ព័ត៌មានជាតិ

កំណាត់ផ្លូវមួយចំនួនក្នុងភូមិសាស្ត្ររាជធានីភ្នំពេញ នៅបន្តជន់លិច ដោយសារភ្លៀងធ្លាក់ ១ មេយ៉ាងធំ កាលពីយប់មិញ

បានផុស

១១ ខែ មុន

នៅ

ថ្ងៃសុក្រ ៩ សីហា ២០២៤

ដោយ

តាមបណ្ដាញសង្គមសង្កេតឃើញប្រជាពលរដ្ឋអ្នកធ្វើដំណើរ បានបង្ហោះជាសាធារណៈថា កំណាត់ផ្លូវមួយចំនួនដែលជាតំបន់ទាប ក្នុងភូមិសាស្ត្ររាជធានីភ្នំពេញ នៅបន្តជន់លិច មិនទាន់ស្រកអស់ទឹកនៅឡើយទេ ដោយសារតែកាលពីយប់ថ្ងៃទី ០៨ ខែសីហា ឆ្នាំ ២០២៤ មានភ្លៀងធ្លាក់យ៉ាងខ្លាំង បណ្ដាលឲ្យគ្រប់ផ្លូវមានការជន់លិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីព្រឹកថ្ងៃទី ០៩ ខែសីហា ឆ្នាំ ២០២៤ នៅកំណាត់ផ្លូវលេខ ១៩៨៦ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ប្រជាពលរដ្ឋអ្នកធ្វើដំណើរឆ្លងកាត់តំបន់នេះ ត្រូវរងការជន់លិចយ៉ាងខ្លាំង ដោយជំនន់ទឹកភ្លៀងមិនទាន់បង្ហូរចូលទៅតាមប្រព័ន្ធលូអស់នោះទេ។

លោក ស្នា ប្រជាពលរដ្ឋអ្នកធ្វើដំណើរឆ្លងកាត់តំបន់ផ្លូវលេខ ១៩៨៦ លើកឡើងថា កំណាត់ផ្លូវនេះ តែងតែលិចជាប់ជាប្រចាំ ប្រហែលជាតំបន់ទាបជាងគេ និងលំហូរ នៃទឹកពីតំបន់ខ្ពស់ៗ ហូរចូលមកតំបន់ផ្លូវនេះ ទើបធ្វើឲ្យផ្លូវលេខ ១៩៨៦ បន្ទាប់ពីភ្លៀងរួច ២ ទៅ ៣ ថ្ងៃ ទើបស្រកទឹកអស់វិញ។

សូមបញ្ជាក់ថា បច្ចុប្បន្ន រាជរដ្ឋាភិបាល ក៏ដូចជាមន្ទីរសាធារណការ និងដឹកជញ្ជូនរាជធានីភ្នំពេញ បានបន្តយកចិត្តទុកដាក់យ៉ាងខ្លាំង និងកំពុងមមាញឹកផងដែរ គ្រប់បណ្ដាមូលដ្ឋានខណ្ឌមួយចំនួនក្នុងរាជធានីភ្នំពេញ ក្នុងការស្ដារប្រឡាយ ប្ដូរប្រព័ន្ធលូជាដើម ដើម្បីកាត់បន្ថយការជន់លិចពេលមានភ្លៀងធ្លាក់ៗ ម្ដង។ ប៉ុន្តែនៅចំណុចកំណាត់ផ្លូវលេខ ១៩៨៦ នោះ ក៏មានប្រឡាយមួយខ្សែផងដែរ តែមិនឃើញមានការស្ដារប្រឡាយឲ្យមានចរន្តលំហូរទឹកឲ្យបានទាន់ពេលវេលានោះទេ។

ប្រជាពលរដ្ឋ បានសំណូមពរដល់អាជ្ញាធរពាក់ព័ន្ធ គួរមានវិធានការ ឬ មានការផ្លាស់ប្ដូរប្រព័ន្ធលូ ឲ្យបានមុខកាត់ធំជាង ឬ ស្ដារប្រឡាយឲ្យមានបរិមាណអាចផ្ទុកទឹកបាន ទើបអាចរំដោះជំនន់ទឹកភ្លៀងបានលឿនជាងនេះ៕

អត្ថបទ ៖ សុភា