សម្ដេចតេជោ ប្រាប់ប្រធាន​សភាប្រឹក្សានយោបាយចិន ថា កម្ពុជានៅតែប្រកាន់យកនយោបាយចិនតែមួយ

សម្ដេចតេជោ ហ៊ុន សែន បានប្រាប់ប្រធានសភាប្រឹក្សានយោបាយប្រជាជនចិនសាជាថ្មី ថា កម្ពុជានៅតែបន្តប្រកាន់យកនយោបាយចិនតែមួយ ហើយកម្ពុជានៅតែជាមិត្តរបស់ចិនគ្រប់កាលៈទេសៈ។ សម្ដេចតេជោ​​ បញ្ជាក់ថា ចិនបានផ្ដល់ការគាំទ្រ និងជំនួយ មិនត្រឹមតែដល់ការអភិវឌ្ឍសង្គម-សេដ្ឋកិច្ចរបស់កម្ពុជាប៉ុណ្ណោះនោះទេ ក៏បុន្តែ ក៏បានគាំទ្រដល់ឯករាជ្យភាពខាងនយោបាយរបស់កម្ពុជាផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់ដូច្នេះរបស់សម្ដេចតេជោ បានធ្វើឡើងក្នុងជំនួបពិភាក្សាការងារជាមួយលោក វ៉ាង ហ៊ូនីង (Wang Huning) ប្រធានសភាប្រឹក្សានយោបាយប្រជាជនចិន នារសៀលថ្ងៃទី០២ ខែធ្នូ ឆ្នាំ២០២៤ ក្នុងឱកាសសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា អញ្ជើញបំពេញទស្សនកិច្ចនៅប្រទេសចិន។

សម្ដេចតេជោ លើកឡើងថា ទស្សនកិច្ចពេលនេះ បានធ្វើឡើងក្រោយពីទស្សនកិច្ចរបស់សម្ដេច​ កាលពីដើមឆ្នាំ២០២៣ ក្នុងគោលដៅលើកកម្ពស់ទំនាក់ទំនងទ្វេភាគី និងកិច្ចសហប្រតិបត្តិការ លើសពីភាពជាដៃគូយុទ្ធសាស្ត្រគ្រប់ជ្រុងជ្រោយ ទំនាក់ទំនងមិត្តដែកថែប និងសហគមន៍ជោគវាសនារួមកម្ពុជា-ចិន។

ជុំវិញទំនាក់ទំនងការទូតសភារវាងប្រទេសទាំងពីរ សម្ដេចតេជោ ហ៊ុន សែន បង្ហាញក្តីសង្ឃឹមថា កិច្ចសហប្រតិបត្តិការរវាងសភាប្រឹក្សានយោបាយប្រជាជនចិន និងព្រឹទ្ធសភាកម្ពុជា នឹងត្រូវបានពង្រឹង និងពង្រីកបន្ថែមទៀត។

ជាកិច្ចឆ្លើយតប លោក វ៉ាង ហ៊ូនីង បានកោតសរសើរសម្តេចតេជោដែលបានរួមវិភាគទានយ៉ាងច្រើនលើសលុបដល់ការអភិវឌ្ឍនូវទំនាក់ទំនងកម្ពុជា-ចិន។ លោក លើកឡើងថា សម្តេចតេជោ គឺជាមិត្តល្អរបស់ប្រទេសចិន និងប្រជាជនចិន។ ជាមួយគ្នានេះ លោកប្រធានសភាប្រឹក្សានយោបាយចិន បានកោតសរសើរចំពោះការបន្តវេននៃថ្នាក់ដឹកនាំជំនាន់ក្រោយរបស់កម្ពុជាដែលបានដើរតាមមាគ៌ារបស់សម្ដេចតេជោ ហើយបញ្ជាក់ថា ចិន ​បន្តគាំទ្រនូវគោលនយោបាយរបស់កម្ពុជាជាបន្តទៀតផងដែរ។ ក្នុងនោះ លោក បានសន្យានៅចំពោះមុខសម្ដេចតេជោ ថា ចិននឹងផ្សព្វផ្សាយពីប្រពៃណីដ៏ល្អរបស់កម្ពុជា និងជំរុញទេសចរចិនមកកម្ពុជាបន្ថែមទៀត។

លោក វ៉ាង ហ៊ូនីង បន្តថា ចិន និងកម្ពុជា បានបន្តអនុវត្តនៅកិច្ចព្រមព្រៀងនៃការកសាងសហគមន៍ជោគវាសនារួម ហើយប្រទេសទាំងពីរបានរួមគ្នាក្នុងការជំរុញទំនាក់ទំនងនេះឱ្យឈានទៅមុខជាលំដាប់ ខណៈភាគីទាំងពីរ ក៏កំពុងបន្ស៊ីគ្នានៃគំនិតផ្ដួចផ្ដើមខ្សែក្រវាត់និងផ្លូវរបស់ចិន និងយុទ្ធសាស្ត្របញ្ចកោណរបស់កម្ពុជា ដើម្បីពន្លឿនការសម្រេចរចនាសម្ព័ន្ធសំខាន់ៗ រួមមាន ច្រករបៀងឧស្សាហកម្ម និងបច្ចេកវិទ្យា ច្រករបៀងមច្ឆា និងអង្ករ និងការអភិវឌ្ឍកសិកម្មទំនើបជាដើម និងការកសាងច្រករបៀងគម្រូថ្មីនៃកិច្ចសហប្រតិបត្តិការរវាងប្រទេសទាំងពីរ។

ដើម្បីឈានទៅការជំរុញ និងពង្រឹងពង្រីកទំនាក់ទំនងរវាងសភាប្រឹក្សានយោបាយប្រជាជនចិន និងព្រឹទ្ធសភាកម្ពុជា ឱ្យកាន់ខ្លាំងក្លា​បន្ថែមទៀត លោក វ៉ាង ហ៊ូនីង ក៏ទទួលយកការអញ្ជើញរបស់សម្ដេចតេជោ ដើម្បីមកបំពេញទស្សនកិច្ចនៅកម្ពុជាជាថ្មីម្ដង នាពេលខាងមុខ បន្ទាប់ពីទស្សនកិច្ចរបស់លោកកាលពីឆ្នាំ២០១៦៕