លោក ដួង វីរ័ត្ន ក្រើនរំលឹកដល់អង្គការសង្គមស៊ីវិល​ កុំឱ្យជឿតាមការញុះញង់របស់ជនអគតិពាក់ព័ន្ធនឹង CLV-DTA

មានប្រសាសន៍ក្នុងវេទិកាសន្ទនាជាមួយអង្គការសង្គមស៊ីវិល នៅខេត្តប៉ៃលិន​ លោក ដួង វីរ័ត្ន អនុប្រធានក្រុមប្រឹក្សាភិបាល វ.ស.ស បានក្រើនរំលឹកដល់អង្គការសង្គមស៊ីវិល កុំឱ្យមានការភាន់ច្រឡំជឿតាមការញុះញង់ ពីសំណាក់មជ្ឈដ្ឋានអគតិពាក់ព័ន្ធនឹងតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA)។ ការក្រើនរំលឹកនេះ ធ្វើឡើងនាព្រឹកថ្ងៃទី១៦ ខែសីហា ឆ្នាំ២០២៤ នៅរីស័ត ប៉ែប៉ូរីយ៉ាលផាលែស ស្ថិតក្នុងភូមិបរយ៉ាខា សង្កាត់បរយ៉ាខា ក្រុងប៉ៃលិន ខេត្តប៉ៃលិន។

ថ្លែងក្នុងកិច្ចពិភាក្សានេះ លោក ដួង វីរ័ត្ន អនុប្រធានក្រុមប្រឹក្សាភិបាល វ.ស.ស  តំណាងលោក កឹមរ័ត្ន វិសិដ្ឋ ប្រធានក្រុមប្រឹក្សាភិបាល វ ស ស បានក្រើនរំលឹកដល់អង្គការសង្គមស៊ីវិលទាំងអស់ ឱ្យបានយល់ជ្រួតជ្រាប អំពីការខិតខំប្រឹង របស់រាជរដ្ឋាភិបាល ក្នុងការអភិវឌ្ឍន៍សង្គមជាតិ ជាពិសេសគឺការអនុវត្តយុទ្ធសាស្រ្តបញ្ចកោណដំណាក់កាលទី១ សំដៅនាំកម្ពុជាសម្រេចបានចក្ខុវិស័យឆ្នាំ២០៣០ និង២០៥០។

លោកបានគូសបញ្ជាក់ថា ជានិច្ចជាកាល រាជរដ្ឋាភិបាល ក្រោមការដឹកនាំប្រកបដោយភាពក្លៀវក្លា និងវាងវៃ របស់សម្តេចមហាបវរធិបតី ហ៊ុន ម៉ាណែត នៅតែបន្តយកចិត្តទុកដាក់ និងផ្តល់សារសំខាន់ដល់តួនាទីរបស់អង្គការសង្គមស៊ីវិលដែលជាដៃគូដ៏សំខាន់ និងវាយតម្លៃខ្ពស់ចំពោះការចូលរួមចំណែក របស់អង្គការសង្គមស៊ីវិលជាមួយរាជរដ្ឋាភិបាល ក្នុងការអភិវឌ្ឍសេដ្ឋកិច្ច និងសង្គម។ រាជរដ្ឋាភិបាលតែងតែបង្កឱ្យមានលំហបរិយាកាសសេរី និងបើកចំហរដល់អង្គការសង្គមស៊ីវិល អាចធ្វើសកម្មភាពទៅតាមតួនាទី និងភារកិច្ចរៀងៗខ្លួន។

ជាមួយគ្នានេះ លោកបានអំពាវនាវកុំឱ្យមានការភាន់ច្រឡំជឿតាមការញុះញង់ ពីសំណាក់មជ្ឈដ្ឋានអគតិពាក់ព័ន្ធនឹងតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) ដែលនេះជាក្របខ័ណ្ឌសហប្រតិបត្តិការរវាងប្រទេសទាំងបី ក្នុងគោលបំណងសំខាន់តែមួយគត់គឺ ដើម្បីជំរុញការអភិវឌ្ឍ និងលើកកម្ពស់ជីវភាព របស់ប្រជាពលរដ្ឋនៅតាមតំបន់ជាប់ព្រំដែន របស់ប្រទេសទាំង ៣ដូចប្រសាសន៍ដ៏ក្បោះក្បាយ និងមានអត្ថន័យថ្លៃថ្លារបស់ សម្តេចតេជោ ហ៊ុន សែន ប្រធានព្រឹទ្ធសភា ក្នុងសេចក្តីថ្លែងការណ៍ពិសេសផ្ញើជូនជនរួមជាតិកាលពី ថ្ងៃទី២៣ ខែកក្កដា ឆ្នាំ២០២៤។

ចំណែក លោក សោ សុវណ្ណ អភិបាលរងខេត្តប៉ៃលិន បានផ្តាំផ្ញើអង្គការសង្គមស៊ីវិល បន្តធ្វើសកម្មភាព របស់ខ្លួន ប្រកបដោយភាពស្មោះត្រង់ ក្នុងកិច្ចសហការជាមួយក្រសួង-ស្ថាប័ន និងអាជ្ញាធរថ្នាក់ក្រោមជាតិ ក្នុងការអនុវត្តសកម្មភាពរបស់ខ្លួន ដោយគោរពតាមគោលការណ៍ច្បាប់ និងលិខិតបទដ្ឋានគតិយុត្តជាធរមាន និងលក្ខន្តិកៈរបស់ខ្លួន។​ បន្ថែមពីនេះ លោកអភិបាលរងខេត្ត ក៍បានលើកទឹកចិត្តឱ្យអង្គការសង្គមស៊ីវិល ជួយពន្យល់ណែនាំដល់ប្រជាជន ជាពិសេសយុវជននៅក្នុងដែនប្រតិបត្តិការងាររបស់គាត់ ឱ្យបានយល់ជ្រួតជ្រាបផងដែរ ជៀសវាងការយល់ភាន់ច្រឡំជឿតាមការឃោសនាអកុសលរបស់ជនអគតិ៕

អត្ថបទ៖ សេង សុវណ្ណារិទ្ធ