មណ្ឌលគិរី រៀបចំកម្មវិធីប្រណាំងទូក នៅទំនប់សែនសុខដុម កណ្ដាលក្រុងសែនមនោរម្យ

ដើម្បីអបអរ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រដ្ឋបាលខេត្តមណ្ឌលគិរី នឹងរៀបចំពិធីប្រណាំងទូក ង ខ្នាតតូចបែបប្រពៃណី នាថ្ងៃទី១៤ ដល់ ១៦ ខែវិច្ឆិកា ពោលគឺចំថ្ងៃនៃព្រះរាជពិធីបុណ្យអុំទូកតែម្ដង។ កម្មវិធីប្រណាំង នឹងធ្វើឡើងនៅក្នុងទំនប់សែនសុខដុម ដែលសម្ដេចធិបតីនាយករដ្ឋមន្រ្ដី ទើបសម្ពោធដាក់ឲ្យប្រើប្រាស់កាលពីថ្មីៗកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីការប្រណាំងទូក នៅក្នុងពិធីនេះ ក៏នឹងមានការតាំងពិព័រណ៌ផលិតផលរបស់ខេត្តមណ្ឌលគិរី នៅលើខ្នងទំនប់សែនសុខដុម ដែលរំពឹងថាមានការចូលរួមពីសំណាក់អាជីវករជាច្រើនផងដែរ។

គិតត្រឹមរសៀល ថ្ងៃទី៦ ខែវិច្ឆិកា ឆ្នាំ២០២៤ គេសង្កេតឃើញមានទូក ចាប់ផ្ដើមទម្លាក់ចូលផ្ទៃទឹកជាបណ្ដើរៗហើយ ដែលក្នុងនោះ ទូកឈ្មោះ ហនុមា​នសែនជ័យ របស់តំបន់ប្រតិបត្តិការសឹករងមណ្ឌលគិរី លេចវត្តមានមុនគេ។

គួរបញ្ជាក់ផងដែរថា នេះជាលើកទី២ ហើយដែល​មានព្រឹត្តិការណ៍ប្រណាំងទូក ង ខ្នាតតូចបែបប្រពៃណីនៅកណ្ដាលក្រុងសែនមនោរម្យ ខេត្តមណ្ឌលគិរី បន្ទាប់ពីរៀបចំលើកដំបូងបំផុតក្នុងប្រវត្តិសាស្រ្ដខេត្តភាគឦសានមួយនេះ កាលពីឆ្នាំ២០២៣៕

អត្ថបទ៖ រៀម សុខហេង