មនុស្សជាង ៧០ ០០០នាក់ ត្រូវស្លាប់ដោយសារ Benjamin Netanyahu

ហ្គាហ្សា លីបង់ អ៊ីរ៉ង់ សុទ្ធសឹងជាសមរភូមិក្តៅនៃសង្គ្រាមរបស់អ៊ីស្រាអែល។ រាប់ឆ្នាំមកហើយ ដែលមនុស្សមិនតិចនាក់ទេត្រូវបាត់បង់ជីវិត ដោយដៃកងទ័ពអ៊ីស្រាអែល ក្រោមការចេញបញ្ជាពីនាយករដ្ឋមន្ត្រី Benjamin Netanyahu ផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការយោធារបស់អ៊ីស្រាអែលនៅមជ្ឈិមបូព៌ា កាន់តែសាហាវ ជាពិសេសថ្មីៗបំផុតនេះគឺការវាយប្រហារក្នុងប្រទេសលីបង់តែម្តង ដែលផ្តាច់ជីវិតមនុស្សជាង៣០០នាក់ ត្រឹមតែមួយថ្ងៃ។

ក្នុងរបាយការណ៍ដែលចងក្រងដោយសារព័ត៌មានអន្តរជាតិ ដូចជា Al Jazeera, CNN និង Reuters, មានមនុស្សជាង៧០ ០០០នាក់ ដែលត្រូវស្លាប់ដោយសារលោក Netanyahu។ 

នៅប្រទេសលីបង់៖ ការវាយលុកយោធាយ៉ាងខ្លាំងក្លានាពេលថ្មីៗនេះនៅលីបង់ បានបណ្តាលឲ្យមនុស្សយ៉ាងតិច ១ ៨៨៨នាក់ស្លាប់ គិតត្រឹមថ្ងៃទី១០ខែមេសាឆ្នាំ២០២៦។ តួលេខនេះរួមបញ្ចូលទាំងមនុស្សជាង ៣០០ នាក់ដែលត្រូវបានសម្លាប់ក្នុងរយៈពេលតែមួយថ្ងៃ នៃការវាយប្រហារតាមអាកាសកាលពីថ្ងៃទី ៩ ខែមេសាផងដែរ។

នៅអ៊ីរ៉ង់ ដ្បិតថា អ៊ីស្រាអែលនិងអាមេរិក បើកការវាយប្រហាររួមគ្នាក៏ពិតមែន ប៉ុន្តែលោក Netanyahu​ ក៏មានចំណែកក្នុងការស្លាប់មនុស្សចន្លោះពី ២ ០០០ទៅ៥ ០០០នាក់ផងដែរ។

នៅតំបន់ហ្គាហ្សា៖ យោងតាមក្រសួងសុខាភិបាលហ្គាហ្សា ដែលអង្គការសហប្រជាជាតិ និងអ្នកជំនាញឯករាជ្យចាត់ទុកថាជាប្រភពគួរឲ្យទុកចិត្តសម្រាប់ទិន្នន័យជនរងគ្រោះក្នុងសង្រ្គាម បានឲ្យដឹងថា ពលរដ្ឋប៉ាឡេស្ទីនជាង ៦១ ៧០០នាក់ ត្រូវបានសម្លាប់ចាប់តាំងពីថ្ងៃទី ៧ ខែតុលា ឆ្នាំ ២០២៣មក គិតត្រឹមពេលនេះ។ ក្រសួងកត់សម្គាល់ថា ប្រហែលពាក់កណ្តាលនៃអ្នកស្លាប់គឺជាស្ត្រី និងកុមារ។

មិនត្រឹមប៉ុណ្ណឹង ក្នុងអាណត្តិមុនរបស់លោក Netanyahu ចន្លោះឆ្នាំ ២០០៩ ដល់ខែកញ្ញា ឆ្នាំ ២០២០, ក្រុមសិទ្ធិមនុស្សអ៊ីស្រាអែល B’Tselem បានកត់ត្រាការស្លាប់ពលរដ្ឋប៉ាឡេស្ទីនប្រហែល ៣ ៥០០ នាក់ នៅតំបន់ West Bank និង ហ្គាហ្សា។

យ៉ាងណា នេះគ្រាន់តែជាតួលេខដែលមានការចងក្រងប៉ុណ្ណោះ ដ្បិតតួលេខពិតអាចនឹងខ្ពស់ជាងនេះក៏ថាបាន ព្រោះនៅមានប្រតិបត្តិការជាច្រើនទៀត ដែលគេមិនរាប់បញ្ចូល៕

អត្ថបទ៖ សុខ សុវណ្ណ