លោក ឃឹម ហ្វីណង់ ៖ បើជ្រុលជាបបួលគ្នាលេង គួរលេងយ៉ាងណាឱ្យមានប្រយោជន៍

ក្រោយមានការផុសផុលលេងសើច ទាក់ទងនឹងបន្លែម្រះ តាមរូបភាពផ្សេងៗ ដោយមានទាំងការប្រៀបធៀប នូវរសជាតិ និងលើកចំណុចអវិជ្ជមានជាដើមផងនោះ លោក ឃឹម ហ្វីណង់ អនុរដ្ឋលេខាធិការក្រសួងកសិកម្ម ណែនាំថា បើជ្រុលជាបបួលគ្នាលេង គួរលេងយ៉ាងណាឱ្យមានប្រយោជន៍។ នេះបើតាមរយៈសារពីគណនីបណ្តាញទំនាក់ទំនងសង្គម របស់លោកនៅរសៀលថ្ងៃទី២៦ មេសានេះ។

លោក ឃឹម ហ្វីណង់ អនុរដ្ឋលេខាធិការក្រសួងកសិកម្ម បានលើកយករឿងផលិតមាតិកា ដោយយកកសិផលខ្មែរ «បន្លែម្រះ» ទៅលេងសើច ដូចជាឈប់គាំទ្របន្លែ ផ្លែឈើ ឬកសិកផលណាមួយជាដើម ដោយលោកយល់ថា សកម្មភាពនេះ អាចនឹងប៉ះពាល់ដល់អ្នកដាំពិតមែន។

ហេតុនេះ មន្ត្រីក្រសួងកសិកម្មរូបនេះ សុំឱ្យមានការយោគយល់ និងគួរលេងយ៉ាងណាឱ្យមានប្រយោជន៍ ហើយ​ជៀសវាង​លេង​អ្វី​ដែលធ្វើឱ្យប៉ះពាល់ដល់មុខរបរ និងជីវភាពរបស់ប្រជាកសិកររបស់ខ្មែរ។

ទន្ទឹមនេះ លោកក៏បានស្នើឱ្យសាធារណជន ជួយផ្សព្វផ្សាយបន្តពីហ្វេសប៊ុកផេក «ដាំដោយខ្មែរ Planted by Khmer» ដែលជាផេកគាំទ្រកសិផលក្នុងស្រុករបស់ក្រសួង ដោយលើកឡើងថា សកម្មភាពបែបនេះ នឹងបានជាប្រយោជន៍ដល់ប្រជាកសិករខ្មែរដោយផ្ទាល់ផង ក៏ដូចជាជួយជំរុញការគាំទ្រ ការប្រើប្រាស់កសិផល ក្នុងស្រុកផង៕