ព័ត៌មានអន្ដរជាតិ

ភរិយាមេបក្សប្រឆាំង រុស្ស៊ី ថ្លែងឲ្យសភាអឺរ៉ុបជួយរកយុត្តិធម៌ចំពោះមរណភាពស្វាមី

បានផុស

២ years មុន

នៅ

ថ្ងៃសុក្រ ១ មីនា ២០២៤

ដោយ

ភរិយារបស់អតីតមេដឹកនាំបក្សប្រឆាំងរុស្ស៊ីដ៏ល្បីឈ្មោះលោក Alexei Navalny កាលពីពេលថ្មីៗនេះបានអំពាវនាវដល់សមាជិកសភាអឺរ៉ុបឲ្យចេញការគាំទ្រ និងជួយរកយុត្តិធម៌ដល់ស្វាមីរបស់លោកស្រី ជាពិសេសត្រូវតែដាក់បន្ទុក ក៏ដូចជារិះគន់ដល់លោកប្រធានាធិបតី Vladimir Putin ជុំវិញមរណភាពស្វាមីរបស់ខ្លួន ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AP កាលពីថ្ងៃទី២៩ ខែកុម្ភៈ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Yulia Navalnaya បានថ្លែងនៅឯសភាសហភាពអឺរ៉ុប (EU) ថា លោកស្រីសូមចោទប្រកាន់លោក Putin ពីបទរៀបផែនការសម្លាប់ស្វាមីលោកស្រីនៅក្នុងមន្ទីរឃុំឃាំង Arctic Circle កាលពីថ្ងៃទី១៦ ខែកុម្ភៈកន្លងទៅ ។ លោកស្រីថែមទាំងឲ្យលោក Putin ត្រូវតែហារមាត់ស្ដីនូវអ្វីដែលគាត់បានធ្វើមកលើស្វាមី និងប្រទេសជាតិដែលមានសុខសន្តិភាពរបស់លោកស្រី ។

ទន្ទឹមនោះ ស្រ្តីមេម៉ាយវ័យ ៤៨ ឆ្នាំរូបនេះបញ្ជាក់បន្ថែមទៀតថា ដំណោះស្រាយ ឬការដាក់ទោសទណ្ឌកម្មចំពោះមរណភាពស្វាមីរបស់លោកស្រី មិនមែនជាវិធីបំបាកធ្មង់លោក Putin នោះទេ យើងទាំងអស់គ្នាត្រូវតែប្រយុទ្ធប្រឆាំងនឹងក្រុមឧក្រិដ្ឋជនទាំងនេះ ហើយក្បួនយុទ្ធសាស្ត្រដើម្បីធ្វើដូច្នេះគឺ ស្វែងរកសហការីរបស់ក្រុមម៉ាហ្វីយ៉ា ក៏ដូចជាមេធាវី អ្នកជំនាញផ្នែកហិរញ្ញវត្ថុ និងមិត្តភក្តិដែលជួយលាក់លុយឲ្យលោក Putin ។

ទន្ទឹមនោះ ការលើកឡើងរបស់លោកស្រី Navalnaya នៅក្នុងសភាអឺរ៉ុបកើតមានឡើងត្រឹមតែមួយសប្ដាហ៍ប៉ុណ្ណោះ បន្ទាប់ពីភរិយារបស់មេបក្សប្រឆាំងរុស្ស៊ីដែលបាត់រូបកាយទៅហើយនោះ អញ្ជើញជួបជាមួយលោកប្រធានាធិបតីសហរដ្ឋអាមេរិក Joe Biden ដើម្បីបង្ហាញពីការចូលរួមរំលែកទុក្ខដ៏ក្រៀមក្រំនៃមរណភាពស្វាមីលោកស្រី ។

ចំណែកពាក់ព័ន្ធនឹងឫសគល់នៃមរណភាពរបស់មេបក្សប្រឆាំងដែលហ៊ានរិះគន់មិនសំចៃមាត់ទៅលើលោក Putin នេះដែរ ប្រមុខចារកម្មយោធាអ៊ុយក្រែនលោក Kyrylo Budanov បានប្រាប់ចំៗថា លោក Navalny បានស្លាប់បាត់បង់ជីវិត គឺដោយសារតែបញ្ហាកកឈាម ហើយលោកថែមទាំងទាត់ចោលចំពោះអ្នកដែលចេះតែស្មានថា មេបក្សប្រឆាំងវ័យ ៤៧ ឆ្នាំរូបនេះត្រូវបានសម្លាប់នៅក្នុងពន្ធនាគាររុស្ស៊ី ។

គួរបញ្ជាក់ថា លោក Navalny មានឈ្មោះបោះសំឡេង និងទទួលភាពល្បីល្បាញតាមរយៈការលាតត្រដាងការពិត និងនិយាយមិនសំចៃមាត់ប្រឆាំងនឹងអំពើពុករលួយនៅក្នុងជួររដ្ឋាភិបាលរបស់លោក Putin ។ នៅឆ្នាំ ២០២០ មេបក្សប្រឆាំងរូបនេះត្រូវបានគេបំពុល ហើយបានចាយពេលរាប់ខែដើម្បីព្យាបាលនៅក្នុងប្រទេសអាល្លឺម៉ង់ ខណៈនៅពេលត្រឡប់មកទឹកដីរុស្ស៊ីវិញ គាត់ត្រូវបានចាប់ខ្លួនភ្លាមៗពីបទចោទប្រកាន់ជាប់ទាក់ទិននឹងហេតុផលនយោបាយ ៕