EU និងលោក Zelensky ត្រៀមចុះហត្ថលេខាលើកិច្ចព្រមព្រៀងផ្ដល់ជំនួយយោធាបន្ថែម ដល់អ៊ុយក្រែន

តាមការចេញផ្សាយរបស់ទីភ្នាក់ពត៌មាន Reuters សហភាពអឺរ៉ុប នឹងចុះហត្ថលេខាលើកិច្ចព្រមព្រៀងសន្តិសុខជាមួយប្រធានាធិបតីអ៊ុយក្រែនលោក Volodymyr Zelensky នៅថ្ងៃព្រហស្បតិ៍នេះ ជាមួយការប្តេជ្ញាផ្តល់អាវុធបន្ថែម ការហ្វឹកហ្វឺនយោធា និងជំនួយផ្សេងទៀតដល់ទីក្រុងកៀវសម្រាប់ឆ្នាំខាងមុខ។

លោក ​Zelensky ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងនេះក្នុងកិច្ចប្រជុំកំពូលនៃមេដឹកនាំសហភាពអឺរ៉ុបនៅទីក្រុងព្រុចសែល ប្រទេសបែលហ្ស៊ិក ថ្វីបើដំណើរ​ទស្សនកិច្ច​របស់​លោក​មិន​ត្រូវ​បាន​គេ​ប្រកាស​ជា​ផ្លូវ​ការក៏ដោយ។

បើតាមគេដឹង កិច្ចព្រមព្រៀងនេះ បញ្ជាក់ពីការប្តេជ្ញាចិត្តរបស់អឺរ៉ុប ក្នុងការគាំទ្រអ៊ុយក្រែនក្នុងវិស័យសន្តិសុខ និងគោលនយោបាយការពារជាតិចំនួនប្រាំបួនចំណុច រួមទាំងការផ្តល់អាវុធ ការបណ្តុះបណ្តាលយោធា កិច្ចសហប្រតិបត្តិការឧស្សាហកម្មការពារជាតិ និងការដោះមីន ជាដើម។

កិច្ចព្រមព្រៀងនេះមានគោលបំណងបំពេញបន្ថែមលើកិច្ចព្រមព្រៀងស្រដៀងគ្នា ដែលបានចុះហត្ថលេខាពីមុន រវាងអ៊ុយក្រែន និងសម្ព័ន្ធមិត្តរបស់ខ្លួន ដើម្បីប្រឆាំងរុស្ស៊ី។ វាក៏ជាផ្នែកមួយនៃកិច្ចខិតខំប្រឹងប្រែងដោយសម្ព័ន្ធមិត្តរបស់អ៊ុយក្រែនក្នុងការផ្តល់ការធានាថា ពួកគេនឹងឈរជាបង្អែកប្រទេសនេះក្នុងរយៈពេលវែងឆ្ងាយទៅមុខទៀត។

គួរបញ្ជាក់ថា​ បណ្ដាប្រទេសសហភាពអឺរ៉ុបជាពិសេសអាមេរិក នៅតែបន្តផ្ដល់ជំនួយខាងយោធាដល់អ៊ុយក្រែន ឥតឈប់ឈរ ដើម្បីជួយទីក្រុងកៀវ ទប់ទល់ការវាយលុករបស់រុស្ស៊ី ដោយក្នុងជំនួយនីមួយៗចំណាយលុយរាប់លានដុល្លារ៕

អត្ថបទ៖ ប៊ុន សុភាព