ព័ត៌មានជាតិ

ស្ពានឆ្លងទន្លេខេត្តក្រចេះនៅសល់ ៣ ប្រឡោះទៀតនឹងតភ្ជាប់គ្នាពេញលេញ

បានផុស

១ year មុន

នៅ

ថ្ងៃអង្គារ ១១ មីនា ២០២៥

ដោយ

តាមរូបភាពដែលក្រុមការងារកម្ពុជាថ្មី បានចុះផ្តិតសកម្មភាពដំណើរការសាងសង់ស្ពានឆ្លងទន្លេនៅខេត្តក្រចេះកំពុងចេញជារូបរាងបណ្តើរៗ ខណៈគម្រោងទាំងមូលសម្រេចបានប្រមាណ ៩០% ហើយតាមផែនការនឹងរួចរាល់ដាក់ឲ្យប្រើប្រាស់បណ្តោះអាសន្ននៅអំឡុងខែកញ្ញាខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រុមការងារកម្ពុជាថ្មីចុះទៅពិនិត្យជាក់ស្តែងកាលពីម្សិលមិញនេះឃើញថា ដំណើរការសាងសង់នៅត្រើយខាងលិចនៅសល់ ៣ ប្រឡោះទៀតនឹងតភ្ជាប់គ្នាពេញលេញ។ ដោយឡែកនៅផ្នែកត្រើយខាងកើតជាប់ផ្លូវជាតិចុះទៅទីរួមខេត្តបញ្ចប់ទាំងស្រុង និងកំពុងឈានទៅរៀបបង្កាន់ដៃស្ពាន និងកណ្តាលតួស្ពានក៏ស្ទើរតែរួចរាល់ ១០០%។

ស្ពានឆ្លងទន្លេខេត្តក្រចេះ គ្រោងបើកឲ្យដំណើរការបណ្ណោះអាសន្ននៅក្នុងអំឡុងខែកញ្ញា ឆ្នាំ២០២៥។ ឃើញសំណង់ស្ពានកំពុងផុសលេចត្រដែតនៅចំពោះមុខនេះ បានផ្តល់ក្តីសង្ឃឹមពីអនាគតដ៏ល្អសម្រាប់ពលរដ្ឋទាំងនៅត្រើយខាងកើតស្ថិតនៅភូមិតាលុស ឃុំបុសលាវ ស្រុកចិត្របុរី និងត្រើយខាងលិចត្រង់ភូមិថ្មរាប ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ ថានឹងជួយកាត់បន្ថយគម្លាតនៃជីវភាពរស់នៅ និងធ្វើឲ្យសេដ្ឋកិច្ចពលរដ្ឋត្រើយទាំងសងខាងនឹងរីកចម្រើនបន្ថែមទៀត។

យោងតាមប្រភពពីមន្ត្រីនៃមន្ទីរសាធារណៈការ និងដឹកជញ្ជូនខេត្តក្រចេះ គិតត្រឹមថ្ងៃទី១០ ខែមិនា ឆ្នាំ២០២៥ គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ សម្រេចលទ្ធផលបាន ៨៧.៨៤%។ បើគ្មានការប្រែប្រួលទេ ស្ពានឆ្លងកាត់ទន្លេមេគង្គខេត្តក្រចេះ អាចនឹងបើកឱ្យប្រជាពលរដ្ឋធ្វើដំណើរឆ្លងកាត់បណ្តោះអាសន្ន នៅអំឡុងខែកញ្ញា ឆ្នាំ២០២៥ ខាងមុខនេះ៕