នាយករដ្ឋមន្ត្រីថៃ លោក សេដ្ឋា នឹងលែងកាន់តំណែង ២ ក្នុងពេលតែមួយ

លោកនាយករដ្ឋមន្ត្រីថៃ សេដ្ឋា ថាវីស៊ីន នឹងដកខ្លួនចេញពីតំណែងជារដ្ឋមន្ត្រីក្រសួងហិរញ្ញវត្ថុចោលមួយ ដើម្បីបន្ថូរស្ថានការណ៍តានតឹងជាមួយធនាគារកណ្ដាលថៃ (BoT) ជុំវិញគោលនយោបាយរូបិយវត្ថុ ។ នេះបើយោងតាមការចេញផ្សាយដោយកាសែត Bangkok Post នាថ្ងៃទី១៣ ខែមីនា ។

ទន្ទឹមនោះ កាសែតថៃ Krungthep Turakij ក៏បានរាយការណ៍ផងដែរថា អតីតមហាសេដ្ឋីអចលនទ្រព្យរូបនេះអាចនឹងតែងតាំងលោក Pichai Chunhavajira ជារដ្ឋមន្ត្រីហិរញ្ញវត្ថុថ្មី ដោយសារតែលោក Pichai ដែលលើកឡើងឲ្យកាន់ការជាប្រធានផ្សារហ៊ុនថៃកាលពីខែមុន គឺជាមនុស្សដ៏គួរឲ្យទុកចិត្ត និងស្និទ្ធជាមួយលោក សេដ្ឋា បំផុត ម្យ៉ាងលោក Pichai ក៏មានសមត្ថភាពអនុវត្តគោលនយោបាយសេដ្ឋកិច្ចរបស់រដ្ឋាភិបាលក្នុងករណីបន្ទាន់ផងដែរ ។

ស្របពេលជាមួយគ្នានេះ ការរើសយកលោក Pichai ដែលជាអ្នកចាស់ទុំខាងទីផ្សារមូលធន ឲ្យធ្វើជារដ្ឋមន្ត្រីក្រសួងហិរញ្ញវត្ថុថ្មី អាចជួយសម្រាលបន្ទុករវាងរដ្ឋបាលរបស់លោក សេដ្ឋា និងធនាគារកណ្តាលផងដែរ បន្ទាប់ពីលោកនាយករដ្ឋមន្ត្រីតែងតែប៉ះគ្នាជាញឹកញាប់លើយុទ្ធសាស្ត្រក្នុងការស្ដារប្រទេសដែលមានសេដ្ឋកិច្ចធំបំផុតទីពីររបស់អាស៊ានមួយនេះ ពាក់ព័ន្ធនឹងការកាត់បន្ថយអត្រាការប្រាក់ដើម្បីពន្លឿនកំណើនសេដ្ឋកិច្ច ចំពេលមានវិបត្តិអតិផរណា ។

ចំណែកឫសគល់នៃរឿងរ៉ាវនេះអាចដោយសារតែការងារដកឃ្លាមិនរួចរបស់លោក សេដ្ឋា ក្នុងតំណែងជានាយករដ្ឋមន្ត្រី ទើបរាំងស្ទះសកម្មភាពការងារនៅក្នុងក្រសួងហិរញ្ញវត្ថុ ជាពិសេសកង្វះក្នុងការអនុវត្តគោលនយោបាយសេដ្ឋកិច្ចថ្មី ខណៈការតែងតាំងរដ្ឋមន្ត្រីថ្មីនេះទៀតសោត ក៏នឹងជួយសម្រាលបន្ទុកការងាររបស់នាយករដ្ឋមន្ត្រីផងដែរ ។

គួរបញ្ជាក់ថា សេដ្ឋកិច្ច​របស់​ប្រទេស​ថៃ​បាន​កើន​ឡើង ១.៩ ភាគរយកាល​ពី​ឆ្នាំ​មុន ដែលជាកំណើនដ៏យឺតយ៉ាវមួយ បើប្រៀបធៀបនឹងអត្រាកំណើនជាមួយ​ដៃគូ​ក្នុង​តំបន់ ខណៈគោលការណ៍របស់លោក សេដ្ឋា ចង់បង្កើនល្បឿនពង្រីកសេដ្ឋកិច្ចប្រចាំឆ្នាំរបស់ប្រទេសដល់ ៥ ភាគរយ ដោយផ្ដោតមុខព្រួញលើវិធានការមួយចំនួន រួមទាំងការលើកលែងទិដ្ឋាការដើម្បីជំរុញវិស័យទេសចរណ៍ និងវិនិយោគិនមកពីជុំវិញពិភពលោក ដើម្បីទាក់ទាញការវិនិយោគផ្ទាល់ពីបរទេស ៕

ដោយ ៖ សុខ ជីវ័ន្ត

ចុចអាន ៖ គណៈកម្មាធិការរៀបចំការបោះឆ្នោត ថៃ ទាមទារឲ្យតុលាការធម្មនុញ្ញរំលាយ បក្សចលនាឆ្ពោះទៅមុខ