Pepe ក្លាយជា​កីឡាករចាស់​ជាង​គេ​​បំផុត​​បង្ហាញ​ខ្លួន​នៅ​ EURO ជុំចុងក្រោយ

ខ្សែការពារជម្រើសជាតិព័រទុយហ្គាល់ Pepe បានបង្កើតកំណត់ត្រាថ្មីមួយ ដែល​បាន​ក្លាយជាកីឡាករចាស់ជាងគេ​បំផុត​​បង្ហាញខ្លួនលើទីលានក្នុងព្រឹត្តិការណ៍ EURO ជុំចុងក្រោយ។​

ខ្សែ​ការពារ Pepe ក្លាយ​ជាកីឡាករវ័យចំណាស់ទី១ ក្នុងប្រវត្តិសាស្រ្ដបាល់ទាត់អឺរ៉ូ ដែលមានបង្ហាញលើទីលាន ក្នុងវ័យ៤១ឆ្នាំនិង១១៣ថ្ងៃ នៅ​ជំនួបវគ្គសន្សំពិន្ទុក្នុងពូលរវាងក្រុមព័រទុយហ្គាល់ ជា​មួយ​​សាធារណរដ្ឋឆេក។ លោក​បានបំបែកកំណត់ត្រារបស់អតីតអ្នកចាំទីហុងគ្រី Király ​ដែល​មានវ័យ៤០ឆ្នាំនិង៨៦ថ្ងៃ ធ្លាប់ជា​កីឡាករចាស់ជាងគេក្នុងព្រឹត្តិការណ៍ជុំចុងក្រោយ ការប្រកួតរវាងហុងគ្រី ទល់​នឹង បែលហ្ស៊ិក វគ្គ១៦ក្រុមចុងក្រោយ កាល​ពីឆ្នាំ២០១៦។

ស្ថិតក្នុងវ័យ៤១ឆ្នាំ កីឡាករ Pepe បង្ហាញខ្លួនសរុបឲ្យក្រុមជម្រើសជាតិព័រទុយហ្គាល់បានចំនួន១៣៨លើក ហើយស៊ុតបញ្ចូលទី៨គ្រាប់ក្នុងនាមជាខ្សែការពារ។ ក្នុងការប្រកួតយប់មិញ​ កីឡាករ​នៅតែធ្វើបានល្អក្រោយបង្ហាញខ្លួនបាន៩០នាទីពេញនិងជួយ​ព័រទុយហ្គាល់ទទួលបាន៣ពិន្ទុ ក្រោយឈ្នះក្រុមឆេក ២-១។

បច្ចុប្បន្ន ព័រទុយហ្គាល់ កំពុងឈរលេខ២ ក្នុងពូល F។ ការប្រកួតបន្ទាប់ ពួកគេនឹងត្រូវជួបក្រុមតួកគី ដែលជាក្រុមឈរនៅលេខ១៕

ប្រែសម្រួល៖ ផា រតនា