អ៊ីស្រាអែល អនុម័តផែនការ សង់ផ្ទះថ្មីជិត ៥ ៣០០ខ្នង នៅ West Bank

តាមការចេញផ្សាយរបស់ទីភ្នាក់ងារពត៌មាន AP កាលពីថ្ងៃទី ០៤ ខែកក្កដា​ឆ្នាំ២០២៤, រដ្ឋាភិបាលអ៊ីស្រាអែល បានអនុម័តផែនការសង់ផ្ទះថ្មីជិត ៥ ៣០០ខ្នង នៅក្នុងតំបន់ West Bank ដែលនេះត្រូវបានគេមើលឃើញថា ជាយុទ្ធនាការពន្លឿននិងពង្រីកការតាំងទីលំនៅគ្រប់គ្រងដោយអ៊ីស្រាអែលលើទឹកដីប៉ាឡេស្ទីន និងទប់ស្កាត់ការបង្កើតរដ្ឋប៉ាឡេស្ទីននៅពេលអនាគត។

យោងតាមទីភ្នាក់ងារប្រឆាំងការតាំងទីលំនៅរបស់អ៊ីស្រាអែល Peace Now បានឲ្យដឹងថា រដ្ឋាភិបាលទីក្រុងហ្ស៊េរុយសាឡិម បានអនុម័តផែនការសង់ផ្ទះចំនួន ៥ ២៩៥ខ្នង នៅទីតាំងរាប់សិបទូទាំងតំបន់ West Bank ដែលអ៊ីស្រាអែលបានរឹបអូសយកដីនេះបានជាង ៣ ទសវត្សរ៍មកហើយ។ អ៊ីស្រាអែល ក៏នឹងប្រែក្លាយសង្កាត់ថ្មីចំនួន៣នៅក្នុងជ្រលងភ្នំ Jordan និងនៅជិតទីក្រុង Hebron ឲ្យក្លាយជារបស់ខ្លួនស្របច្បាប់ផងដែរ។

អ្នកវិភាគមួយចំនួនបានលើកឡើងថា យុទ្ធនាការពង្រីកលំនៅដ្ឋានយ៉ាងឆាប់រហ័សបែបនេះ គឺជាផ្នែកមួយនៃគោលបំណងរបស់អ៊ីស្រាអែលដើម្បីធានាថា រដ្ឋប៉ាឡេស្ទីនមិនអាចបង្កើតបាននោះទេ។

ស្របពេលជាមួយគ្នានេះ ក៏មានការប្រយុទ្ធគ្នាកាន់តែខ្លាំងឡើងផងដែរ រវាងអ៊ីស្រាអែល និងក្រុមហេសបូឡា ដោយកាលពីថ្ងៃព្រហស្បតិ៍ ចលនាសកម្មប្រយុទ្ធមានមូលដ្ឋាននៅប្រទេសលីបង់មួយនេះ បានបាញ់រ៉ុកកែតជាង ២០០ គ្រាប់ និងប្រើយន្តហោះគ្មានមនុស្សបើក វាយប្រហារភាគខាងជើងប្រទេសអ៊ីស្រាអែល ដើម្បីសងសឹកចំពោះការសម្លាប់មេបញ្ជាការជាន់ខ្ពស់ ក្រោមដៃអ៊ីស្រាអែល កាលពីប៉ុន្មានថ្ងៃមុន៕

អត្ថបទ៖ ប៊ុន សុភាព