Google កាត់បន្ថយបុគ្គលិក ១០០ នាក់ក្នុងផ្នែកជាច្រើនរបស់ក្រុមហ៊ុន

យោងតាមការចេញផ្សាយរបស់សារព័ត៌មាន​ CNBC នៅថ្ងៃទី៥ ខែមិថុនាបានឲ្យដឹងថា ក្រុមហ៊ុន Google បានកាត់បន្ថយបុគ្គលិកប្រមាណ ១០០ នាក់ក្នុងផ្នែកជាច្រើន ជាពិសេសនៅផ្នែក Google Cloud បើទោះជាផ្នែកមួយនេះមានការរីកចម្រើនលឿនបំផុតមួយរបស់ក្រុមហ៊ុនក៏ដោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុន Google បានជូនដំណឹងពីការដកមុខដំណែងចេញនេះដល់និយោជិតកាលពីសប្តាហ៍មុន ខណៈមុខតំណែងដែលត្រូវដកចេញមានដូចជា ផ្នែកលក់ ប្រឹក្សា យុទ្ធសាស្រ្តទីផ្សារ ប្រតិបត្តិការ និងវិស្វកម្ម ដោយយ៉ាងហោចណាស់មាន ១០០ មុខតំណែងត្រូវបានកាត់ចេញ ។

ទន្ទឹមនោះ ប្រាក់ចំណូលរបស់ Google Cloud ដែលមានប្រើបច្ចេកវិទ្យាបញ្ញាសិប្បនិមិត្ត (AI) បានកើនឡើង ២៨ ភាគរយ ក្នុងទំហំទឹកប្រាក់ ៩.៥៧ ពាន់លានដុល្លារក្នុងត្រីមាសចុងក្រោយនេះ ។

គួរបញ្ជាក់ថា Google បានធ្វើការបញ្ឈប់ការងារបុគ្គលិកជាបន្តបន្ទាប់ ចាប់តាំងពីដើមឆ្នាំ ២០២៣ មកម្ល៉េះ ខណៈក្រុមហ៊ុនទាមទារឲ្យពួកគេធ្វើការលើសម៉ោង និងមិនផ្ដល់ប្រាក់លើកទឹកចិត្តក្នុងកម្រិតណាមួយឡើយ ទោះបីជាក្រុមហ៊ុនមានកំណើនប្រាក់ចំណេញក៏ដោយ ។

កាលពីខែមុន Google ក៏បានកាត់បន្ថយបុគ្គលិកយ៉ាងហោចណាស់ ២០០ នាក់ពីផ្នែក​ Core របស់ក្រុមហ៊ុនផងដែរ ក្នុងនោះមានទាំងបុគ្កលិកសំខាន់ៗ និងមានទេពកោសល្យផ្នែកវិស្វកម្ម ។ ទោះយ៉ាងណា យោងតាមនាយកប្រតិបត្តិ Sundar Pichai បានប្រាប់បុគ្គលិកថា នេះគឺជាការបញ្ឈប់បុគ្គលិកតិចជាងមុនក្នុងរយៈពេល ៥ ខែនៃឆ្នាំ ២០២៤ នេះ ៕

អត្ថបទ៖ ប៊ុន សុភាព