អ្នកស្រី ហារីស បង្កើតប្រវត្តិសាស្រ្តនយោបាយថ្មីឲ្យសហរដ្ឋអាមេរិក 

អនុប្រធានាធិបតីអាមេរិក អ្នកស្រី កាម៉ាឡា ហារីស បានបង្កើតប្រវត្តិសាស្រ្តនយោបាយថ្មីឲ្យសហរដ្ឋអាមេរិក ដោយយុទ្ធនាការឃោសនារកសំឡេងឆ្នោតរបស់អ្នកស្រី ក្លាយជាការឃោសនារយៈពេលខ្លីបំផុត ដោយចាយពេលត្រឹម១០៧ថ្ងៃប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រីបានចាប់ផ្តើមយុទ្ធនាការក្នុងខែសីហា បន្ទាប់ពីលោក ចូ បៃដិន ប្រកាសដកខ្លួនពីការប្រកួត ហើយទីបំផុតអ្នកស្រីបានបញ្ចប់ការឃោសនានៅទីក្រុង Philadelphia នៃរដ្ឋ Pennsylvania នាល្ងាចថ្ងៃទី៤ខែវិច្ឆិកា (ពេលវេលានៅសហរដ្ឋអាមេរិក)។

អ្នកស្រីប្រាប់ទៅអ្នកគាំទ្រមុនពេលបិទបញ្ចប់យុទ្ធនាការឃោសនាថា «យើងនៅសល់ពេលតែប៉ុន្មានម៉ោងទៀតប៉ុណ្ណោះ ប៉ុន្តែយើងនៅមានការងារជាច្រើនដែលត្រូវធ្វើ»។

ក្នុងអំឡុងពេលនោះ អ្នកស្រី ហារីស បានបញ្ជាក់ជាថ្មីនូវពាក្យសន្យានៃយុទ្ធនាការឃោសនា ដូចជាការកាត់បន្ថយតម្លៃទំនិញ តម្លៃផ្ទះ ថ្លៃថែទាំកុមារ ការថែទាំមនុស្សចាស់ និងការកាត់បន្ថយពន្ធសម្រាប់កម្មករ និងអាជីវកម្មខ្នាតតូចជាដើម។ អ្នកស្រីក៏ប្តេជ្ញា អនុម័តច្បាប់ដើម្បីស្តារសេរីភាពបន្តពូជរបស់ស្ត្រីឡើងវិញផងដែរ។

នៅថ្ងៃទី៥ខែវិច្ឆិកានេះ ការបោះឆ្នោតជ្រើសរើសប្រធានាធិបតីទី៤៧របស់សហរដ្ឋ បានចាប់ផ្តើមជាផ្លូវការហើយ ដោយតំបន់តូចមួយឈ្មោះ Dixville Notch នៃរដ្ឋ New Hampshire បើកការិយាល័យបោះឆ្នោតមុនគេ ពោលគឺបើកនៅពាក់កណ្តាលអាធ្រាត្រតែម្តង ខណៈកន្លែងផ្សេងបើកនៅម៉ោង៦ព្រឹក។

ភ្លាមៗក្រោយការបោះឆ្នោតនៅទីនោះបិទបញ្ចប់ លទ្ធផលបង្ហាញថា លោក ដូណាល់ ​ត្រាំ នៃគណបក្សសាធារណរដ្ឋនិងអ្នកស្រី កាម៉ាឡា ហារីស ទទួលបាន ៣សំឡេងស្មើគ្នា។ 

នេះសបញ្ជាក់ឲ្យឃើញឲ្យឃើញថា ការប្រកួតប្រជែងសម្រាប់តំណែងសេតវិមានលើកនេះ ពិតជាតានតឹងខ្លាំងណាស់៕

អត្ថបទ៖ សុខ សុវណ្ណ

ចុចអាន៖ ២៤រដ្ឋ ត្រៀមបញ្ជូនឆ្មាំជាតិទៅទប់បាតុកម្ម នៅថ្ងៃប្រកាសលទ្ធផលឆ្នោតផ្លូវការរបស់អាមេរិក