ក្រុម​ស៊ើប​​អង្កេត​ចម្រុះ ពង្រីក​ការ​ចាប់ខ្លួន​មន្ត្រី​យោធា​​ជាប់​ពាក់​ព័ន្ធ​​អនុវត្ត​ច្បាប់​អាជ្ញាសឹក​​

ក្រុម​ស៊ើប​​អង្កេតចម្រុះ​ បាន​ចាប់​ខ្លួន​ប្រធានបញ្ជាការស៊ើបការណ៍​នៃ​ក្រសួង​ការពារជាតិ និង​បាន​ឃុំខ្លួនជាផ្លូវការ​នៅ​ថ្ងៃសុក្រពីបទជាប់ពាក់ព័ន្ធក្នុងប្រតិបត្តិការច្បាប់អាជ្ញាសឹកដែល​ប្រធានាធិបតី​ Yoon Suk Yeol បាន​ប្រកាស​កាល​ពីថ្ងៃ​ទី​៣ខែ​​ធ្នូ​។

យោង​សេចក្តី​រាយការណ៍​​របស់​ទីភ្នាក់ងារ​ព័ត៌មាន​​កូរ៉េ Yonhap ក្រុមស៊ើបអង្កេតចម្រុះ​ បាន​ចេញ​សេចក្តី​ថ្លែង​ការណ៍​ឲ្យ​ដឹង​ថា ដីកាចាប់ខ្លួនមួយត្រូវបានចេញសម្រាប់ឧត្តមសេនីយទោ Moon Sang-ho ក្រោមបទចោទប្រកាន់ថាបានចូលរួមក្នុងមុខងារសំខាន់ៗទាក់ទងនឹងការបះបោរ ក៏ដូចជាការបំពានអំណាច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Moon ត្រូវបានគេសង្ស័យថា បានបញ្ជូនកងទ័ពនៅក្នុងបញ្ជារបស់គាត់ទៅកាន់ការិយាល័យគណៈកម្មាធិការជាតិរៀបចំការបោះឆ្នោតនៅទីក្រុង Gwacheon ភាគខាងត្បូងនៃទីក្រុងសេអ៊ូលកាលពីថ្ងៃទី៣ខែធ្នូ ភ្លាមៗបន្ទាប់ពីប្រធានាធិបតី Yoon Suk Yeol បានប្រកាសច្បាប់អាជ្ញាសឹក។

គាត់ក៏ត្រូវបានគេសង្ស័យថា បាន​ពិភាក្សាអំពីប្រតិបត្តិការច្បាប់អាជ្ញាសឹកជាមួយលោក Noh Sang-won អតីតមេបញ្ជាការចារកម្មការពារជាតិ រួមជាមួយនឹងមន្ត្រីក្រោមឱវាទពីរនាក់ទៀតនៅឯហាងប៊ឺហ្គឺនៅខេត្ត Gyeonggi ពីរថ្ងៃមុនការដាក់ច្បាប់អាជ្ញាសឹក។

​សេចក្តី​រាយការណ៍​នោះ​ បាន​លើក​ឡើងថា ក្នុងអំឡុងពេលកិច្ចប្រជុំគណៈកម្មាធិការសភាមុននេះ លោក Moon បានអះអាងថា លោកបានដឹងអំពីការប្រកាសច្បាប់អាជ្ញាសឹកតាមរយៈសុន្ទរកថាជាតិរបស់លោក Yoon ប៉ុណ្ណោះ៕​