ព័ត៌មានអន្ដរជាតិ

វៀតណាមនិងរុស្ស៊ីពង្រីកកិច្ចសហប្រតិបត្តិការថាមពល ក្នុងពេលពិភពលោកប្រឈមវិបត្តិ

បានផុស

១ year មុន

នៅ

ថ្ងៃពុធ ១៥ មករា ២០២៥

ដោយ

ប្រទេសវៀតណាម និងរុស្ស៊ីបានចុះហត្ថលេខាកាលពីថ្ងៃអង្គារលើកិច្ចព្រមព្រៀងមួយដើម្បីជំរុញកិច្ចសហប្រតិបត្តិការលើថាមពលនុយក្លេអ៊ែរក្នុងអំឡុងពេលដំណើរទស្សនកិច្ចរយៈពេលពីរថ្ងៃរបស់នាយករដ្ឋមន្ត្រីរុស្ស៊ី លោក Mikhail Mishustin ទៅកាន់ទីក្រុងហាណូយ។ យោងការផ្សាយរបស់ AP។

(រូបភាព៖ AP) នាយករដ្ឋមន្ត្រីរុស្ស៊ីលោក Mikhail Mishustin និង ប្រធានបក្សកុម្មុយនិស្តវៀតណាមលោក To Lam

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចព្រមព្រៀងនេះត្រូវបានចុះហត្ថលេខារវាងក្រុមហ៊ុនថាមពលនុយក្លេអ៊ែររដ្ឋរបស់រុស្ស៊ី Rosatom និងក្រុមហ៊ុនឧបករណ៍ប្រើប្រាស់ថាមពលរដ្ឋរបស់វៀតណាម EVN ។

លោក Mishustin ក៏បានជួបពិភាក្សាទ្វេភាគីជាមួយសមភាគី លោក Pham Minh Chinh និងជួបជាមួយប្រធានបក្សកុម្មុយនិស្តវៀតណាមលោក To Lam និងប្រធានរដ្ឋសភាវៀតណាមលោក Tran Thanh Man។

នាយករដ្ឋមន្ត្រីរុស្ស៊ី Mishustin បាននិយាយថា៖«វៀតណាមគឺជាដៃគូដ៏សំខាន់របស់រុស្ស៊ីនៅអាស៊ីអាគ្នេយ៍ យើងមានគម្រោងពិភាក្សាជាមួយអ្នកអំពីផែនការដ៏ទូលំទូលាយសម្រាប់កិច្ចសហប្រតិបត្តិការរវាងរុស្ស៊ី និងវៀតណាម ដែលដំណើរការរហូតដល់ឆ្នាំ២០៣០»។ លោកក៏គ្រោងកនឹងជួបលោកប្រធានាធិបតីវៀតណាម លោក Luong Cuong នៅថ្ងៃពុធនេះផងដែរ។

ជាមួយគ្នានេះ លោក Alexey Likhachev អគ្គនាយកក្រុមហ៊ុន Rosatom ក៏បានមកដល់ទីក្រុងហាណូយតាំងពីថ្ងៃចន្ទ។ បើយោងតាមប្រព័ន្ធផ្សព្វផ្សាយរដ្ឋវៀតណាម ក្រុមហ៊ុនបានត្រៀមខ្លួនជាស្រេចដើម្បីជួយវៀតណាមសាងសង់រោងចក្រថាមពលនុយក្លេអ៊ែរ និងមជ្ឈមណ្ឌល ព្រមទាំងចែករំលែក និងធ្វើមូលដ្ឋានីយកម្មបច្ចេកវិទ្យានុយក្លេអ៊ែររបស់រុស្ស៊ី។

លោក Mishustin គឺជាអ្នកបច្ចេកទេស ហើយត្រូវបានតែងតាំងជានាយករដ្ឋមន្ត្រីរុស្ស៊ីឡើងវិញនៅឆ្នាំ២០២៤។ នេះគឺជាដំណើរលើកដំបូងរបស់គាត់ទៅកាន់ប្រទេសវៀតណាម ដែលកើតឡើងបន្ទាប់ពីប្រធានាធិបតី Vladimir Putin បានធ្វើដំណើរទៅកាន់ទីក្រុងហាណូយកាលពីខែមិថុនា និងបានយល់ព្រមធ្វើការលើផែនទីបង្ហាញផ្លូវសម្រាប់វិទ្យាសាស្ត្រនុយក្លេអ៊ែរ និងមជ្ឈមណ្ឌលបច្ចេកវិទ្យានៅវៀតណាម៕

ប្រទេសវៀតណាមបាននិងកំពុងព្យាយាមស្តារផែនការថាមពលនុយក្លេអ៊ែររបស់ខ្លួនឡើងវិញ បន្ទាប់ពីខ្លួនបានផ្អាកការសាងសង់រោងចក្រថាមពលនុយក្លេអ៊ែរចំនួនពីរក្នុងឆ្នាំ២០១៦ ដោយសារតែការចំណាយ និងការព្រួយបារម្ភជុំវិញសុវត្ថិភាព ដោយសង្ឃឹមថា កិច្ចព្រមព្រៀងជាមួយរុស្ស៊ីនឹងជួយឱ្យវាក្លាយជាថាមពលគ្រប់គ្រាន់ និងឈានដល់គោលដៅទប់ស្កាត់បញ្ហាបំភាយឧស្ម័នផ្ទះកញ្ចក់នៅឆ្នាំ២០៥០។

ស្របពេលដែលរុស្សីបាននិងកំពុងព្យាយាមពង្រឹងទំនាក់ទំនងជាមួយប្រទេសនានានៅទ្វីបអាស៊ី ដើម្បីប៉ះប៉ូវភាពឯកោជាអន្តរជាតិដែលកំពុងកើនឡើងជុំវិញសង្រ្គាមរបស់ខ្លួននៅអ៊ុយក្រែន។ ប្រទេសនេះ ក៏បានយល់ព្រមផ្ទេរនាវាស្រាវជ្រាវវិទ្យាសាស្ត្រសម្រាប់ការស្រាវជ្រាវសមុទ្រឲ្យវៀតណាមដែរ។

ទីក្រុងហាណូយ និងមូស្គូមានទំនាក់ទំនងការទូតតាំងពីឆ្នាំ ១៩៥០ ហើយជាសម្ព័ន្ធមិត្តជិតស្និទ្ធចាប់តាំងពីសង្គ្រាមត្រជាក់មកម្លេះ។ ពាណិជ្ជកម្មទ្វេភាគីរវាងរុស្ស៊ី និងវៀតណាមមានត្រឹមតែ ៣,៦ ពាន់លានដុល្លារក្នុងឆ្នាំ ២០២៣ ធៀបនឹង ១៧១ពាន់លានដុល្លារជាមួយចិន និង ១១១ ពាន់លានដុល្លារជាមួយអាមេរិក។

រុស្ស៊ីមានចំណែក ៨០% នៃការនាំចេញសព្វាវុធរបស់វៀតណាមចាប់តាំងពីដើមទសវត្សរ៍ឆ្នាំ ២០០០ ប៉ុន្តែវាបានធ្លាក់ចុះក្នុងរយៈពេលប៉ុន្មានឆ្នាំមកនេះ ដោយសារតែវៀតណាមព្យាយាមធ្វើពិពិធកម្មការផ្គត់ផ្គង់របស់ខ្លួន៕

អត្ថបទ៖ ប៊ុន សុភាព