របាយការណ៍បឋម៖ រថយន្តដឹកគ្រឿង​ចក្រ​លើសទម្ងន់បណ្តាលឱ្យបាក់ស្ពានដែក

រថយន្តដឹកគ្រឿងចក្រឆ្លងស្ពាន សង្ស័យលើសទម្ងន់ដែលស្ពានមិនអាចទ្របាន បណ្ដាលឱ្យបាក់ស្ពានដែក ចំនួន០១ខ្សែ ប្រវែង៧០ម៉ែត្រ ។ ហេតុការណ៍នេះ បានកើតឡើងកាលពីវេលាម៉ោងជាង ១១ ព្រឹក នាថ្ងៃទី២៥ ខែមករា ឆ្នាំ២០២៥ នៅលើផ្លូវបេតុង ស្ថិតក្នុងភូមិព្រែកអំបិល ឃុំព្រែកអំបិល ស្រុកស្អាង ខេត្តកណ្តាល។

បើតាមសាក្សីនៅកន្លែងកើតហេតុ បានឱ្យដឹងថា  គេឃើញមានរថយន្តមួយគ្រឿង ពាក់ស្លាកលេខភ្នំពេញ 3A-3138 បើកឆ្ពោះទៅកាន់ស្ពាននោះ លុះមកដល់ចំណុចកណ្តាលស្ពានដែក ស្រាប់តែបាក់ស្រុតចុះមកក្រោមភ្លាមៗតែម្តង ។

យ៉ាងណាមិញ ហេតុការណ៍បាក់ស្ពាននេះ មិនបង្កឱ្យមនុស្សរងរបួសនោះឡើយ ។ ប្រភពដដែលបានលើកឡើងថា ដោយសារតែស្ពានដែកដែលឆ្លងនេះ គឺមានសភាពចាស់ ហើយមានរថយន្តធន់ធ្ងន់បែបនេះឆ្លងទើបបណ្តាលឱ្យបាក់ ។ ប្រភពពីពលរដ្ឋបានលើកឡើងថា ប្រសិនជាត្រឹមឡានអ្នកដំណើរធម្មតា ឬត្រឹមជិះម៉ូតូ ក៏មិនមានករណីបាក់ស្ពាននេះកើតឡើងដែរ ។

បើតាមការសន្និដ្ឋានបឋម ពីសមត្ថកិច្ចបានបញ្ជាក់ថា ដោយសារអ្នកបើករថយន្តបង្ក ដឹកគ្រឿងចក្រ មានទម្ងន់ធ្ងន់ពេក ទើបបណ្ដាលឱ្យបាក់ស្ពានដែកដែលមានប្រវែង ៧០ម៉ែត្រនេះតែម្តង ។

ក្រោយពេលកើតហេតុ សមត្ថកិច្ចជំនាញបានចុះទៅពិនិត្យ និងវាស់វែងកន្លែងកើតហេតុ និងយករថយន្តដឹកគ្រឿងចក្រមករក្សាទុកនៅអធិការដ្ឋាននគរបាលស្រុកស្អាង ដើម្បីកសាងសំណុំរឿងទៅតាមនីតិវិធីច្បាប់ ៕

ដោយ ៖ម៉េង