ត្បិតជាខេត្តសម្បូរភ្នំ តែមណ្ឌលគិរី ក៏មានកម្មវិធីប្រណាំងទូកដែរ

ត្បិតតែមណ្ឌលគិរី ជាខេត្តពោរពេញទៅដោយភ្នំក៏ពិតមែន ក៏អាជ្ញាធរនៅតែអាចរៀបចំពិធីប្រណាំងទូក ង បានដែរ។ បើយោងតាមសេចក្ដីជូនដំណឹងរបស់រដ្ឋបាលសាលាស្រុកកោះញែក ពិធីប្រណាំងទូក ង ខ្នាតតូច លក្ខណៈប្រពៃណី នឹងធ្វើឡើងនៅថ្ងៃទី២ ខែវិច្ឆិកាស្អែកនេះ នៅចំណុចទំនប់អូរប្រង់ ស្ថិតនៅក្នុងឃុំស្រែហ៊ុយ ស្រុកកោះញែក ដែលមានមានចម្ងាយប្រមាណ ៩០គីឡូម៉ែត្រពីទីរួមខេត្តមណ្ឌលគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សី ទូច អភិបាលស្រុកកោះញែក បានឲ្យដឹងថា ពិធីប្រណាំងទូក.ង.ខ្នាតតូច ជាលក្ខណៈប្រពៃណី រៀបចំឡើង​ដើម្បីអបអរសាទរព្រះរាជពិធីបុណ្យ អុំទូក បណ្តែតប្រទីប និងសំពះព្រះខែ អកអំបុក។ ពិធីប្រណាំង នឹងធ្វើឡើងតែមួយថ្ងៃប៉ុណ្ណោះ គឺថ្ងៃទី២ ខែវិច្ឆិកា ចាប់ពីម៉ោង ៨ព្រឹកតទៅ។

លោកបានបញ្ជាក់ថា ទូកដែលបានចូលរួមសរុប មានចំនួន ៩ទូក។ ទូកខ្នាតខ្លី មានចំណុះ ៧នាក់ ហើយទូកដែលមានចំណុះច្រើនជាងគេ គឺមានចំនួន ១៧នាក់។ ក្នុងព្រឹត្តិការណ៍ប្រណាំងទូកនោះផងដែរ រដ្ឋបាលស្រុកកោះញែក ក៏មានប្រាក់រង្វាន់លើកទឹកចិត្តដល់កីឡាករផងដែរ សម្រាប់ទូកដែលជាប់ចំណាត់ថ្នាក់លេខ១ ដល់លេខ ៣៕

អត្ថបទ៖ រៀម សុខហេង