កម្ពុជាស្វាគមន៍ចំពោះការបោះទុនបន្ថែមរបស់ក្រុមហ៊ុន Hainan Litree ​ក្នុងវិស័យទឹកស្អាត

ភ្នំពេញ៖ តំណាងក្រុមហ៊ុន Hainan Litree Purifying Technology Co., Ltd. របស់ប្រទេសកូរ៉េខាងត្បូងមានផែនការពង្រីកការវិនិយោគរបស់ខ្លួនរហូតដល់១០០លានដុល្លារក្នុងវិស័យទឹកស្អាត ដើម្បីចាប់ឪកាស និងឆ្លើយតបទៅនឹងការកើនឡើងនៃតម្រូវការពីមួយឆ្នាំទៅមួយឆ្នាំ។​

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីថ្ងៃទី១០ ខែឧសភា ឆ្នាំ២០២៤ បាន​ជួបតំណាងក្រុមហ៊ុន Hainan Litree Purifying Technology Co., Ltd. និងបានពិភាក្សាការងារដោយផ្តោតលើគម្រោងរបស់ក្រុមហ៊ុន ក្នុងការពង្រីកការវិនិយោគរបស់ខ្លួនក្នុងវិស័យទឹកស្អាតនៅកម្ពុជា។

នៅក្នុងសន្និបាតប្រចាំឆ្នាំលើកទី១២ របស់ក្រសួងកាលពីថ្ងៃទី ​២៣ កុម្ភៈ ឆ្នាំ២០២៤​ លោក ហែម វណ្ណឌី ​បានមានប្រសាសន៍ថាការធានាលទ្ធភាពទទួលបានទឹកស្អាតប្រើប្រាស់មានសារៈសំខាន់ណាស់សម្រាប់ការពារសុខភាពសាធារណៈ និងទាក់ទាញការវិនិយោគ​នានាទាំងក្នុងស្រុក និងអន្តរជាតិ ដែលជាកត្តាសំខាន់សម្រាប់លើកកម្ពស់ការអភិវឌ្ឍសង្គម-សេដ្ឋកិច្ចរបស់កម្ពុជា។

លោកបានគូសបញ្ជាក់ថា៖«ក្រសួងលើកទឹកចិត្តប្រតិបត្តិករទឹកស្អាតឯកជនឱ្យពង្រឹងសមត្ថភាពរបស់ខ្លួនក្នុងការពង្រីក និងពង្រឹងសេវាកម្មផ្គត់ផ្គង់ទឹកស្អាត ក្នុងតំបន់អាជ្ញាបណ្ណរបស់ខ្លួន ដើម្បីធានាដល់ការអនុវត្តលក្ខខណ្ឌតម្រូវនានា ជាពិសេសលក្ខខណ្ឌគោលទាំង៤ គឺការផ្គត់ផ្គង់ទឹកស្អាតប្រកបដោយគុណភាព សុវត្ថិភាព និរន្តរភាព និងថ្លៃសមរម្យ»។

​សមាគមអ្នកផ្គត់ផ្គង់ទឹកស្អាតកម្ពុជាគឺជាសមាគមមិនរកប្រាក់ចំណេញឈានមុខ សម្រាប់ការផ្គត់ផ្គង់ទឹកស្អាតនៅក្នុងប្រទេសកម្ពុជា ដែលលើកកម្ពស់កិច្ចសហការ ការរៀនសូត្រ និងការផ្លាស់ប្តូរចំណេះដឹងក្នុងចំណោមភាគីពាក់ព័ន្ធជាតិ និងអន្តរជាតិ។ សមាគមមានសមាជិកដែលជាប្រតិបត្តិករទឹកស្អាតឯកជនចំនួន ៣០០ មកពី ២៣ ខេត្ត និងសមាជិក ៤៣ ទៀត ជាក្រុមហ៊ុន និងស្ថាប័នហិរញ្ញវត្ថុទាក់ទងនឹងវិស័យទឹកស្អាត៕