មួយថ្ងៃសម្លាប់មនុស្សជាង៤០០នាក់ហើយ តែលោក Netanyahu ថា នេះគ្រាន់ជាការចាប់ផ្តើមប៉ុណ្ណោះ

តាមការចុះផ្សាយរបស់ BBC, តួលេខមនុស្សស្លាប់ក្នុងការវាយប្រហារទ្រង់ទ្រាយធំរបស់អ៊ីស្រាអែលលើតំបន់ហ្គាហ្សាជាមួយការអះអាងថា កំណត់គោលដៅលើក្រុមហាម៉ាស បានកើនឡើងដល់ជាង៤០០នាក់ហើយ ខណៈនាយករដ្ឋមន្ត្រីអ៊ីស្រាអែល Benjamin Netanyahu ចេញសារព្រមានតាមវីដេអូថា «ការចរចាមានតែធ្វើឡើងក្រោមភ្លើងទេ! នេះគ្រាន់តែជាការចាប់ផ្តើមប៉ុណ្ណោះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីអង្គារទី១៨ខែមីនាឆ្នាំ២០២៥ លោក Netanyahu បានចេញបញ្ជាឲ្យកងកម្លាំងការពារអ៊ីស្រាអែល (IDF) បើកការវាយប្រហារទ្រង់ទ្រាយធំបំផុតចាប់តាំងពីមានបទឈប់បាញ់ថ្ងៃ១៩ខែមករា ដោយផ្តាច់ជីវិតមនុស្សជាង៤០០នាក់។

មានសេចក្តីរាយការណ៍ថា បុគ្គលជាន់ខ្ពស់ដែលបាត់បង់ជីវិតក្នុងការវាយប្រហារនេះ គឺរួមមានមេសន្តិសុខក្រុមហាម៉ាស និងឥស្សរជននយោបាយមួយចំនួនទៀត ជាពិសេសលោក Mahmoud Abu Wafah ដែលជាឧបនាយករដ្ឋមន្ត្រីក្រសួងមហាផ្ទៃក្នុងតំបន់ហ្គាហ្សា។

ស្របពេលជាមួយគ្នានោះ មន្ទីរពេទ្យក្នុងតំបន់បានព្រមានថា តួលេខមនុស្សស្លាប់អាចកើនឡើងលើសនេះទៀតព្រោះ អ្នករបួសមួយចំនួនកំពុងស្ថិតក្នុងស្ថានភាពធ្ងន់ធ្ងរ។

ការវាយប្រហារអាកាសនោះ បានកំណត់គោលដៅលើតំបន់ Beit Lahia, Rafah, Nuseirat និង Al-Mawasi ដែលសុទ្ធសឹងជាទីតាំងត្រូវបានអ៊ីស្រាអែល ចោទប្រកាន់ថា ជាមូលដ្ឋានរបស់ក្រុមហាម៉ាស។

តាមសេចក្តីថ្លែងការណ៍ពីការិយាល័យលោក Netanyahu, ការវាយប្រហារនេះគឺធ្វើឡើងដោយសារតែក្រុមហាម៉ាស មិនព្រមដោះលែងចំណាប់ខ្មាំងនិងបដិសេធសំណើរបស់សហរដ្ឋអាមេរិក។

ក្រោយមក អ៊ីស្រាអែល ប្រកាសថា ខ្លួននឹងមិនបន្ធូរដៃឡើយ រហូតទាល់តែកម្ចាត់ក្រុមហាម៉ាស ឲ្យបាត់មុខចេញពីពិភពលោកនេះ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល វាយប្រហារទ្រង់ទ្រាយធំលើ ហ្គាហ្សា! ស្លាប់មនុស្ស៣៣០នាក់ ក្នុងនោះមានកុមារ៥០នាក់ និងស្រ្តី២៨នាក់