ព័ត៌មានជាតិ

អភិបាលខណ្ឌឫស្សីកែវ ចុះត្រួតពិនិត្យ និងសួរសុខទុក្ខពលរដ្ឋរងផលប៉ះពាល់ដោយជំនន់ទឹកភ្លៀង ក្នុងសង្កាត់ចំនួន ០៣

បានផុស

២ years មុន

នៅ

ថ្ងៃព្រហស្បតិ៍ ១០ តុលា ២០២៤

ដោយ

អភិបាលខណ្ឌឫស្សីកែវ បានដឹកនាំមន្ត្រីក្រោមឱវាទ ចុះសួរសុខទុក្ខប្រជាពលរដ្ឋដែលរងការជន់លិចដោយជំនន់ទឹកភ្លៀង ក្នុងសង្កាត់ចំនួន ០៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនៅព្រឹកថ្ងៃទី ១០ ខែតុលា ឆ្នាំ ២០២៤ នេះ ក្នុងភូមិសាស្ត្រ នៃខណ្ឌឫស្សីកែវ មួយចំនួន ក៏ត្រូវបានជន់លិចដោយជំនន់ទឹកភ្លៀង ក្នុងនោះមានភូមិឃ្លាំងសាំង ភូមិបឹងសាឡាង ស្ថិតក្នុងសង្កាត់ឫស្សីកែវ និងភូមិចុងខ្សាច់ សង្កាត់ទួលសង្កែទី ០១ ភូមិស្វាយប៉ាក សង្កាត់ស្វាយប៉ាក។

លោក ជិន ប៊ុនធឿន អភិបាលខណ្ឌឫស្សីកែវ បានឲ្យដឹងថា ដោយទទួលបទបញ្ជាពី លោក ឃួង ស្រេង អភិបាលរាជធានីភ្នំពេញ មើលឃើញពីស្ថានភាពភ្លៀងធ្លាក់ជាបន្តបន្ទាប់គ្របដណ្ដប់លើភូមិសាស្ត្រខណ្ឌឫស្សីកែវទាំងមូល លោកបានបន្តដឹកនាំកម្លាំងជួយអន្តរាគមន៍បូមរំដោះទឹកដែលបាននិងកំពុងជន់លិច និងចុះសួរសុខទុក្ខពលរដ្ឋរងផលប៉ះពាល់ ជាពិសេសអ្នកប្រកបអាជីវកម្ម និងអ្នករស់នៅក្នុងតំបន់។

លោកអភិបាលខណ្ឌ បន្តទៀតថា ជំនន់ទឹកភ្លៀងដែលជន់លិចនេះ មួយផ្នែកគឺមកពីបរិមាណទឹក នៅព្រែកបាក់ទូក និងព្រែកអូរវែង ពេញព្រៀប ដែលប្រព័ន្ធព្រែកទាំងពីរនេះ មិនត្រឹមទទួលតែបរិមាណទឹកក្នុងមូលដ្ឋានខណ្ឌឫស្សីកែវតែប៉ុណ្ណោះទេ ថែមទាំងទទួលទឹកទម្លាក់យ៉ាងគំហុកមកពីខណ្ឌចំនួន ០៥ ផ្សេងទៀត តាមរយៈស្ថានីយបូមទឹកទំនប់ទួលគោក ទើបបង្កឲ្យមានការជន់លិចនៅតាមតំបន់មួយចំនួនក្នុងខណ្ឌឫស្សីកែវ។

ជាមួយគ្នានេះ លោកអភិបាលខណ្ឌ បានអំពាវនាវដល់ប្រជាពលរដ្ឋដែលរស់នៅក្នុងមូលដ្ឋាន សូមមេត្តាជួយយោគយល់ និងអធ្យាស្រ័យចំពោះផលប៉ះពាល់ទាំងអស់នេះ ព្រោះអាជ្ញាធរកំពុងពន្លឿនលើការបូមរំដោះទឹកកុំឲ្យរងការជន់លិចនេះហើយ៕

អត្ថបទ ៖ រដ្ឋា