ព័ត៌មានជាតិ

ត្រឹមឆ្នាំ ២០២៣ ក្រសួងការងារ ចុះបញ្ជីអង្គការវិជ្ជាជីវៈកើនឡើងជាង ៦ ពាន់ នៅទូទាំងប្រទេស

បានផុស

២ years មុន

នៅ

ថ្ងៃសៅរ៍ ១០ កុម្ភៈ ២០២៤

ដោយ

គិតត្រឹមឆ្នាំ ២០២៣ ក្រសួងការងារ និងបណ្ដុះបណ្ដាលវិជ្ជាជីវៈ បានចុះបញ្ជីអង្គការវិជ្ជាជីវៈកើនឡើងដល់ជាង ៦២០០ នៅទូទាំងប្រទេស ដែលបានចូលរួមចំណែកយ៉ាងសំខាន់ក្នុងការលើកម្ពស់ និងការពារសិទ្ធិសេរីភាពដល់កម្មករ-និយោជិត នៅតាមរោងចក្រសហគ្រាសនានាកាន់តែប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានអាននៅក្នុងសន្និបាតបូកសរុបការងារឆ្នាំ ២០២៣ បានឱ្យដឹងថា សិទ្ធិសេរីភាពអង្គការវិជ្ជាជីវៈ ត្រូវបានលើកកម្ពស់ និងបើកទូលាយអនុលោមតាមច្បាប់ ស្ដីពីសហជីព និងបទដ្ឋានការងារអន្តរជាតិ ជាពិសេស អនុលោមតាមអនុសញ្ញាអង្គការអន្តរជាតិខាងការងារដែលកម្ពុជាបានផ្តល់សច្ចាប័ន ដោយបានចុះបញ្ជីកាអង្គការ វិជ្ជាជីវៈថ្មី សរុបចំនួន ២៥៩ ក្នុងនោះ សហភាពសហជីព ចំនួន ២, សហព័ន្ធសហជីព ចំនួន ១៣ និងសហជីពមូលដ្ឋាន ចំនួន ២៤៤ ដែលធ្វើអង្គការវិជ្ជាជីវៈបានកើន ឡើងពី ៦ ០១៤ នៅឆ្នាំ ២០២២ មកដល់ ៦ ២៧២ នៅឆ្នាំ ២០២៣ ក្នុងនោះសហភាព សហជីពមានចំនួន ៤២ សហព័ន្ធសហជីព មានចំនួន ២៨០, សហជីពមូលដ្ឋានមាន ចំនួន ៥ ៩៣៨ និងសមាគមនិយោជកមានចំនួន ១២។

ការចុះបញ្ជីទទួលស្គាល់សហជីពកើនឡើងនេះបានធ្វើឱ្យចំនួនវិវាទការងាររួម និងកូដកម្ម-បាតុកម្ម ក៏មានការធ្លាក់ចុះគួរឱ្យកត់សម្គាល់ផងដែរ ដែលបណ្តាលមកពីប្រសិទ្ធភាព នៃការអនុវត្តច្បាប់ស្ដីពីសហជីព និងការពង្រឹងប្រព័ន្ធអធិការកិច្ចការងារកាន់តែល្អប្រសើរ។

បើតាម លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា គិតមកត្រឹមឆ្នាំ ២០២៣ នេះ កម្ពុជា បានធ្វើបច្ចុប្បន្នភាពរោងចក្រ សហគ្រាស កើនដល់ ចំនួន ៤០ ៩៧៥ សហគ្រាស និងមានកម្មករ-និយោជិត សរុបចំនួន ១ ៧១៥ ០២៩ នាក់ ក្នុងនោះស្រី ១ ០៣៩ ៦៩៩ នាក់។

លោក កត្តា អ៊ន បានបន្តថា ក្នុងចំណោមរោងចក្រ សហគ្រាស សរុបជាង ៤ ម៉ឺន ក្នុងនោះរោងចក្រ សហគ្រាសវិស័យកាត់ដេរ មានចំនួន ១ ៤៩៩ សហគ្រាស កើនឡើង ១៣៤៧% បើធៀបនឹងឆ្នាំ ២០២២ ស្មើនឹង ៣,៦៦% បើធៀបនឹងរោងចក្រ សហគ្រាសសរុប និងកម្មករ-និយោជិត ចំនួន ៨៨៦ ៣៥៥ នាក់ ស្រី ៦៧៣ ៧៣៦ នាក់ ស្មើនឹង ៥១,៦៨% បើធៀបនឹងកម្មករ-និយោជិត សរុប។

លោកបានបន្តទៀតថា ចំណែករោងចក្រសហគ្រាសវិស័យក្រៅពីកាត់ដេរ មានចំនួន ៣៩ ៤៧៦ សហគ្រាស កើនឡើង ១៥៤,៥៧% បើធៀបនឹងឆ្នាំ ២០២២ ស្មើនឹង ៩៦,៣៤% បើធៀបនឹងរោងចក្រ សហគ្រាសសរុប និងកម្មករ-និយោជិត ចំនួន ៨២៨ ៦៧៤ នាក់ ស្រី ៣៦៥ ៩៦៣ នាក់ ស្មើនឹង ៤៨,៣២% បើធៀបនឹងកម្មករ-និយោជិត សរុប៕

អត្ថបទ ៖ សំអឿន