ព័ត៌មានជាតិ

នគរបាលខណ្ឌសែនសុខ ជំរុញណែនាំមន្ត្រីបម្រើសេវាសាធារណៈជូនពលរដ្ឋ ឱ្យបានលឿនរហ័ស និងតម្លាភាព

បានផុស

១ year មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានណែនាំដល់មន្ត្រីនគរបាល ឱ្យយកចិត្តទុកដាក់ក្នុងការផ្តល់សេវាសាធារណៈ និងជំរុញនគរបាលជំនាញ ផ្តល់អត្តសញ្ញាណប័ណ្ណសញ្ជាតិខ្មែរ សៀវភៅគ្រួសារ សៀវភៅស្នាក់នៅ ឱ្យបានលឿនរហ័ស និងមានតម្លាភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក ហួរ ម៉េងវ៉ាង បានប្រាប់កម្ពុជាថ្មីឱ្យដឹងថា ជារៀងរាល់ម៉ោងធ្វើការ មន្ត្រីនគរបាល នៃអធិការដ្ឋាននគរបាលខណ្ឌសែនសុខ និងតាមបណ្តានគរបាលប៉ុស្តិ៍ទាំង ៦ តែងតែអង្គុយរង់ចាំបន្តផ្តល់សេវាធ្វើអត្តសញ្ញាណប័ណ្ណសញ្ជាតិខ្មែរ ថតថ្មី និងផ្តល់ឡើងវិញសម្រាប់អ្នកផុតសុពលភាព ផ្តល់សៀវភៅស្នាក់នៅថ្មី និងទុតិយតា សៀវភៅស្នាក់នៅ ផ្តល់សៀវភៅគ្រួសារថ្មី និងទុតិយតាសៀវភៅគ្រួសារ ដោយប្រជាពលរដ្ឋអាចទៅសេវាទាំងនេះនៅតាមប៉ុស្តិ៍នគរបាលរដ្ឋបាល ក្នុងមូលដ្ឋានខ្លួនស្នាក់នៅ។

ជាមួយគ្នានោះ លោកអធិការ បានបន្តថា លោកក៏បានប្រជុំណែនាំដល់អធិការរងទទួលការងារ អត្តសញ្ញាណកម្ម នាយ-នាយរងផ្នែក មេប៉ុស្តិ៍ទាំង ៦ ឱ្យយកចិត្តទុកដាក់លើការផ្តល់សេវាសាធារណៈជូនប្រជាពលរដ្ឋប្រកបដោយក្រមសីលធម៌ រួសរាយរាក់ទាក់ លឿនរហ័ស ដើម្បីឱ្យប្រជាពលរដ្ឋគាត់យកអត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ យកទៅប្រើប្រាស់តាមភាពចាំបាច់ផងដែរ។ បន្ថែមពីនេះ លោកក៏បានដាក់គោលការណ៍ណែនាំឱ្យមន្ត្រីនគរបាលប៉ុស្តិ៍ទាំង ៦ ចុះចែកអត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ ទៅតាមខ្នងផ្ទះប្រជាពលរដ្ឋដោយពុំបាច់មកយកផ្ទាល់នៅប៉ុស្តិ៍នោះឡើយ។

លោកអធិការ ក៏បានប្រកាសផ្តល់លេខទូរស័ព្ទ សម្រាប់ព័ត៌មានបន្ថែម ផ្នែកអត្តសញ្ញាណកម្ម និងការគ្រប់គ្រងសៀវភៅស្នាក់នៅប្រជាពលរដ្ឋ សូមទាក់ទង មកកាន់លេខ លោកអធិការ ០១២ ៧៩០ ៣៣៣ លោកអធិការរង ០១៥ ៤២ ៦៧ ៦៧ /០១១ ៤២ ៦៧ ៦៧/ ០១១ ៨៨៨ ២៧៧ /០៩៩ ២២២ ៤០១។ ហើយរាល់ការធ្វើអត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ ពុំមានអស់ថវិកានោះទេ។

ជាចុងក្រោយ ក្នុងនាមលោកជាអធិការខណ្ឌ ក៏ដូចជាមន្ត្រីនគរបាលខណ្ឌសែនសុខទាំងមូល សូមអំពាវនាវដល់ប្រជាពលរដ្ឋមកទទួលសេវាដោយខ្លួនឯង កុំពឹងពាក់តាមរយៈខ្សែបណ្ដាញផ្សេង ព្រោះអាចខាតបង់ថវិកា និងមានការយឺតយ៉ាវផងដែរ៕

អត្ថបទ ៖ សំណាង