កម្ពុជា-សហភាពអឺរ៉ុប រួមគ្នាកែលម្អកំណែទម្រង់ ការអប់រំបច្ចេកទេសកាន់តែប្រសើរឆ្លើយតបតម្រូវ ការវិនិយោគបរទេស

សហភាពអឺរ៉ុប និងក្រសួងអប់រំយុវជននិងកីឡា បានប្រកាសដាក់ឱ្យអនុវត្តជាផ្លូវការគម្រោងកំណែទម្រង់ការអប់រំបច្ចេកទេស សម្ព័ន្ធមេត្រីភាព កម្ពុជា-សហភាពអឺរ៉ុប កាលពីរសៀលថ្ងៃទី០៩ ខែធ្នូ ឆ្នាំ២០២៤ នៅវិទ្យាល័យចំណេះទូទៅ និងបច្ចេកទេសពួក ខេត្តសៀមរាប ដើម្បីកែលម្អកំណែទម្រង់ការអប់រំបច្ចេកទេសនៅប្រទេសកម្ពុជាកាន់តែប្រសើរឆ្លើយតប និងអាចបំពេញតម្រូវការសម្រាប់ការវិនិយោគបរទេស។

នៅក្នុងឱកាសចូលរួមប្រកាសគម្រោងកំណែទម្រង់ការអប់រំបច្ចេកទេសសម្ព័ន្ធមេត្រីភាព កម្ពុជា-សហភាពអឺរ៉ុប លោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជាបានលើកឡើងថា គម្រោងសម្ព័ន្ធមេត្រីភាព
Twinning នេះត្រូវបានអនុវត្តឡើងក្នុងគោលបំណងកែលម្អកំណែទម្រង់ការអប់រំបច្ចេកទេសនៅប្រទេសកម្ពុជា
តាមរយៈការសហការជាមួយអ្នកជំនាញអឺរ៉ុប និងអ្នកជំនាញក្នុងប្រទេសដោយផ្តោតលើការរួមបញ្ចូលការរៀននៅក្នុងថ្នាក់ជាមួយនឹងបទពិសោធន៍ជាក់ស្តែង ជាពិសេសក្នុងវិស័យបច្ចេកវិទ្យាថ្មីៗ និងការរីកចម្រើនក្នុងបច្ចេកវិទ្យាឌីជីថល ដើម្បីធានាបាននូវឱកាសការងារល្អៗសម្រាប់សិស្សានុសិស្សក្នុងប្រទេសកម្ពុជា។

លោកបានបន្តថា គម្រោងសម្ព័ន្ធមេត្រីភាព Twinning នេះ គឺជាជំហានឆ្ពោះទៅមុខយ៉ាងសំខាន់មួយដែលបង្ហាញអំពីការប្តេជ្ញាចិត្តរបស់សហភាពអឺរ៉ុបក្នុងការគាំទ្រកំណែទម្រង់វិស័យអប់រំនៅកម្ពុជា។ គម្រោងនេះក៏ផ្តោតសំខាន់ទៅលើតម្រូវការរបស់វិស័យឯកជន ជាពិសេសតម្រូវការរបស់ក្រុមហ៊ុនមកពីអឺរ៉ុបដែលអាចឱ្យក្រុមហ៊ុនទាំងនោះធ្វើការវិនិយោគបន្ថែមទៀតនៅក្នុងប្រទេសកម្ពុជា។

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា បានថ្លែងអំណរគុណយ៉ាងជ្រាលជ្រៅដល់សហភាពអឺរ៉ុបដែលបានជួយឧបត្ថម្ភ និងគាំទ្រមកលើវិស័យអប់រំជាច្រើនឆ្នាំនាពេលកន្លងមកនេះ
ជាពិសេសចំពោះការសហការជាមួយប្រទេសកម្ពុជាលើគម្រោងសម្ព័ន្ធមេត្រីភាព កម្ពុជា-សហភាពអឺរ៉ុបនាពេលនេះផ្ទាល់
ដោយប្រទេសកម្ពុជា គឺជាប្រទេសដំបូងគេបំផុតនៅទ្វីបអាស៊ីដែលទទួលបានអត្ថប្រយោជន៍ពីគម្រោងសម្ព័ន្ធមេត្រីភាព Twinning នេះ ក្នុងនោះមន្ត្រីរាជការកម្ពុជានឹងធ្វើទស្សនកិច្ចសិក្សានៅទ្វីបអឺរ៉ុបដើម្បីសិក្សាពីបទពិសោធន៍ និងឧត្តមានុវត្តន៍ពាក់ព័ន្ធនឹងការសិក្សាជំនាញដែលផ្សារភ្ជាប់នឹងការងារ ការធ្វើទំនើបកម្ម កម្មវិធីសិក្សា និងការបណ្តុះបណ្តាលគ្រូសម្រាប់ការអប់រំបច្ចេកទេស។

លោកឧបនាយករដ្ឋមន្ត្រី បានបញ្ចាក់ឱ្យដឹងថា តាមរយៈកិច្ចសហការនេះ នឹងអនុញ្ញាតឱ្យកម្ពុជាអាចសម្រិតសម្រាំងប្រព័ន្ធអប់រំឱ្យស្របតាមស្តង់ដាការអប់រំបច្ចេកទេស ដូចទៅនិងប្រទេសហ្វាំងឡង់ បារាំង និងអាល្លឺម៉ង់ ជាដើម
ដែលប្រទេសទាំងនេះមានបទពិសោធន៍ស៊ីជម្រៅលើវិស័យភាពជាដៃគូរវាងរដ្ឋ និងឯកជន។ កិច្ចសហការនេះក៏នឹងជួយបណ្តុះបណ្តាល សមត្ថភាពរបស់សិស្សានុសិស្សយើងឱ្យកាន់តែប្រសើរឡើង ដើម្បីអាចឆ្លើយតប
និងអាចបំពេញតម្រូវការសម្រាប់ការវិនិយោគបរទេសនៅប្រទេសកម្ពុជា៕

អត្ថបទ៖ សំអឿន