ព័ត៌មានអន្ដរជាតិ

ត្រឹម១សប្ដាហ៍ កូរ៉េខាងជើងសាកល្បងការបាញ់២លើកមានទាំងរ៉ុកកែត និងដ្រូនអត្តឃាត

បានផុស

២ years មុន

នៅ

ថ្ងៃពុធ ២៨ សីហា ២០២៤

ដោយ

Chheang

យោងតាមការចុះផ្សាយរបស់ទីភ្នាក់ងារព័ត៌មានរដ្ឋ KCNA នៅថ្ងៃទី២៨ខែសីហានេះ រដ្ឋាភិបាលក្រុងព្យុងយ៉ាងបានបាញ់សាកល្បងប្រព័ន្ធគ្រាប់រ៉ុកកែតប្រវែង២៤០មិល្លិម៉ែត្របំពាក់បច្ចេកវិទ្យាស្វ័យប្រវត្តិថ្មី ដោយមានការចូលរួមត្រួតពិនិត្យដោយផ្ទាល់ពីមេដឹកនាំកូរ៉េខាងជើង លោក គីម ជុងអ៊ុន (Kim Jong Un)។ ការតេស្តប្រព័ន្ធរ៉ុកកែតថ្មីនេះ ធ្វើឡើងមិនបានប៉ុន្មានថ្ងៃផងបន្ទាប់ពីកូរ៉េខាងជើងកាលពីដើមសប្ដាហ៍បានសាកល្បងនូវប្រភេទដ្រូនអត្តឃាតថ្មីរបស់ខ្លួនដោយជោគជ័យ។

លោក គីម ជុងអ៊ុន កំពុងអង្កេតការណ៍ការបាញ់សាកល្បងសព្វាវុធរបស់ខ្លួន (រូបភាព៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

KCNA បានផ្សាយថា គ្រាប់រ៉ុកកែតដែលបាញ់សាកល្បង បានធ្វើបច្ចុប្បន្នភាពបច្ចេកទេសនៅក្នុងភាពបត់បែន និងសមត្ថភាពបាញ់កំណត់គោលដៅ ក៏ដូចជាការបំពាក់ប្រព័ន្ធស្វ័យប្រវត្តិថ្មី និងទំហំថាមពលវាយប្រហារដ៏ខ្លាំងក្លា។

នៅឯការបាញ់សាកល្បង លោក គីម ជុងអ៊ុន បាន «ដាក់ចេញនូវគោលនយោបាយដ៏សំខាន់មួយ ដែលត្រូវអនុវត្តក្នុងការផលិតកាំភ្លើងធំថ្មី និងបំពាក់វានៅក្នុងអង្គភាពកងទ័ព»។

កាលពីដើមសប្ដាហ៍ របាយការណ៍របស់ KCNA បានបង្ហាញផងដែរថា ក្រុងព្យុងយ៉ាងបានតេស្តដ្រូនអត្តឃាតរបស់ខ្លួនដោយជោគជ័យ ហើយលោក គីម បានជំរុញឲ្យក្រុមអ្នកស្រាវជ្រាវអភិវឌ្ឍដ្រូនប្រភេទនេះឲ្យបានកាន់តែច្រើនថែមទៀត ដោយចាត់ទុកវាគឺជារឿងចាំបាច់ក្នុងការត្រៀមខ្លួនសម្រាប់ព្រឹត្តិការណ៍សង្គ្រាម ដើម្បីប្រើប្រាស់នៅក្នុងកងពលថ្មើរជើងយុទ្ធសាស្ត្រ និងអង្គភាពប្រតិបត្តិការពិសេស។

កាលពីខែកុម្ភៈ កូរ៉េខាងជើង ធ្លាប់បានប្រកាសថា ខ្លួននឹងបំពាក់ប្រព័ន្ធបាញ់គ្រាប់រ៉ុកកែតប្រភេទ២៤០មិល្លិម៉ែត្រឲ្យកងកម្លាំងយោធារបស់ខ្លួន ដែលរ៉ុកកែតទាំងនេះនឹងមានសមត្ថភាពវាយប្រហារដល់ទីក្រុងសេអ៊ូល និងតំបន់ក្បែរនោះ។

ចំណែកឯនៅក្នុងខែឧសភា កូរ៉េខាងជើង បានប្រកាសថា គ្រាប់រ៉ុកកែតដែលបានធ្វើបច្ចុប្បន្នភាព នឹងត្រូវបានដាក់ពង្រាយទៅកាន់អង្គភាពនៃកងទ័ពប្រជាជនកូរ៉េ សម្រាប់ប្រើប្រាស់ចាប់ពីឆ្នាំ២០២៤ដល់ឆ្នាំ២០២៦។

លោក គីម ជុងអ៊ុន ចុះត្រួតពិនិត្យដ្រូនថ្មីរបស់កូរ៉េខាងជើង (រូបភាព៖ Rodong Sinmun)

ភាពតានតឹងរវាងកូរ៉េខាងជើងនិងកូរ៉េខាងត្បូង

កូរ៉េខាងជើង និង រុស្ស៊ី បានពង្រឹងទំនាក់ទំនងយោធាកាន់តែស៊ីជម្រៅកាលពីឆ្នាំមុន ហើយមន្ត្រីអាមេរិក និងកូរ៉េខាងត្បូង បានចោទប្រកាន់ទីក្រុងព្យុងយ៉ាងថាបានជួយរុស្ស៊ីក្នុងសង្គ្រាមនៅអ៊ុយក្រែន។

រដ្ឋមន្ត្រីក្រសួងការពារជាតិកូរ៉េខាងត្បូង លោក Shin Won-sik បានប្រាប់ទីភ្នាក់ងារព័ត៌មាន Reuters ថា ទីក្រុងព្យុងយ៉ាងបានបញ្ជូនគ្រាប់កាំភ្លើង និងមីស៊ីលរយៈចម្ងាយខ្លីចំនួន ១២ ០០០កុងតឺន័រ ទៅកាន់ប្រទេសរុស្ស៊ីគិតចាប់ពីឆ្នាំ២០២៣រហូតដល់ថ្ងៃទី៤ខែសីហានេះ។

យ៉ាងណា ទាំងរុស្ស៊ី និងកូរ៉េខាងជើងបានបដិសេធការចោទប្រកាន់អំពីការជួញដូរអាវុធនេះ។

ទំនាក់ទំនងរវាងទីក្រុងសេអ៊ូល និងទីក្រុងព្យុងយ៉ាង បានស្ថិតក្នុងកម្រិតទាបមួយនាពេលបច្ចុប្បន្ន ដោយទីក្រុងព្យុងយ៉ាងបានប្រកាសថាកូរ៉េខាងត្បូងជា «សត្រូវដ៏សំខាន់» របស់ខ្លួន។

កូរ៉េខាងជើងបានគំរាមកំហែងធ្វើសង្គ្រាម និងសងសឹក ឲ្យតែមានការឈ្លានពានពីកូរ៉េខាងត្បូង ទោះនោះជាការឈ្លានពានតិចតួចបែបណាក៏ដោយ។

អាមេរិក និងកូរ៉េខាងត្បូងបច្ចុប្បន្នកំពុងធ្វើសមយុទ្ធយោធារួមដ៏ធំប្រចាំឆ្នាំរបស់ពួកគេ ដែលនឹងត្រៀមបញ្ចប់នៅថ្ងៃទី២៩ខែសីហា៕

ដោយ៖ ឈាង

Related Topics:ប្រទេសកូរ៉េខាងជើង