អាមេរិក ប្រកាស​ផ្ដល់​កញ្ចប់​ជំនួយ​សព្វាវុធ​ថ្មី​តម្លៃ ៥០០​លាន​ដុល្លារ​ឲ្យ​អ៊ុយក្រែន

រដ្ឋមន្ត្រីការបរទេសអាមេរិក លោក Antony Blinken បាននិយាយនៅក្នុងសេចក្តីថ្លែងការណ៍មួយថា រដ្ឋបាលរបស់លោក ចូ បៃដិន បានប្រកាសកញ្ចប់ជំនួយអាវុធមួយផ្សេងទៀតសម្រាប់ប្រទេសអ៊ុយក្រែនកាលពីថ្ងៃព្រហស្បតិ៍​ទី​១២​ខែ​ធ្នូ​​ឆ្នាំ​២០២៤ ដែលមានតម្លៃ ៥០០​លានដុល្លារ។

លោក Blinken បាន​​ឲ្យ​ដឹង​ថា កញ្ចប់​ជំនួយ​ថ្មី មាន​ដូចជា គ្រាប់រំសេវសម្រាប់ប្រព័ន្ធ​បាញ់​រ៉ុកកែត HIMARS និង​មីស៊ីល​ប្រឆាំងវិទ្យុសកម្មល្បឿនលឿន (HARMs) ព្រម​ទាំងជំនួយ​​សព្វាវុធ​មួយ​ចំនួន​ផ្សេងទៀត។

អ្នកនាំពាក្យសេតវិមាន លោក John Kirby បានប្រកាស​ថា សហរដ្ឋអាមេរិកនឹងបន្តផ្តល់កញ្ចប់បន្ថែមសម្រាប់អ៊ុយក្រែន រហូតដល់ចុងបញ្ចប់នៃរដ្ឋបាល​​របស់​​លោក បៃដិន។

កញ្ចប់​ជំនួយ​ថ្មី​នេះ ត្រូវ​បាន​ប្រកាស​រយៈពេល​​​​១០​ថ្ងៃ​បន្ទាប់​​ពី​អាមេរិក​ បាន​បញ្ជាក់​ថា ខ្លួននឹងបញ្ជូន​មីស៊ីល គ្រាប់រំសេវ គ្រាប់មីន និងសព្វាវុធផ្សេងៗទៀតដែលមានតម្លៃ ៧២៥លានដុល្លារដល់អ៊ុយក្រែន។

រដ្ឋបាល​របស់​លោក បៃដិន កំពុង​ញាប់ដៃញាប់​ជើង​ជា​ខ្លាំង​ដើម្បី​ជួយ​ដល់​អ៊ុយក្រែន ក្នុងការ​ទប់ទល់​នឹង​ការឈ្លានពានរបស់រុស្ស៊ី មុនពេល​​​​អាណត្តិ​របស់​លោក​​នឹង​ផុត​នៅ​​ប៉ុន្មាន​សប្ដាហ៍​ខាង​មុខ។

សេចក្តីប្រកាស​ពី​កញ្ចប់​ជំនួយ​នេះ បានបង្ហាញពីការកើនឡើងយ៉ាងខ្លាំងនៃទំហំ​ប្រើប្រាស់​ច្បាប់​ជំនួយ Presidential Drawdown Authority (PDA) របស់​លោក បៃដិន ដែលអនុញ្ញាតឲ្យ​សហរដ្ឋអាមេរិកទាញយកពីស្តុកអាវុធបច្ចុប្បន្ន​របស់​ខ្លួន ដើម្បីជួយសម្ព័ន្ធមិត្តក្នុងគ្រាអាសន្ន។

ច្បាប់​ជំនួយ PDA ជាធម្មតាមានចាប់ពី ១២៥​លានដុល្លារដល់ ២៥០​លានដុល្លារ។ លោក បៃដិន មានទឹកប្រាក់ប៉ាន់ស្មានពី ៤​ទៅ​៥ពាន់លានដុល្លារនៅក្នុង​ច្បាប់ PDA ដែលត្រូវបានអនុញ្ញាតរួចហើយដោយសភា​អាមេរិក។ លោក បៃដិន ត្រូវបានគេរំពឹងថានឹងប្រើប្រាស់​ថវិកា​ទាំង​នោះ​សម្រាប់អ៊ុយក្រែន មុនពេលប្រធានាធិបតី​ទើប​ជាប់ឆ្នោតលោក ដូណាល់ ត្រាំ ចូលកាន់តំណែងនៅថ្ងៃទី២០​ខែមករា​ឆ្នាំ​២០២៥៕

ដោយ៖ ឈាង