រទេសដែលមានសេដ្ឋកិច្ចជឿនលឿន ដែលអាចបង្កឲ្យមានអស្ថិរភាពហិរញ្ញវត្ថុ ។ ទន្ទឹមនឹងនេះ ការរំខានការផ្គត់ផ្គង់ដែលអាចកើតមានពីបាតុភូត El Niño និងសង្គ្រាមលុកលុយរបស់រុស្ស៊ីលើអ៊ុយក្រែន ក៏អាចបង្កជាបញ្ហាប្រឈមផ្នែកថាមពល និងសន្តិសុខស្បៀង ដែលនឹងជំរុញឲ្យមានការកើនឡើងអតិផរណាផងដែរ ៕

ប្រែសម្រួល៖ នាង រតនៈ

ប្រភព៖ The Nation

ចុចអាន៖ ថៃ ប្រាប់ក្រុមហ៊ុន ជប៉ុន ឲ្យងាកទៅផលិតរថយន្តអគ្គិសនីវិញ បើមិនចង់បាត់ ចំណែកទីផ្សារ