Update៖ ឆេះឃ្លាំងស្តុកអេតចាយនៅព្រះសីហនុ សមត្ថកិច្ចបាញ់ទឹកពន្លត់ជិត៥០ឡាន

ករណីអគ្គិភ័យកាលពីម៉ោង៧យប់ថ្ងៃទី១៦ ខែកុម្ភៈម្សិលមិញនេះ យោងតាមព័ត៌មានបឋមដំបូងថាឆេះរោងចក្រក្បែររោងចក្រផលិតបារីមួយកន្លែងនោះ តាមពិតវាជាករណីភ្លើងឆេះឃ្លាំងស្តុកអេតចាយ។ បើយោងតាមរបាយការណ៍របស់សមត្ថកិច្ចបានបញ្ជាក់ថា គ្រោះអគ្គិយភ័យនេះបានកើតឡើងនៅម៉ោង១៩និង០០នាទី ថ្ងៃទី១៦ ខែកុម្ភ: ឆ្នាំ២០២៤ នៅក្នុងឃ្លាំងស្តុកអេតចាយ(ស្តុបជ័រ ដបទឹកសុទ្ធ)មួយកន្លែងនៅស្របផ្លូវជាតិលេខ៤ជិតបុរី VIP ស្ថិតក្នុងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។

ម្ចាស់ឃ្លាំងឈ្មោះ ឡេ មុីងកាញ់ ភេទប្រុស អាយុ៦២ឆ្នាំ ជនជាតិវៀតណាម មុខរបរទិញលក់អេតចាយ។ សំណង់ឃ្លាំងឆេះនេះសាងសង់ពីដែកទំហំទទឹង២០ម៉ែត្រ×បណ្ដោយ ២០ម៉ែត្រ ខូចខាតសម្ភារ:ដូចជាគំនរជ័រដបទឹកសុទ្ធគ្រីបប្រហែល៥០%។ ចំពោះមូលហេតុសមត្ថកិច្ចកំពុងស្រាវជ្រាវ។

ក្នុងប្រតិបត្តិការបាញ់ទឹកពន្លត់អគ្គិភ័យនេះ បានប្រើប្រាស់រថយន្តពន្លត់អគ្គិភ័យមកពីអង្គភាពរដ្ឋ និងឯកជនចំនួន១៣គ្រឿង និងបាញ់ទឹកអស់៤៨។ បើតាមសមត្ថកិច្ចករណីខាងលើមិនបណ្ដាលអោយមានមនុស្សរងរបួស និងស្លាប់ទេ។ អគ្គិភ័យឆេះឃ្លាំងស្តុកអេតចាយនេះសមត្ថកិច្ចបានបាញ់ទឹកពន្លត់បានទាំងស្រុងនៅវេលាម៉ោង១២និង០០ នាទីថ្ងៃ ខែ ឆ្នាំដដែល៕

អត្ថបទ៖ ស៊ុយ ចាន់ធា