ប៉ូឡូញ ប្រាប់ពលរដ្ឋ ឲ្យទិញសម្ភារៈស្តុកទុក ត្រៀមខ្លួនសម្រាប់សង្គ្រាមឬវិបត្តិផ្សេងៗ

បន្ទាប់ពីប្រធានគណៈកម្មាធិការអឺរ៉ុបអ្នកស្រី Ursula von der Leyen ដាក់សំណើប្រមូលទឹកប្រាក់ឲ្យ​បាន ៨៧៥ពាន់លានដុល្លារ ដើម្បីជំរុញការពង្រឹងកម្លាំងយោធា ក្នុងគោលបំណងឆ្លើយតបទៅការគំរាមកំហែងពីសំណាក់រុស្ស៊ីនោះ ស្រាប់តែប្រទេសប៉ូឡូញ ជំរុញពលរដ្ឋរបស់ខ្លួនឲ្យទិញសម្ភារៈស្តុកទុកសម្រាប់ការប្រើប្រាស់ឲ្យបានយ៉ាងតិចបីថ្ងៃ ដើម្បីត្រៀមខ្លួនសម្រាប់សង្គ្រាមឬវិបត្តិផ្សេងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃសុក្រទី២១ខែមីនាឆ្នាំ២០២៥, សេចក្តីប្រកាសនេះគឺចេញពីមាត់អនុរដ្ឋមន្ត្រីក្រសួងមហាផ្ទៃ Wieslaw Lesniakiewicz ដោយលោកនិយាយថា «ពលរដ្ឋម្នាក់ៗត្រូវតែអាចរស់រានមានជីវិតយ៉ាងតិចបីថ្ងៃដោយគ្មានជំនួយពីរដ្ឋ ក្នុងករណីមានសង្គ្រាមឬស្ថានភាពធ្ងន់ធ្ងរផ្សេងទៀត។ ពលរដ្ឋត្រូវស្តុកទុករបស់សំខាន់ៗដូចជា ទឹក ថ្នាំសង្កូវ ស្បៀងអាហារ និង Power Bank។ ប្រជាជនក៏គួរតែមានវិទ្យុទាក់ទង សម្រាប់ទំនាក់ទំនងក្នុងគ្រាអាសន្នផងដែរ ហើយក្រសួងទាំងឡាយ នឹងសហការគ្នាដើម្បីបោះពុម្ពសៀវភៅណែនាំស្តីពីការត្រៀមខ្លួនសម្រាប់វិបត្តិ ដោយផ្អែកលើសៀវភៅស្រដៀងគ្នានៅប្រទេសស៊ុយអែត»។

រឿងនេះធ្វើឲ្យគេនឹកឃើញដល់ឆ្នាំមុន ពេលដែលមេទ័ពប៉ូឡូញ Wieslaw Kukula បានប្រកូកប្រកាសឲ្យកងទ័ពនិងជនស៊ីវិលទាំងអស់ ត្រូវត្រៀមលក្ខណៈទប់ទល់ជាមួយនឹងការគំរាមកាន់តែខ្លាំងពីសំណាក់ប្រទេសរុស្ស៊ី ឬអាចឈានដល់ការផ្ទុះសង្គ្រាមទៀតផង។

លោកនិយាយថា ទីក្រុងវ៉ាសូវី ត្រូវតែត្រៀមខ្លួនការពារជាតិ ជាមួយនឹងសមត្ថភាពយោធាដ៏អស្ចារ្យ និងសង្គមមួយដែលរឹងមាំ ព្រោះកាលណាប្រទេសមួយខ្លាំង សត្រូវមិនអាចបង្កហានិភ័យបានឡើយ។ យើងមិនអាចមើលស្រាលលទ្ធភាពនៃការកើតសង្គ្រាមបានទេ។ យើងត្រូវតែត្រៀមខ្លួនធ្វើសង្គ្រាមជានិច្ច។

ស្របពេលជាមួយគ្នានោះ មេទ័ពរូបនេះព្រមានថា ចាប់តាំងពីចុងឆ្នាំ២០២១មក ចេតនារបស់ទីក្រុងមូស្គូមិនដែលផ្លាស់ប្តូរឡើយ ហើយលោកប្រធានាធិបតីរុស្ស៊ី Vladimir Putin និងរដ្ឋមន្ត្រីការបរទេស Sergey Lavrov តែងបង្ហាញចេតនានេះច្បាស់ៗ។ លោក​​អះអាង​ថា រុស្ស៊ី​អាច​កេងចំណេញសេណារីយ៉ូ​ដែល​អង្គការ​ណាតូកំពុងបែកបាក់គ្នាឬការជាប់ដៃរបស់​អាមេរិក​ក្នុង​ជម្លោះ​ប៉ាស៊ីហ្វិក ​ដើម្បី​បង្កើនសកម្មភាព​យោធារបស់ខ្លួន៕

អត្ថបទ៖ សុខ សុវណ្ណ

ចុចអាន៖ ប៉ូឡូញចង់ឲ្យអាមេរិក ដាក់នុយក្លេអ៊ែរលើដីខ្លួន ទុកបន្លាច ពូទីន