ខេមរ: សិរីមន្ត ហ៊ានយកកិត្តិយសដែលខំសាងជាង ២០ឆ្នាំ ការពារតម្លៃសិល្ប:ចម្រៀង

ស្របពេលដែលវិស័យតន្រ្តីចង្វាក់ Rap ឬ Hip Hop ហាក់កំពុងមានការប្រកួតប្រជែងនឹងរង្គោះរង្គើរតាមរយ:ការនិពន្ធច្រៀងរ៉េបមានលក្ខណ:ប្រើពាក្យពេចន៍មិនសមរម្យ ដែលជាគំរូមិនល្អសម្រាប់មហាជននោះ កំពូលតារាចម្រៀងលោក ខេមរ: សិរីមន្ត បានប ញ្ជាក់ថា លោកសុខចិត្តយកកិត្តិយសសាងជាង ២០ឆ្នាំ ការពារតម្លៃសិល្ប:ចម្រៀង។

តារាចម្រៀងងារជាឧកញ៉ា ខេមរ: សិរីមន្ត បានអះអាងជំហររបស់ខ្លួនថាលោកមិនគាំទ្រដាច់ខាត់រាល់ការចេញបទចម្រៀងណា ដែលមានខ្លឹមសារមិនសមរម្យផ្ទុយពីសីលធម៌។ ក្នុងនោះ លោកក៏បានប្រជាប្រិយភាពថ្មីដោយគាំទ្រចំណាត់ការបស់ក្រសួងវប្បធម៌ និងវិចិត្រសិល្ប: កាលពីថ្មីៗកន្លងទៅ។

ឧកញ៉ា ខេមរ: សិរីមន្តបានឱ្យដឹងថា “ខ្ញុំមិនដឹងថាបង ប្អូនគិតចំពោះខ្ញុំបែបណាទេ តែដើម្បីការពារយុវជនទំពាំងស្នងឬស្សីជំនាន់ក្រោយ និងការពារតម្លៃសិល្បៈចម្រៀង ហើយក៏ចូលរួមអប់រំកែប្រែប្អូនៗតារាចម្រៀងជំនាន់ក្រោយផងនោះ ខ្ញុំក៏សុខចិត្តយកកិត្តិយសដែលសាងជាង ២០ឆ្នាំ មកឱ្យបងប្អូនវិភាគ និងវាយតម្លៃតាមចិត្តចុះ ហើយក៏បង្ហាញការគាំទ្រសារជាថ្មីចំពោះចំណាត់ការរបស់ក្រសួងវប្បធម៌ផងដែរ”។

គួរបញ្ជាក់ថា ដោយសង្កេតឃើញមួយរយ:ចុងក្រោយនេះ មានតារាចម្រៀងខ្មែរមួយចំនួនបានធ្វើការតែងនិពន្ធច្រៀងបទចម្រៀង ឬ ស្នាដៃសិល្បៈដែលមានខ្លឹមសារគ្រោតគ្រាត អសុរោះ មិនសមរម្យមានលក្ខណ:ឌឺដងគ្នា ក្រសួងវប្បធម៌ឱ្យបញ្ឈប់ជាបន្ទាន់ និងលុបចោលនូវរាល់ស្នាដៃអវិជ្ជមាន ដែលបង្ហោះផ្សព្វផ្សាយក្នុងបណ្តាញសង្គមនាពេលកន្លងមក៕ អត្ថបទ៖ ចាន់រ៉ា