លើសពីទំនប់ស្តុកទឹក ទំនប់សែនសុខដុម ផ្ដល់ជាទីតាំងសម្រាប់ការប្រណាំងទូកង  ក្នុងខេត្តមណ្ឌលគិរី

ទំនប់សែនសុខដុម នៅកណ្តាលក្រុងសែនមនោរម្យ ដែលសម្ដេចធិបតី ហ៊ុន​​ ម៉ាណែត នាយករដ្ឋមន្ត្រីកម្ពុជា អញ្ជើញសម្ពោធដាក់ឱ្យប្រើប្រាស់កាលពីចុងខែតុលា បានក្លាយជាទីតាំងមួយអនុញ្ញាតឱ្យរដ្ឋបាលខេត្តមណ្ឌលគិរីយកធ្វើជាកន្លែងប្រណាំងទូកង អបអរព្រះរាជពិធីបុណ្យអុំទូក បណ្ដែតប្រទីប និងសំពះព្រះខែអកអំបុក។ ពិធីប្រណាំងទូកក្នុងខេត្តមណ្ឌលគិរី នឹងធ្វើឡើងនៅថ្ងៃទី១៤ ដល់ថ្ងៃទី១៦ ខែវិច្ឆិកា ចំថ្ងៃព្រះរាជពិធីបុណ្យអុំទូកតែម្ដង។​

គិតត្រឹមថ្ងៃទី០៨ ខែវិច្ឆិកា នេះ  គេសង្កេតឃើញថាមានទូកងជាង១០ហើយ បានទម្លាក់ជាបណ្តើរៗ ចូលទៅក្នុងទំនប់សែនសុខដុមទីតាំងប្រកួត និងមានការហាត់សមពីសំណាក់ចំណុះទូកនីមួយៗ ដែលការទម្លាក់ទូកចូល និងការហាត់សមនេះ បានធ្វើឲ្យភ្ញៀវទេសចរណ៍ និងអ្នកទស្សនាគាំទ្រច្រើនកុះករ មកទស្សនា។

ក្រៅពីការប្រណាំងទូក នៅក្នុងពិធីនេះ ក៏នឹងមានការតាំងពិព័រណ៌ផលិតផលរបស់ខេត្តមណ្ឌលគិរី នៅលើខ្នងទំនប់សែនសុខដុម ដែលរំពឹងថាមានការចូលរួមពីសំណាក់អាជីវករជាច្រើនផងដែរ។

គួរបញ្ជាក់ផងដែរថា នេះជាលើកទី២ ហើយដែល​មានព្រឹត្តិការណ៍ប្រណាំងទូក ង ខ្នាតតូចបែបប្រពៃណីនៅកណ្ដាលក្រុងសែនមនោរម្យ ខេត្តមណ្ឌលគិរី បន្ទាប់ពីរៀបចំលើកដំបូងបំផុតក្នុងប្រវត្តិសាស្រ្ដខេត្តភាគឦសានមួយនេះ កាលពីឆ្នាំ២០២៣៕

អត្ថបទ៖រៀម សុខហេង