ក្នុង១ថ្ងៃ មន្ទីរពេទ្យកុមារជាតិទទួលសង្គ្រោះ និងព្យាបាលទារកកើតមិនគ្រប់ខែ និងបញ្ហាផ្សេងៗប្រមាណ៨០នាក់

លោកសាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ បានមានប្រសាសន៍ថា ក្នុង១ថ្ងៃមន្ទីរពេទ្យកុមារជាតិទទួលការព្យាបាលបន្ត និងសង្គ្រោះទារកកើតមកមិនគ្រប់ខែ ឬទារកកើតមកមានបញ្ហាផ្សេងៗ ដែលមន្ទីរពេទ្យរដ្ឋ និងឯកជនមួយចំនួនបញ្ជួនមកប្រមាណ៨០នាក់។

ថ្លែងក្នុងពិធីប្រគល់ទទួលសម្ភារៈបរិក្ខាពេទ្យពីមន្ទីរពេទ្យដេហ្គូហ្វាទីម៉ានៃសាធារណរដ្ឋកូរ៉េ នៅព្រឹកថ្ងៃទី៧វិចិ្ឆកានេះ
លោកសាស្ត្រាចារ្យបានបន្តថា សម្ភារៈបរិក្ខាពេទ្យទាំងនេះរួមមាន ទូសម្រាប់ចិញ្ចឹមទារកចំនួន៥គ្រឿង សម្រាប់ដាក់ទារកដែលកើតមកមិនគ្រប់ខែ ឬមិនគ្រប់គីឡូ និងម៉ាស៊ីនសម្រាប់ព្យាបាលកុមារដែលមានជំងឺលឿងចំនួន៥គ្រឿង ដែលមានតម្លៃប្រមាណជាង១០ម៉ឺនដុល្លារ។

លោកសាស្ត្រាចារ្យបានបន្តទៀតថា ការផ្តល់ម៉ាស៊ីនទាំងនេះពិតជាមានសារសំខាន់ណាស់សម្រាប់មន្ទីរពេទ្យកុមារជាតិក្នុងការជួយបង្កើនគុណភាពព្យាបាលជំងឺ និងថែរក្សាសុខភាពដល់កុមារ ក៏ដូចជាជួយកាត់បន្ថយអត្រាស្លាប់របស់ទារកពិសេសទារកកើតមកមិនគ្រប់ខែ និងគ្រប់គីឡូអាចជួយឱ្យពួកគេមានសុខភាពល្អវិវត្តន៍ដូចទារកធម្មតាដែរ។ ព្រោះថាពេទ្យកុមារជាតិជាមន្ទីរពេទ្យកុមារដ៏ធំតែងតែទទួលសង្គ្រោះ និងព្យាបាលបន្តកុមារដែលមានបញ្ហាកើតមិនគ្រប់ខែ និងបញ្ហាផ្សេងៗដែលបញ្ជួនមកពីតាមមន្ទីរពេទ្យរដ្ឋ និងពេទ្យឯកជនមួយចំនួនប្រមាណ៨០នាក់ក្នុង១ថ្ងៃ។

លោកសាស្ត្រាចារ្យបានពន្យល់ថា កត្តាដែលនាំឱ្យទារកកើតមកមិនគ្រប់ខែភាគច្រើនបណ្តាលមកពីសុខភាពរបស់មាតាដែលទទួលសម្ពាធការងារប៉ះពាល់ដល់សុខភាពផ្លូវកាយ ផ្លូវចិត្ត ឬគ្រោះថ្នាក់ផ្សេងៗ និងគួបផ្សំទៅនឹងបរិស្ថានចំណីអាហារ និងប៉ះទង្គិចនឹងអ្វីមួយៗ។

លោកសាស្រ្តាចារ្យ ញឹប អង្គាបុស្ស បានថ្លែងអំណរគុដល់លោកស្រី ស៊ុនមីគីម(Sunmi Kim) នាយកមនី្ទរពេទ្យ ដេហ្គូ ហ្វាទីម៉ានៃសាធារណរដ្ឋកូរ៉េ និងគណៈប្រតិភូទាំងអស់ដែលបានផ្តល់សម្ភារៈទាំងអស់នេះដល់មន្ទីរពេទ្យកុមារជាតិជាការចូលរួមចំណែកក្នុងការធ្វើឲ្យល្អប្រសើរនៅសេវាព្យាបាលរបស់មនី្ទរពេទ្យ ក៏ដូចជាការជួយលើការថែទាំ និងព្យាបាលសុខុមាលភាពរបស់កុមារកម្ពុជា។

ជាមួយគ្នានោះដែរ លោកស្រី ស៊ុនមីគីម នាយកមនី្ទរពេទ្យ ដេហ្គូហ្វាទីម៉ា នៃសាធារណរដ្ឋកូរ៉េសង្ឃឹមថា តាមរយៈជំនួយទាំងនេះនឹងជួយឱ្យមន្ទីរពេទ្យកាន់តែមានសមត្ថភាពខ្ពស់បន្ថែមទៀតក្នុងការជួយព្យាបាល និងសង្គ្រោះទារកកើតមកមិនគ្រប់ខែ ឬទារកកើតមកមានបញ្ហាផ្សេងៗពីកំណើត។

គួរបញ្ជាក់ថា នៅក្នុងឱកាសនោះដែរមន្ទីរពេទ្យកុមារជាតិ និងមន្ទីរពេទ្យដេហ្គូហ្វាទីម៉ាបានចុះអនុស្សារណយោគយល់គ្នាដើម្បីធ្វើកិច្ចសហប្រតិបត្តិទៅលើផ្នែកវេជ្ជសាស្ត្រ និងបណ្តុះបណ្តាលធនធានមនុស្សរវាងមន្ទីរពេទ្យទាំងពីរផងដែរ៕

អត្ថបទ៖ សំអឿន