ស្ថានទូតអូស្ត្រាលី ប្រកាសផ្តល់អាហារូបករណ៍ Australia Award 2026 សម្រាប់ការសិក្សាក្រោយឧត្តមសិក្សា នៅប្រទេសអូស្ត្រាលី

ស្ថានទូតអូស្ត្រាលីប្រចាំកម្ពុជា នៅថ្ងៃទី១ ខែកុម្ភៈ ឆ្នាំ២០២៥ បានប្រកាសពីការដាក់ពាក្យអាហារូបករណ៍អូស្ត្រាលី Australia Awards Cambodia ឆ្នាំ២០២៦ សម្រាប់ការសិក្សាក្រោយឧត្តមសិក្សាក្នុងសាកលវិទ្យាល័យឈានមុខគេក្នុងប្រទេសអូស្ត្រាលី ដើម្បីទទួលបានបទពិសោធន៍ថ្មី ចំណេះដឹងល្អៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការផ្សាយរបស់ទំព័រហ្វេសប៊ុករបស់ស្ថានទូតអូស្ត្រាលីប្រចាំកម្ពុជា​ បានឱ្យដឹងថា អាហារូបករណ៍ Australia Award ផ្តល់ជូននិស្សិតកម្ពុជា លើការសិក្សាគ្រប់មុខវិជ្ជាទាំងអស់ លើកលែងតែវគ្គសិក្សាពាក់ព័ន្ធនឹងអាជីវកម្ម។ បន្ថែមពីនេះ លោក Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា បាននិយាយថា អាហារូបករណ៍នេះ លើកទឹកចិត្តឱ្យដាក់ពាក្យចំពោះស្ត្រី ជនដែលមានពិការភាព អ្នករស់នៅតាមបណ្តាខេត្ត ឬជនជាតិដើមភាគតិច និងសហគមន៍ LGBTQIA+ ទាំងអស់។ លោកបន្តថា រហូតមកដល់ពេលនេះ មាននិសិ្សតកម្ពុជា ជាង១០០០នាក់ហើយ ដែលទទួលបានអត្ថប្រយោជន៍ពីអាហារូបករណ៍នេះ។

តាមរយៈវីដេអូជិត ២នាទី ដែលស្ថានទូតអូស្ត្រាលីប្រចាំកម្ពុជាបានផ្សាយ លោក Derek Yip បាននិយាយថា៖ “ចាប់តាំងពីឆ្នាំ១៩៩៤មក មានពលរដ្ឋកម្ពុជាជាង១០០០នាក់ហើយដែលបានសិក្សានៅប្រទេសអូស្ត្រាលី ហើយបានប្រែក្លាយខ្លួនជាអ្នកដឹកនាំនៅក្នុងផ្នែកការងាររបស់ខ្លួន តាមរយៈអាហារូបករណ៍ Australia Award នេះ។ នេះជាឱកាសរបស់អ្នកហើយដើម្បីចូលរួមជាមួយពួកគេ”។

ចំពោះនិស្សិត២រូប ដែលធ្លាប់ទទួលបានបទពិសោធន៍ពីអាហារូបករណ៍នេះ និងជាទូតសុឆន្ទៈរបស់អាហារូបករណ៍ Australia Award បានលើកឡើងដូចគ្នាថា អាហារូបករណ៍នេះផ្តល់ប្រយោជន៍ជាច្រើនដល់អ្នកសិក្សា ហើយខ្លួនក៏បានរៀនសូត្រច្រើនពីប្រទេសអូស្ត្រាលីដូចគ្នា ហេតុនេះ ទូតសុឆន្ទៈទាំង២ ក៏លើកទឹកចិត្តដល់និស្សិតខ្មែរដែលមានបំណងទៅសិក្សានៅប្រទេសអូស្ត្រាលី ដាក់ពាក្យសុំអាហារូបករណ៍ឱ្យបានគ្រប់គ្នា។

សូមជម្រាបថា អាហារូបករណ Australia Award នឹងឈប់ទទួលពាក្យនៅថ្ងៃទី៣០ ខែមេសា ឆ្នាំ២០២៥។ ចំពោះព័ត៌មានបន្ថែម អាចតាមដានលើគេហទំព័ររបស់អាហារូបករណ៍ តាមរយៈ (https://www.australiaawardscambodia.org)៕