អង្គរសង្ក្រាន្តឆ្នាំនេះ នឹងរៀបចំទ្រង់ទ្រាយធំជាងឆ្នាំមុនៗ ដើម្បីទាក់ទាញទេសចរជាតិ-អន្តរជាតិ

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានគណៈកម្មការរៀបចំព្រឹត្តិការណ៍អង្គរសង្ក្រាន្ត បានថ្លែងក្នុងសន្និសិទសារព័ត៌មាន នាព្រឹកថ្ងៃទី៩ ខែមីនា ឆ្នាំ២០២៥ ថា ព្រឹត្តិការណ៍អង្គរសង្ក្រាន្ត ឆ្នាំ២០២៥ នៅខេត្តសៀមរាប នឹងមានភាពអស្ចារ្យ សប្បាយរីករាយលើសពីធម្មតា ដោយមានការយាងរបស់ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ដើម្បីបួងសួងចម្រើនសេចក្តីសុខដល់កម្ពុជា ដែលព្រះរាជពិធីនឹងប្រព្រឹត្តទៅនៅថ្ងៃទី១២ ខែមេសា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម ហ៊ុន ម៉ានី បានបញ្ជាក់ថា អស់រយៈពេល១២ឆ្នាំហើយ ដែលប្រារព្ធព្រឹត្តិការណ៍អង្គរសង្ក្រាន្ត នៅខេត្តសៀមរាប ហើយនេះជាលើកទី១ ដែលព្រះមហាក្សត្រនៃកម្ពុជា យាងដោយផ្ទាល់នៅក្នុងកម្មវិធីអង្គរសង្ក្រាន្ត ហើយពលរដ្ឋ ក៏ដូចជាមន្ត្រីរាជការ ពិតជាមានការសប្បាយរីករាយយ៉ាងខ្លាំង ដែលមានឱកាសឃើញព្រះភ័ក្រ្តរបស់ព្រះអង្គ នឹងបានដង្ហែព្រះអង្គយាងមកបួងសួងនៅក្នុងពិធីអង្គរសង្ក្រាន្ត នៅក្នុងរមណីយដ្ឋានអង្គរ។

ឯកឧត្តម ហ៊ុន ម៉ានី បានបន្តថា ព្រឹត្តិការណ៍អង្គរសង្ក្រាន្ត ឆ្នាំនេះ គឺមានប្រធានបទ«ញញឹមសាទរសង្ក្រាន្តឆ្នាំថ្មី» ប្រាកដណាស់ នឹងរៀបចំពិធីនេះឱ្យកាន់តែមានភាពទាក់ទាញថែមទៀត ដោយនឹងនាំយកនូវកម្មវិធីសប្បាយៗផ្សេងៗ ទៅតាមទំនៀមទម្លាប់ប្រពៃណីរបស់ខ្មែរ យកមកបង្ហាញដល់ប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ បានទស្សនាដោយក្តីរីករាយ។

ឯកឧត្តម ហ៊ុន ម៉ានី ក៏បានថ្លែងអំណរគុណដល់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានណែនាំឱ្យ រៀបចំព្រឹត្តិការណ៍អង្គរសង្ក្រាន្ត នៅឆ្នាំ២០២៥ មានទ្រង់ទ្រាយធំជាងឆ្នាំមុនៗទៀត។ ហើយនេះជាលើកទីមួយដោយនៅក្នុងអាណត្តិទី៧ ជាលើកដំបូង ដែលរៀបចំព្រឹត្តិការណ៍អង្គរសង្ក្រាន្តខ្នាតធំ ហើយសម្ដេចធិបតី ក៏អញ្ជើញមកបើកកម្មវិធីអង្គរសង្ក្រាន្តផងដែរ។

ដោយ៖ ជុន កុសល