​ដើម្បីបំណងប្រាថ្នា ស្រ្តីចិនវ័យ ៧០ ឆ្នាំ​​ សម្រេចចិត្តមិនរៀបការ យកឡានធ្វើផ្ទះអស់​ពេល ៩ ឆ្នាំ

ស្រ្តីជនជាតិចិនឈ្មោះថា Zhang Huixin កើតនៅឆ្នាំ ១៩៥៤ ទោះបីជានាងតែងតែមានចំណង់ចំណូលចិត្តខាងវិទ្យាសាស្ត្រ និងបច្ចេកវិទ្យាក៏ដោយ ដោយសារតែកាលៈទេសៈនាងត្រូវបង្ខំចិត្តឈប់រៀន ហើយទៅធ្វើការនៅវាលស្រែដើម្បីចិញ្ចឹមជីវិត។ បន្ទាប់ពីជួបការលំបាកជាច្រើនឆ្នាំ នាងបានដឹងថានាងត្រូវតែសិក្សាបន្ថែមទៀត។

យ៉ាងណា នៅអាយុ ២២ឆ្នាំ នាងបានសម្រេចចិត្តចុះឈ្មោះប្រឡងចូលសាកលវិទ្យាល័យ ប៉ុន្តែលទ្ធផលមិនដូចការរំពឹងទុក។ នាងបានជ្រើសរើសសិក្សានៅសាលាមធ្យមសិក្សាបច្ចេកទេសធម្មតាក្នុងទីក្រុងសៀងហៃ ដោយនៅតែ​សង្ឃឹម​ថា​នឹង​អាច​ឆ្លង​កាត់​ការ​ចូល​រៀន​នៅ​សកលវិទ្យាល័យ​នៅ​ពេល​អនាគត។ ឪពុកម្តាយរបស់នាងគ្រាន់តែចង់ឲ្យកូនស្រីរបស់ខ្លួនរៀនចប់វិទ្យាល័យ ស្វែងរកការងារធ្វើ រៀបការ និងតាំងទីលំនៅច្បាស់លាស។

ក្រោយមក ដោយសារតែជីវិត​ដ៏​លំបាកបាន​ធ្វើ​ឲ្យនាង​នៅ​ទី​បំផុត​បាន​ស្តាប់​ដំបូន្មាន​របស់​ឪពុក​ម្តាយ​​ និង​ស្វែងរក​ការងារ​ដែល​មាន​ស្ថិរភាព ។ នាងបានក្លាយជាគ្រូបង្រៀននៅជនបទ តែការ​បង្រៀន​ពីមួយថ្ងៃ​ទៅមួយថ្ងៃ​ជាមួយនឹង​ផែនការ​មេរៀន​ដដែល​បាន​ធ្វើ​ឲ្យនាង​ធុញទ្រាន់​។ នាង​បាន​ដឹង​ថា​ជីវិត​ត្រូវ​បាន​បង្ខាំង​នៅ​ទី​ជនបទ​តូច​យូរ​ពេក។ ឪពុកម្តាយរបស់នាងបានបន្តជំរុញឲ្យរៀបការ និងផ្គូរផ្គងកូនស្រីជាមួយមនុស្សជាច្រើន។ ដោយ​សារ​​មិន​ចង់​រៀប​ការ នាង​បាន​សម្រេច​ចិត្ត​ដោយ​ខ្លួន​ឯង។ នៅអាយុ ៣០ ឆ្នាំ​ នាងបានដាក់ពាក្យសុំផ្ទេរទៅសាកលវិទ្យាល័យ East China Normal សម្រាប់ការអប់រំខ្ពស់។

អស់រយៈពេល ៥ ឆ្នាំ បន្ទាប់ពីការបង្រៀនរៀងរាល់ម៉ោង​នាងតែងតែជិះឡានក្រុងទៅសាកលវិទ្យាល័យដើម្បីរៀនបន្ថែម។ ដូចនោះ អ្នកស្រី Zhang Huixin បានទទួលបរិញ្ញាបត្រនៅអាយុ ៣៥ ឆ្នាំ។ នាងតែងតែចង់ធ្វើអ្វីមួយដែលមានន័យក្នុងជីវិតរបស់នាង។

នៅចុងឆ្នាំ ១៩៩០ នាងបានធ្វើការសម្រេចចិត្តដែលធ្វើឲ្យមនុស្សគ្រប់គ្នាភ្ញាក់ផ្អើល ដោយបានបោះបង់ការងារជាគ្រូបង្រៀន ដើម្បីក្លាយជាភ្នាក់ងារធានារ៉ាប់រង។ ទោះ​បី​ជា​ត្រូវ​បាន​ឪពុក​ម្តាយមិនពេញចិត្តក៏​ដោយ ក៏ Zhang នៅ​តែ​សម្រេច​ចិត្ត​ធ្វើ​អ្វី​ដែល​ខ្លួនចង់​បាន។ នាងបានក្លាយជាបុគ្គលិកល្អ និងជោគជ័យ ដែលមនុស្សជាច្រើនជឿជាក់លើវិស័យធានារ៉ាប់រង។ ក្នុងរយៈពេលត្រឹមតែ២ ឆ្នាំ នាងបានដឹកនាំបញ្ជីលក់របស់ក្រុមហ៊ុន ហើយទទួលបានប្រាក់រង្វាន់ និងការផ្សព្វផ្សាយដ៏សប្បុរស។

នៅពេលនេះ នាងបានដឹងថា ជម្រើសរបស់ខ្លួនកន្លងមកគឺត្រឹមត្រូវបំផុត។ នៅអាយុ៤០ ឆ្នាំ នាងបានទិញផ្ទះល្វែងមួយនៅទីក្រុងសៀងហៃ និងទ្រព្យសម្បត្តិមួយចំនួនទៀត។ ប៉ុន្តែ​ជីវិត​នៅ​លីវ​ធ្វើ​ឲ្យនាង​តែង​តែ​មាន​អារម្មណ៍​ថា​ត្រូវ​បាន​គេ​បោះបង់ និង​ឯកា។ នាង​បាន​ដឹង​ថា​នាង​ត្រូវ​ការ​រស់​នៅឲ្យបាន​ពេញ​លេញ​ដើម្បី​រីករាយ​ជាមួយ​វា​ដើម្បី​កុំ​ឲ្យខាត​បង់​វា​។

ក្នុងឆ្នាំ ២០០៩ អ្នកស្រី Zhang Huixin បានចូលនិវត្តន៍នៅអាយុ ៥៥ ឆ្នាំ។ ជំនួសឲ្យការជ្រើសរើសសម្រាក នាងបានចំណាយពេលធ្វើដំណើរគ្រប់ទីកន្លែង។ ដំបូង​ឡើយ នាង​ជិះ​កង់​ពី​ក្រុង​សៀងហៃ​ទៅ​ក្រុង​ស៊ូចូវ។ ការ​ធ្វើ​ដំណើរ​នេះ​ធ្វើ​ឲ្យនាង​ស្ទើរ​តែ​អស់​កម្លាំង។ ដោយ​មាន​អារម្មណ៍​ថា​សុខភាព​មិន​អាច​ទប់ទល់​នឹង​ការ​ធ្វើ​ដំណើរ​ដោយ​កង់​បាន នាង​គិត​អំពី​ការ​ធ្វើ​ដំណើរ​តាម​រថយន្ត។ ក្នុងឆ្នាំ ២០១៥ នៅអាយុ ៦១ឆ្នាំ ស្ត្រីរូបនេះបានសម្រេចចិត្តរៀនបើកបរ និងទទួលបានប័ណ្ណបើកបរបន្ទាប់ពីការធ្វើតេស្តចំនួន ២ ដង។ បន្ទាប់ពីទទួលបានប័ណ្ណបើកបរ អ្នកស្រី Zhang បានសម្រេចចិត្តលក់ផ្ទះ និងអចលនទ្រព្យជាច្រើនផ្សេងទៀត ដើម្បីទិញរថយន្តផ្លាស់ប្តូរផ្ទះ ហើយចាប់ផ្តើមការធ្វើដំណើរជាផ្លូវការនៃការបើកបរខ្លួនឯងដើម្បីធ្វើដំណើរ។

គាត់​បាន​ធ្វើ​ដំណើរ​ពី​សៀងហៃ​ទៅ​ក្វាងស៊ី បន្ទាប់​មក​ពី​យូណាន​ទៅ​ម៉ុងហ្គោលី​ខាងក្នុង​ត្រៀម​ធ្វើ​ដំណើរ​ឆ្លង​កាត់​ប្រទេស​ចិន។ រថយន្ត​របស់​នាង​ត្រូវ​បាន​គេ​កែ​លម្អ​ឲ្យមាន​រូបរាង​ដូច​ផ្ទះ​តូច​មួយ មាន​បន្ទប់ទឹក បន្ទប់​គេង និង​ផ្ទះបាយ​សម្រាប់​ធ្វើ​ម្ហូប។ នៅពីក្រោយកៅអីអ្នកបើកបរគឺជាបន្ទប់គេង។ នៅខាងក្នុងតួរថយន្តមានទូរទឹកកក ផើង និងឆ្នាំង។ល។ នាងបានរៀបចំសៀវភៅ និងជក់ជាច្រើននៅក្នុងឡាន ដើម្បីព្យាយាមថតរូបភាពដ៏ស្រស់ស្អាតដែលនាងបានឆ្លងកាត់។ ពេល​ឃ្លាន​ក៏​ឈប់​ឡាន​នៅ​ចិញ្ចើម​ផ្លូវ ហើយបើក​ផ្ទះបាយ​ធ្វើ​ម្ហូបឲ្យខ្លួនឯង ។

​ស្រ្តីចំណាស់រូបនេះបាន​ចែករំលែក​ថា​៖ «​ខ្ញុំ​បាន​ជម្នះ​ឧបសគ្គ​នៃ​ពេលវេលា​។ រាល់ថ្ងៃ​ខ្ញុំ​ភ្ញាក់​ពី​ដំណេក​និង​រឿង​ថ្មីៗ​។ ក្នុងអំឡុងពេល​ធ្វើដំណើរ ខ្ញុំ​បាន​ជួប​មិត្តភក្តិ​ដែលមាន​គំនិត​ដូច​គ្នា​ជាច្រើន​»​។ ការធ្វើដំណើរដោយខ្លួនឯងរបស់នាងមិនតែងតែរលូនទេ។ ឧប្បទ្ទវហេតុយានយន្ត ការវង្វេង និងអាកាសធាតុអាក្រក់តែងតែកើតឡើង។ ប៉ុន្តែមុនពេលចាប់ផ្តើមដំណើរនេះ នាងបានបំពាក់ខ្លួនឯងជាមួយនឹងជំនាញសង្គ្រោះ និងជួសជុលរថយន្តជាមូលដ្ឋាន។

ដូច​នេះ​ដែរ អស់​រយៈ​ពេល ៩​ឆ្នាំ​កន្លង​មក​នេះ អ្នកស្រី Zhang Huixin បាន​ធ្វើ​ដំណើរ​កម្សាន្ត​ទូទាំង​ប្រទេស​ចិន ដោយ​រីករាយ​នឹង​ជីវិត​ចូល​និវត្តន៍​តាម​វិធី​ផ្ទាល់​ខ្លួន។ នាង​បាន​និយាយ​ថា នាង​នឹង​បន្ត​ដំណើរ​នេះ​ជា​ច្រើន​ឆ្នាំ​ទៀត​រហូត​ដល់​នាង​មិន​មាន​សុខភាព​គ្រប់គ្រាន់​ទៀត​ទេ ។ មានមនុស្សតិចណាស់ដែលជឿថា នៅឆ្នាំនេះគាត់នឹងមានអាយុ ៧០ ឆ្នាំហើយនៅតែមានសុខភាពល្អនិងរហ័សរហួន។ មនុស្សជាច្រើនឆ្ងល់អំពីអាពាហ៍ពិពាហ៍ ទោះ​ជា​យ៉ាង​ណា នាង​ថា​នាង​មិន​ដែល​សោកស្ដាយ​ដែល​មិន​បាន​រៀប​ការ​នោះ​ទេ។​ មនុស្ស​គ្រប់​រូប​មាន​ជីវិត​តែ​មួយ​គត់​ដើម្បី​រស់ ហើយ​នាង​ជ្រើស​រើស​រស់​នៅ​តាម​ផ្លូវ​ខ្លួន​ឯង៕

អត្ថបទ៖ សាង ស្រីល័ក្ខ

ចុចអាន៖រឿងទាំង ១០ ហាមឃាត់យ៉ាងតឹងរ៉ឹងនៅកូរ៉េខាងជើង បើល្មើសត្រូវកាត់ទោស​ប្រហារ​ជីវិត