ព័ត៌មានជាតិ

ខេត្តរតនគិរី កំពុងខ្វះខាតកម្លាំងពលកម្មរាប់ម៉ឺននាក់បម្រើដល់វិស័យកសិកម្ម

បានផុស

២ years មុន

នៅ

ថ្ងៃអង្គារ ១៣ សីហា ២០២៤

ដោយ

ការរីកចម្រើនជាបន្តបន្ទាប់ផ្នែកហេដ្ឋារចនាសម្ព័ន្ធ រួមទាំងការវិនិយោគផ្សេងៗបានធ្វើឱ្យខេត្តរតនគិរីមានកង្វះខាតកម្លាំងពលកម្មជារាប់ម៉ឹននាក់ជាពិសេសផ្នែកវិស័យកសិកម្ម។ នេះបើតាមការគូសបញ្ជាក់របស់លោក ញ៉ែម សំអឿន អភិបាលនៃគណៈអភិបាលខេត្តរតនគិរី។

ក្នុងបទសម្ភាសពិសេសជាមួយ «កម្ពុជាថ្មី» លោក ញ៉ែម សំអឿន បានលើកឡើងថា ក្រៅពីការវិនិយោគផ្នែកហេដ្ឋារចនាសម្ព័ន្ធដែលជាការវិនិយោគសាធារណៈ ក៏មានការវិនិយោគជាច្រើនទៀតដែលបច្ចុប្បន្នមានដល់ ២៧ក្រុមហ៊ុន កំពុងវិនិយោគផ្នែកកសិកម្ម និងបានស្រូបទាញកម្លាំងពលកម្មក្នុងខេត្តជាង ១ ម៉ឺននាក់។

លោក ញ៉ែម សំអឿន បានបញ្ជាក់យ៉ាងដូច្នេះថា «ឥឡូវនេះបញ្ហាដែលធ្ងន់បំផុតមួយ គឺកង្វះខាតកម្លាំងពលកម្មដែលបម្រើឱ្យវិស័យកសិកម្ម។ ដូចជាក្រុមហ៊ុន ថាក់កូ អាលគ្រី ដែលវិនិយោគលើវិស័យកសិកម្មដូចជា ចេកអំបូងលឿង ការចិញ្ចឹមសត្វ និងផលិតផលកសិកម្មជាច្រើនទៀត ទាមទារកម្លាំងពលករដល់ទៅ ៥ ពាន់នាក់ ដើម្បីចូលបម្រើការងារនៅក្នុងក្រុមហ៊ុន ដោយទទួលបានប្រាក់កម្រៃក្នុងមួយខែមិនក្រោម ១លានរៀលឡើយ»។

លោកញ៉ែម សំអឿន បានបន្តទៀតថា ក្រុមហ៊ុនទាំង ២៧ ដែលកំពុងវិនិយោគក្នុងខេត្តរតនគិរីនាពេលបច្ចុប្បន្ននេះ គឺផ្តោតសំខាន់ទៅលើដំណាំកៅស៊ូ។ សព្វថ្ងៃចម្ការកៅស៊ូ ក្នុងខេត្តមានដល់ ៧ ម៉ឺនហិតា ហេតុដូចនេះនៅពេលខាងមុខ ប្រសិនបើឈានដល់ពេលប្រមូលផលកៅស៊ូ ក៏យើងអាចប្រឈមនឹងការខ្វះកម្លាំងកម្មករដូចគ្នាដែរ។ បន្ថែមពីនេះ ខេត្តរតនគិរី ក៏មានដំណាំស្វាយចន្ទីជាង ៦ ម៉ឺនហិតា ដំឡូងមីជាង ២ ម៉ឺនហិតា ដែលសុទ្ធសឹងតែស្រូបទាញកម្លាំងពលកម្មនៅក្នុងខេត្ត៕