ព័ត៌មានជាតិ

សម្តេច ម៉ែន សំអន ៖ បោះឆ្នោតជូនគណបក្សប្រជាជនកម្ពុជាលេខរៀងទី ១ គឺដើម្បីលើកស្ទួយជីវភាពប្រជាជនរស់នៅក្រោមម្លប់សន្តិភាព

បានផុស

២ years មុន

នៅ

ថ្ងៃសុក្រ ២៣ កុម្ភៈ ២០២៤

ដោយ

សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្ស បានថ្លែងថា បោះឆ្នោតជូនគណបក្សប្រជាជនកម្ពុជារូបសញ្ញាទេវតាបាចផ្កា លេខរៀងទី ១ គឺដើម្បីលើកស្ទួយជីវភាពប្រជាជនដោយរស់នៅក្រោមម្លប់សន្តិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈពេលអញ្ជើញជាអធិបតីក្នុងពិធីបិទបញ្ចប់យុទ្ធនាការឃោសនាបោះឆ្នោតសមាជិកព្រឹទ្ធសភានីតិកាលទី ៥ ដែលមានសមាជិកចូលរួម ជាង ១.០០០ នាក់ មកពីក្រុងស្រុកទាំង ៨ នៅស្នាក់ការគណបក្សប្រជាជនកម្ពុជាខេត្តស្វាយរៀង ថ្ងៃសុក្រ ១៤ កើត ខែមាឃ ឆ្នាំថោះ បញ្ចស័ក ព.ស. ២៥៦៧ ត្រូវនឹង ថ្ងៃទី ២៣ ខែកុម្ភៈ ឆ្នាំ ២០២៤។

សម្តេចអនុប្រធានគណបក្ស ថ្លែងអំណរគុណដល់គណៈកម្មាធិការ គណបក្សខេត្ត គណបក្សក្រុង-ស្រុក លោក លោកស្រី ក្រុមប្រឹក្សា សង្កាត់នៅទូទាំងខេត្តស្វាយរៀង ដែលបានខិតខំសម្រេចបានសមិទ្ធផលយ៉ាងច្រើននៅទូទាំងខេត្ត ក្នុងនោះការអនុវត្តគោលនយោបាយ អភិវឌ្ឍន៍ឃុំ-សង្កាត់ ឆ្នាំ ២០២២-២០២៧ បម្រើឱ្យផលប្រយោជន៍របស់ប្រជាជន និងសង្គមជាតិពិតៗ ដែលនេះ គឺជាមូលដ្ឋានសម្រាប់ឱ្យគណបក្សឈានទៅអនុវត្តយុទ្ធសាស្ត្របញ្ចកោណដំណាក់កាលទី ១ នៃរាជរដ្ឋាភិបាលបន្តវេន អាណត្តិទី ៧ ដឹកដោយសម្ដេចធិបតី ហ៊ុន ម៉ាណែត ជានាយករដ្ឋមន្ត្រី ដែលមានបាវចនា ចំនួន ៥ គឺ «កំណើន ការងារ សមធម៌ ប្រសិទ្ធភាព និង ចីរភាព និងមានអាទិភាព គន្លឹះចំនួន ៥ គឺ «មនុស្ស ផ្លូវ ទឹក ភ្លើង និង បច្ចេកវិទ្យា» ដែលជាគ្រឹះ និងជាមធ្យោបាយសំខាន់ៗ នៃការសម្រេចបាននូវចក្ខុវិស័យឆ្នាំ ២០៥០។

សម្តេចអនុប្រធានគណបក្ស ក៏បានផ្ដាំផ្ញើដល់អង្គបោះឆ្នោតទាំងអស់ ត្រូវថែទាំសុខភាព និងត្រៀមឯកសារសម្រាប់យកទៅបោះឆ្នោត និងបានអំពាវនាវឲ្យសមាជិក សមាជិកាទាំងអស់ បោះឆ្នោតជូនគណបក្សប្រជាជនកម្ពុជា ដែលមានរូបទេវតាបាចផ្កា មានលេខរៀងទី ១ នៅថ្ងៃទី ២៥ ខែកុម្ភៈ ឆ្នាំ ២០២៤ ខាងមុខនេះ ដើម្បីអនាគតកម្ពុជា។

យោងតាមរបាយការណ៍របស់ លោក អ៊ុយ ថន ប្រធានគណៈប្រចាំការ គណៈអចិន្ត្រៃយ៍ គណៈកម្មាធិការ គណបក្សខេត្តស្វាយរៀង បានលើកឡើងថា សមាជិកក្រុមប្រឹក្សាសង្កាត់ ដែលជាអង្គបោះឆ្នោតមានចំនួន ៥២៣ រូប នារី ១៣៦ រូប។ ក្នុងនោះសមាជិកក្រុមប្រឹក្សាសង្កាត់របស់គណបក្សប្រជាជនកម្ពុជា មានចំនួន ៤២៣ រូប ស្ត្រី ១២៥ រូប។

សូមបញ្ជាក់ថា សម្រាប់យុទ្ធនាការឃោសនាបោះឆ្នោតជ្រើសរើសតាំងសមាជិកព្រឹទ្ធសភា នីតិកាលទី ៥ រយៈពេល ១៤ ថ្ងៃ ដែលបានចាប់ផ្តើម កាលពីថ្ងៃទី ១០ ខែកុម្ភៈ ឆ្នាំ ២០២៤ និងបិទបញ្ចប់នៅថ្ងៃទី ២៣ ខែកុម្ភៈ ឆ្នាំ ២០២៤ គឺបានប្រព្រឹត្តិទៅដោយរលូន ក្រោមបរិយាកាសល្អប្រសើរ គ្មានអំពើហិង្សាកើតឡើងឡើយ៕

អត្ថបទ ៖ វិមាន