ក្រសួងសុខាភិបាល រៀបចំការគ្រប់គ្រងកិច្ចសន្យា និងកិច្ចលទ្ធកម្ម ក្រោមឥណទានសម្បទានជប៉ុន

លោកវេជ្ជបណ្ឌិត ស៊ុង វិនតៈ​ រដ្ឋលេខាធិការ ក្រសួង​សុខាភិបាល​ និងជា ប្រធាន គ្រប់គ្រងគម្រោង​អភិវឌ្ឍន៍មន្ទីរពេទ្យតំបន់​ (Project Manager)​​ បានដឹកនាំមន្រ្តីជំនាញចូលរួមសិក្ខាសាលា ស្តីពី “ការគ្រប់គ្រងកិច្ចសន្យា និងកិច្ចលទ្ធកម្ម សម្រាប់អនុវត្តគម្រោង ក្រោមឥណទានសម្បទានរបស់រដ្ឋាភិបាលជប៉ុន”។

សិក្ខាសាលានេះ រៀបចំរយៈពេល ២ថ្ងៃ ពីថ្ងៃទី១១-១២ ខែមករា ឆ្នាំ២០២៤​ ដោយ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) នៅខេត្តសៀមរាប។

សិក្ខាសាលានេះ បានរៀបចំឡើងក្នុងគោលបំណង​ ដើម្បីផ្តល់ចំណេះដឹងអំពីគោលការណ៍ជាមូលដ្ឋាន និងលើកកម្ពស់អនុលោមភាពគោលការណ៍ណែនាំ នៃគម្រោងឥណទានសម្បទានរបស់រដ្ឋាភិបាលជប៉ុន (ODA Loan) ដល់ក្រសួងស្ថាប័នអនុវត្តគម្រោង ព្រមទាំងឈ្វេងយល់ឱ្យកាន់តែច្បាស់លាស់​ និងស៊ីជម្រៅពាក់ព័ន្ធនឹងដំណើរការកិច្ចលទ្ធកម្ម​ និងការគ្រប់គ្រងកិច្ចសន្យាគម្រោង​ ក្នុងការរួម​ចំណែកដល់ការអនុវត្ត​ និងការគ្រប់គ្រងគម្រោង ODA Loan របស់ប្រទេសជប៉ុន កាន់តែមានប្រសិទ្ធភាព​ និងប្រសិទ្ធផល។

សិក្ខាសាលានេះ​ មានការអញ្ជើញចូលរួមពីក្រសួងស្ថាប័នអនុវត្ត និងគ្រប់គ្រងគម្រោងនានា ដូចជា ក្រសួងសេដ្ឋកិច្ច និងហិរញ្ញវត្ថុ ក្រសួងសុខាភិបាល ក្រសួងសាធារណៈការ និងដឹកជញ្ជូន ក្រសួងធនធានទឹក និងឧតុនិយម ក្រសួងអភិវឌ្ឍន៍ជនបទ កំពង់ផែស្វ័យតខេត្តព្រះសីហនុ អគ្គិសនីកម្ពុជា រដ្ឋាករទឹកស្វយ័តសៀមរាប រដ្ឋបាលរាជធានីភ្នំពេញ និងរដ្ឋាករទឹកស្វយ័តក្រុងភ្នំពេញ៕