សម្ដេចធិបតី អរគុណប្រទេសឆេក ដែលបានលុបចោលបំណុលរបស់កម្ពុជា  ហើយបង្វែរទៅជាជំនួយអភិវឌ្ឍន៍ 

ក្នុងជំនួបជាមួយឯកអគ្គរដ្ឋទូតឆេកប្រចាំកម្ពុជា, សម្ដេច ហ៊៊ុន ម៉ាណែត នាយករដ្ឋមន្ត្រីកម្ពុជា បានអរគុណចំពោះរដ្ឋាភិបាលប្រទេសឆេកដែលបានលុបចោលបំណុលរបស់កម្ពុជា  ដោយបង្វែរទៅជាជំនួយអភិវឌ្ឍន៍  និងបានផ្តល់ជំនួយអភិវឌ្ឍន៍ផ្លូវការដល់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួររម្លឹកឡើងវិញថា កាលពីខែធ្នូ ឆ្នាំ២០១២ រដ្ឋាភិបាលនៃប្រទេសឆេក បានសម្រេចលុបចោលបំណុលប្រមាណ៣លានដុល្លារដែលកម្ពុជាខ្ចី អំឡុងទសវត្សឆ្នាំ១៩៨០ ដោយបង្វែរបំណុលនោះទៅជាជំនួយដើម្បីឱ្យកម្ពុជាអភិវឌ្ឍន៍ប្រទេស។ ការណ៍ដែលប្រទេសឆែកបានលុបចោលបំណុលដែលកម្ពុជាជំពាក់ គឺដោយសារយល់ឃើញថាកម្ពុជា ជាប្រទេសដែលទើបតែរំដោះខ្លួនចេញពីភ្នក់ភ្លើងសង្គ្រាម។

ក្នុងជំនួបនាថ្ងៃទី៩ ខែមករា ឆ្នាំ២០២៤ នៅវិមានសន្តិភាព សម្តេចមហាបវរធិបតី​ ក៏បានអរគុណដល់រដ្ឋាភិបាលនៃប្រទេសឆេកដែលបានជួយបណ្តុះបណ្តាលធនធានមនុស្សនៅកម្ពុជា ចាប់តាំងពីទសវត្សរ៍ឆ្នាំ១៩៨០មក។ សម្ដេចនាយករដ្ឋមន្ត្រីក៏បានការវាយតម្លៃខ្ពស់ចំពោះកិច្ចសហប្រតិបត្តិការថ្មីៗរវាងប្រទេសទាំងពីរ នៅក្នុងវិស័យបច្ចេកវិទ្យាព័ត៌មាន, សន្តិសុខអ៉ីនធើណេត និងកសិកម្ម។

ក្នុងឱកាសនៃជំនួបនេះ ឯកអគ្គរដ្ឋទូតប្រទេសឆេកប្រចាំកម្ពុជា លោក Martin Vávra បានថ្លែងអំណរគុណចំពោះ សម្តេចធិបតី ដែលឆ្លៀតពេលដ៏មមាញឹកអនុញាតឱ្យរូបលោក និងសហការី ចូលជួបសម្តែងការគួរសម និងពិភាក្សាការងារ ព្រមទាំងបានរំឭកផងដែរអំពីទំនាក់ទំនងមិត្តភាព និងកិច្ចសហប្រតិបត្តិការដ៏ជិតស្និទ្ធ និងវែងឆ្ងាយរាប់ទសវត្សរ៍ រវាងឆេក និងកម្ពុជា ជាពិសេសចាប់តាំងពីទសវត្សរ៍ឆ្នាំ១៩៨០ មក ។

ជាចុងក្រោយ សម្តេចធិបតី  បានសាទរចំពោះលោកMartin Vávra ដែលទទួលបានការតែងតាំងជា ឯកអគ្គរដ្ឋទូត ឆេកប្រចាំកម្ពុជា និងបានផ្តាំផ្ញើនូវការអរគុណផងដែរ ជូនចំពោះ លោកនាយករដ្ឋមន្ត្រី នៃប្រទេសឆែក ដែលបានផ្ញើលិខិតអបអរសាទរចំពោះការចូលកាន់មុខតំណែងជានាយករដ្ឋមន្ត្រី របស់ សម្តេចធិបតី៕