អ៊ីរ៉ង់ថា ក្រុមហេសបូឡា វាយប្រហារដោយដ្រូនលើលំនៅឋាន​​នាយករដ្ឋមន្ត្រី​អ៊ីស្រាអែល​

បេសកជន​អ៊ីរ៉ង់​ប្រចាំ​អង្គការសហប្រជាជាតិ បាននិយាយថា ក្រុមហេសបូឡារបស់ប្រទេសលីបង់ ដែលប្រដាប់ដោយអាវុធ និងផ្តល់ហិរញ្ញប្បទានដោយទីក្រុងតេអេរ៉ង់ ជាអ្នកនៅពីក្រោយការវាយប្រហារដោយយន្តហោះគ្មានមនុស្សបើកលើលំនៅដ្ឋានរបស់នាយករដ្ឋមន្ត្រីអ៊ីស្រាអែលលោក Benjamin Netanyahu​។ នេះបើយោងតាមការចេញផ្សាយរបស់សារព័ត៌មាន ​CNA នៅថ្ងៃទី២០ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីព្រឹកថ្ងៃសៅរ៍ លោក Netanyahu បានចោទប្រកាន់ក្រុម ហេបូឡា ថា បានព្យាយាមសម្លាប់លោក បន្ទាប់ពីយន្តហោះគ្មានមនុស្សបើកមកពីប្រទេសលីបង់ វាយប្រហារផ្ទះគ្រួសាររបស់លោក។ ថ្លែងទៅកាន់ប្រទេសអ៊ីរ៉ង់ និងភ្នាក់ងារ​របស់ខ្លួនលោក Netanyahu បានប្តេជ្ញាថា «អ្នកណាក៏ដោយដែលព្យាយាមធ្វើបាបពលរដ្ឋអ៊ីស្រាអែលនឹងត្រូវទទួលបានការឆ្លើយតបវិញយ៉ាងធ្ងន់ធ្ងរ»។

ទោះយ៉ាងណាក្រុមសកម្មប្រយុទ្ធគាំទ្រដោយទីក្រុងតេអេរ៉ង់ ដែលប្រយុទ្ធជាមួយអ៊ីស្រាអែលនៅភាគខាងត្បូងប្រទេសលីបង់ មិនទាន់ទទួលស្គាល់ការវាយប្រហារនេះនៅឡើយទេ។ ប៉ុន្តែក្រុមបេសកកម្មនេះបាននិយាយនៅក្នុងការឆ្លើយតបទៅនឹងសំណួរអំពីតួនាទីរបស់អ៊ីរ៉ង់ក្នុងការវាយប្រហារនេះថា​«សកម្មភាពនេះត្រូវបានធ្វើឡើងដោយក្រុមហេសបូឡា លីបង់»។ ជាមួយគ្នានេះអ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei ក៏បានថ្កោលទោសអ៊ីស្រាអែល​ផងដែរ ចំពោះការផ្សាយភូតកុហកទាក់ទងនឹងការចោទប្រកាន់ប្រឆាំងនឹងអ៊ីរ៉ង់ នេះបើយោងតាម ​​IRNA ។

ក្រុមប្រដាប់អាវុធដែលមានសម្ព័ន្ធមិត្តជាមួយអ៊ីរ៉ង់ ដែលគេស្គាល់ថាជា «អ័ក្សនៃការតស៊ូ» ដែលរួមមានក្រុមហេសបូឡា ត្រូវបានទាញចូលទៅក្នុងសង្រ្គាមអ៊ីស្រាអែល-ហាម៉ាស់ ដែលបានផ្ទុះឡើងនៅតំបន់ហ្គាហ្សា ចាប់តាំងពីការវាយប្រហាររបស់ហាម៉ាសកាលពីថ្ងៃទី៧ខែតុលា ឆ្នាំ​២០២៣ មកលើអ៊ីស្រាអែល។

ទីក្រុងតេអេរ៉ង់ក៏បានបើកការវាយប្រហារដោយផ្ទាល់ចំនួនពីរលើសត្រូវអ៊ីស្រាអែលក្នុងអំឡុងសង្គ្រាម ដែលថ្មីៗនេះបានបាញ់រ៉ុកកែតចំនួន ២០០​គ្រាប់កាលពីថ្ងៃទី​១ខែតុលា ចូលប្រទេសអ៊ីស្រាអែល ខណៈអ៊ីស្រាអែលបានប្តេជ្ញាសងសឹក។ យ៉ាងណាអ៊ីរ៉ង់ថា ខ្លួននឹងវាយបកវិញ ប្រសិនបើអ៊ីស្រាអែលវាយប្រហារ៕

អត្ថបទ៖ ប៊ុន សុភាព