​​មុនលាចាកលោក តួ សាន់ឆាយ បន្សល់ទុកលុយរាប់លានដុល្លារ សុទ្ធសឹងជាកម្លាំងញើសឈាមខ្លួនឯង

តារាសម្ដែង និងជាតារាចម្រៀងតៃវ៉ាន់ Barbie Hsu ឬទស្សនិកជននិយមហៅថា សាន់ឆាយ បានទទួលមរណភាពក្នុងអាយុ ៤៨ឆ្នាំ កាលពីថ្ងៃទី០២ ខែកុម្ភៈ ឆ្នាំ ២០២៥ ដោយបន្សល់ទុកនូវទ្រព្យសម្បត្តិដ៏ច្រើនសន្ធឹកសន្ធាប់ ដែលបានកសាងឡើងក្នុងអាជីពដ៏យូរអង្វែងរបស់នាងកាលពីវ័យជំទង់។

យោងតាម ​​Sao Star ដោយដកស្រង់ពី ET Today តួស្រី F4 ទទួលបានកិច្ចព្រមព្រៀងគាំទ្រជាច្រើនពេញមួយអាជីព​ ដែលមានទំហំទឹកប្រាក់សរុប ៤.៧៥ លានដុល្លារអាមេរិក។​ នាង​ក៏​បាន​វិនិយោគ​យ៉ាង​ច្រើន​ លើ​អចលន​ទ្រព្យ ដោយ​មាន​ទ្រព្យ​សម្បត្តិ​ប្រណីត​ចំនួន​បី។ ក្នុងនោះ Barbie បានទិញវីឡាចំនួនពីរ មានតម្លៃសរុបចំនួន១៨លានដុល្លារ​ ហើយនៅឆ្នាំ ២០១៦ នាងបានទិញផ្ទះល្វែងទំហំ ៧៦០ ម៉ែត្រការ៉េនៅស្រុក Xinyi ទីក្រុងតៃប៉ិ ជាមួយអតីតស្វាមីរបស់នាងគឺអ្នកជំនួញជនជាតិចិន Wang Xiaofei ក្នុងតម្លៃ ១២ លានដុល្លារ។

ក្រៅពីកម្លាំងញើសឈាមដែលរកបានពីអាជីពសិល្បៈ តួ សាន់ឆាយ ក៏ទទួលបានលុយពីការលែងលះគ្នាជាមួយអតីតស្វាមី នៅឆ្នាំ ២០២១ ដោយគេប៉ាន់ប្រមាណថា តារាតៃវ៉ាន់ទទួលបាន ៦០០ លានដុល្លារតៃវ៉ាន់ (១៩ លានដុល្លារ) ពីទ្រព្យសម្បត្តិសរុបរួមគ្នា ដែលមានតម្លៃ ៩៥០ លានដុល្លារតៃវ៉ាន់ (២៩ លានដុល្លារ) ។ ជាមួយគ្នានោះដែរ អតីតស្វាមីក៏បានទុកនាង និងកូនពីរនាក់ឲ្យស្នាក់នៅផ្ទះវីឡាទំហំ ៧២០ ម៉ែត្រការ៉េ ដើម្បីធានាស្ថិរភាពហិរញ្ញវត្ថុថែមទៀត។

មិនយូរប៉ុន្មាន បន្ទាប់ពីការបែកគ្នា Barbie Hsu បានរៀបការជាមួយស្វាមីទី២គឺ DJ Koo ។ របាយការណ៍បានបង្ហាញថា ទ្រព្យសម្បត្តិសុទ្ធរបស់នា ងគឺខ្ពស់ជាងតន្ត្រីករកូរ៉េខាងត្បូង​ដល់ទៅ៨ដង ដែលបង្កើនកា​ររំពឹងទុកអំពីកិច្ចព្រមព្រៀងមុនពេលរៀបអាពាហ៍ពិពាហ៍ និងការគ្រប់គ្រងទ្រព្យសម្បត្តិរបស់នាងបន្ទាប់ពីនាងស្លាប់។

ថ្វីដ្បិតតែថា​ ជីវិតតារាសម្ដែងបានទទួលក្ដីសុខយ៉ាងច្រើនប្រមាណពីស្នេហាទី២ក្ដី ប៉ុន្តែសារព័ត៌មានទូទាំងពិភពលោកស្រាប់តែចុះផ្សាយអំពីដំណឹងនៃមរណភាពរបស់នាង ដោយសារតែជំងឺរលាកសួត បន្ទាប់ពីកើតជំងឺគ្រុនផ្តាសាយ អំឡុងពេលវិស្សមកាលគ្រួសារក្នុងប្រទេសជប៉ុន នាឱកាសបុណ្យចូលឆ្នាំថ្មី។ ការស្លាប់របស់ Barbie មិនត្រឹមក្រុម​គ្រួសារ​ផ្ទាល់ទេ ដែលសោកស្ដាយ​យ៉ាង​ខ្លាំង​ចំពោះ​មរណភាពនាង​ សូម្បីតែអ្នកគាំទ្រទូទាំងអាស៊ីក៏មានក្ដីតក់ស្លុតនៅដំណឹងមួយនេះយ៉ាងក្រៃលែង។

សូមជម្រាបជូនថា Barbie Hsu ឬ​ សាន់ឆាយ ទទួលបានភាពល្បីល្បាញតាមរយៈតួនាទីរបស់នាង នៅក្នុងរឿងភាគទូរទស្សន៍ដូចជា Meteor Garden, Mars និង Summer’s Desire ។ ជីវិតផ្ទាល់ខ្លួនរបស់នាង រួមទាំងអាពាហ៍ពិពាហ៍ បានទាក់ទាញចំណាប់អារម្មណ៍សាធារណៈ និងប្រព័ន្ធផ្សព្វផ្សាយជាបន្តបន្ទាប់។ នាងបានរៀបការជាមួយអ្នកជំនួញប្រុស Wang Xiaofei  ក្នុងឆ្នាំ ២០១១។ បន្តជីវិតគូជាមួយគ្នាបាន ១០ឆ្នាំ ពោលគឺនៅឆ្នាំ២០២១ ​សាន់ ឆាយ និងស្វាមីបានប្រកាសលែងលះ ខណៈមូលហេតុត្រូវប្រព័ន្ធផ្សព្វផ្សាយជាច្រើនឲ្យដឹងថា ដោយសារភាគីខាងស្វាមីពុំមានភាពស្មោះត្រង់ ហើយពួកគេមានការខ្វែងគំនិតគ្នា​អំពីនយោបាយរវាងចិន និងតៃវ៉ាន់។​ គ្រាន់តែ​បី​ខែ​ក្រោយ​លែងលះ​​ នាង​បាន​រៀបការ​ជាមួយស្វាមីទី២ DJ Koo ដែលជាអតីតគូស្នេហ៍ធ្លាប់នាងស្រលាញ់គ្នាជាង ២០ ឆ្នាំមុន។ អាពាហ៍ពិពាហ៍​ឆ្លង​ដែន​នេះ​ បាន​ទាក់ទាញ​ការ​ចាប់​អារម្មណ៍​យ៉ាង​ទូលំទូលាយ និង​ទទួល​បាន​ពរជ័យ​ជា​ច្រើន​ពី​អ្នក​គាំទ្រ៕

អត្ថបទ៖ សាង ស្រីល័ក្ខ