មើមរំដេងកំពុងមានទីផ្សារល្អ សម្រាប់អ្នកធ្វើណែមត្រី និងសង្វាក់

បច្ចុប្បន្នគេសង្កេតឃើញថាមើមរំដេងកំពុងមានទីផ្សារយ៉ាងល្អប្រសើរដែលមួយថ្ងៃៗ មានក្រុមឈ្មួញមកចាំដឹកទាំង​ឡានៗ ទៅដាក់ឱ្យអ្នកដែលផលិតណែមត្រី និងសង្វាក់ ដែលអាហារប្រភេទនេះ គឺចាំបាច់ត្រូវប្រើមើមរំដេងមិនអាចខ្វះបានឡើយ។

លោក ចាន់ ផល្លា ជាអ្នកប្រកបមុខរបរទិញរំដេងពិទីផ្សារ ទាំងពីរនាក់ប្ដីប្រពន្ធដឹកយកទៅបោះឲ្យម៉ូយដែលជាអ្នកផលិត​ណែមត្រី និងសង្វាក់ បានបញ្ជាក់ថា ប្រភពមើមរំដេងភាគច្រើនគឺចេញមកពីស្រុកបាណន់ និងតំបន់អក្សរតេ ដែលនៅស្រុកលើនេះ គឺគេសម្បូរដាំចម្ការធំៗដើម្បីគាស់យកមកលក់នៅលើទីផ្សារ។

លោកបានបន្តថា សព្វថ្ងៃលោក និងភរិយា គឺជាឈ្មួញកណ្ដាល ដែលមានម៉ូយយកមកលើកឲ្យលោកនៅក្នុងទីផ្សារកណ្ដាលក្រុងបាត់ដំបង ហើយលោកក៏មានម៉ូយជាច្រើនទៀតដែលជាអ្នកផលិតណែមត្រី និងសង្វាក់ នៅឯក្រោម ដូចជានៅភូមិស្ដីក្រោម ស្ដីលើ ព្រែកហ្លួង ព្រែកខ្ពប និងដូនទាវជាដើម ដែលអ្នកផលិតទាំងនោះចាំបាច់ត្រូវប្រើរំដេង ដោយខានមិនបានសម្រាប់កាត់ឆ្អាប ហើយអ្នកផលិតទាំងនោះមិនត្រឹមតែទិញរំដេងពីលោកប៉ុណ្ណោះទេ គឺត្រូវឱ្យលោកនាំទៅជាមួយនូវ ម្ទេសដៃនាងខ្ចីៗផងដែរដើម្បីដាក់បង្កប់នៅក្នុងណែមត្រីទាំងនោះ។

ដោយឡែកសម្រាប់តម្លៃដែលលោកលើកពីម៉ូយបន្ត គឺទិញក្នុងតម្លៃចាប់ពី ២.០០០រៀល ទៅ ២.៥០០រៀល ក្នុងមួយគីឡូក្រាម ហើយពេលបោះឲ្យម៉ូយលោកក៏បានកម្រៃបន្តិចបន្តួចបន្ថែមទៀត ដែលអាចទប់ទល់ជីវភាពប្រចាំថ្ងៃរបស់គ្រួសារលោកបាន ព្រោះម៉ូយដែលជាអ្នកផលិតណែមត្រី និងសង្វាក់គេត្រូវការរាល់ថ្ងៃព្រោះអ្នកផលិតមានច្រើនកន្លែងណាស់។ តែបើតម្លៃរំដេង នៅក្នុងទីផ្សារសព្វថ្ងៃសម្រាប់អ្នកអង្គុយលក់រាយអាចបានចន្លោះពី ៤.០០០ ទៅ ៥.០០០ រៀល ក្នុងមួយគីឡូក្រាម។

ដោយឡែកអ្នកស្រី វឿង គន្ធា រស់នៅភូមិព្រែកហ្លួង ឃុំព្រែកហ្លួង ស្រុកឯកភ្នំ ដែលប្រកបមុខរបរផលិតណែមត្រី និងសង្វាក់ ជាយូរឆ្នាំមកហើយនោះបានរៀបរាប់ថា កាលពីដើមឡើយប្រភេទណែមត្រី និងសង្វាក់នេះ គេធ្វើឡើងអំពីសាច់ត្រីរ៉ស់ ប៉ុន្តែក្រោយមកដោយសារមានការពិបាកក្នុងការរកត្រីរ៉ស់មកប្រើប្រាស់ ទើបគេប្ដូរទៅយកសាច់ត្រីត្រសក់ដែលនាំចូលពីប្រទេសថៃវិញ។ ថ្វីត្បិតតែត្រីត្រសក់សំបូរឆ្អឹងតូចៗ នៅក្នុងសាច់ត្រីក៏ដោយក៏ប៉ុន្តែយើងអាចយកវាមកកិនកំទេចឆ្អឹងទាំងនោះបាន ដោយការផលិតប្រភេទណែមត្រី និងសង្វាក់នេះ​ គឺចាំបាច់ត្រូវប្រើមើមរំដេងដោយខានមិនបានដើម្បីជួយបន្សាបជាតិឆ្អាបរបស់ត្រី។

អ្នកស្រីបានបន្តថា រាល់ថ្ងៃបានម៉ូយដឹកឡានទាំងរំដេង និងម្ទេសខ្ចី យកមកដល់ផ្ទះដោយយើងមិនចាំបាច់ធ្វើដំណើរទៅទិញនៅឯផ្សារឡើយ បើទោះបីជាតម្លៃខុសគ្នាបន្តិចបន្តួចក៏ដោយ តែយើងអាចចំណេញពេលវេលាបានច្រើន ដូច្នេះការផលិតណែមត្រី និងសង្វាក់ គឺមិនអាចខ្វះបានឡើយនូវប្រភេទមើម “រំដេង”នេះ៕

អត្ថបទ៖ សោ និយមរ័ត្ន