ទីបំផុត ចូ បៃដិន ដកខ្លួនចេញ ហើយគាំទ្រ កាម៉ាឡា ហារីស ឲ្យទៅប្រកួតជាមួយ ដូណាល់ ត្រាំ 

តាមការចុះផ្សាយរបស់ CNN នៅថ្ងៃចន្ទទី២២ ខែកក្កដា ឆ្នាំ២០២៤, លោក ចូ បៃដិន បានប្រកាសដកខ្លួនចេញពីការឈរឈ្មោះជាបេក្ខជនគណបក្សប្រជាធិបតេយ្យ ទៅប្រកួតប្រជែងក្នុងការបោះឆ្នោតប្រធានាធិបតីខែវិច្ឆិកាហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះដែរ មេដឹកនាំវ័យ៨១ឆ្នាំរូបនេះ បានបង្ហាញការគាំទ្រយ៉ាងមុតមាំលើអនុប្រធានាធិបតី កាម៉ាឡា ហារីស ដើម្បីទៅតទល់ជាមួយបេក្ខជនខាងគណបក្សសាធារណរដ្ឋ។

ទោះយ៉ាងណាក្តី ត្បិតលោក បៃដិន ដកបេក្ខភាពក៏ពិតមែន ប៉ុន្តែលោកប្រកាសថា លោកនឹងបន្តកាន់តំណែងជាប្រធានាធិបតី ហើយបំពេញភារកិច្ចរហូតដល់ចប់អាណត្តិ។

ក្នុងសេចក្តីប្រកាសបង្ហោះលើបណ្តាញសង្គម X លោក បៃដិន សរសេរថា “វា​ជាមហា​កិត្តិយស ​ក្នុង​ជីវិត​របស់​ខ្ញុំ​ដែល​បាន​កាន់តំណែងជា​ប្រធានាធិបតី​របស់​អ្នក ហើយជាមួយចេតនាចង់ឈរឈ្មោះបោះឆ្នោតអាណត្តិថ្មី ខ្ញុំជឿថា ដើម្បីផលប្រយោជន៍ធំបំផុតរបស់បក្ស និងប្រទេសរបស់ខ្ញុំ ខ្ញុំត្រូវតែដកខ្លួន ហើយផ្តោតតែលើការបំពេញភារកិច្ចក្នុងជាប្រធានាធិបតី សម្រាប់ពេលវេលាដែលនៅសេសសល់នៃអាណត្តិរបស់ខ្ញុំបានហើយ”។

ក្រោយមកលោកក៏បានបង្ហោះទៀតថា “ថ្ងៃនេះ ខ្ញុំសូមផ្តល់ការគាំទ្រយ៉ាងពេញទំហឹងចំពោះលោកស្រី កាម៉ាឡា ឲ្យក្លាយជាបេក្ខភាពគណបក្សរបស់យើងនៅឆ្នាំនេះ។ អ្នកប្រជាធិបតេយ្យទាំងឡាយ! ដល់ពេលហើយដែលត្រូវរួមគ្នា ដើម្បីផ្តួល ត្រាំ”។

សូមបញ្ជាក់ថា ក្រោយលោក បៃដិន ដកខ្លួន, គណបក្សប្រជាធិបតេយ្យនឹងត្រូវជ្រើសរើសបេក្ខជនថ្មី ហើយការ​សម្រេច​ចិត្ត ​នឹង​ត្រូវបោះឆ្នោត​ដោយ​ប្រតិភូ​ប្រហែល ៤ ៧០០នាក់អំឡុងសមាជបក្សក្នុងទីក្រុងឈីកាហ្គោ ដែលចាប់ផ្តើមនៅថ្ងៃទី១៩ខែសីហា ។

មិនត្រឹមប៉ុណ្ណឹង ប្រតិភូក៏នឹងអាចធ្វើការសម្រេចចិត្តតាមរយៈ Video Call ដែលគ្រោងធ្វើឡើងនៅដើមខែសីហាខាងមុខផងដែរ៕

អត្ថបទ៖ សុខ សុវណ្ណ

ចុចអាន៖ លោក ចូ បៃដិន ​ថា​ សុខចិត្តបោះបង់អំណាច​នៅពាក់​កណ្តាលអាណត្តិ​​ឱ្យ​អនុប្រធានាធិបតី កាម៉ាឡា ហារីស