ព័ត៌មានជាតិ

កម្មវិធី«បណ្ដុះបណ្ដាលជំនាញវិជ្ជាជីវៈដូនតា» ឥតបង់ថ្លៃ នឹងចាប់ផ្តើមនៅខែក្រោយ ក្នុងខេត្តចំនួន ៧

បានផុស

១ year មុន

នៅ

ថ្ងៃសុក្រ ៤ មេសា ២០២៥

ដោយ

នៅថ្ងៃទី ៤ ខែមេសា ឆ្នាំ ២០២៥ នេះ ក្រសួងវប្បធម៌ និងវិចិត្រសិល្បៈ បានឲ្យដឹងថា ក្រសួង នឹងរៀបចំកម្មវិធី
«បណ្ដុះបណ្ដាលជំនាញវិជ្ជាជីវៈដូនតា» ដោយមិនបង់ថ្លៃ សម្រាប់ឆ្នាំ ២០២៥ ចាប់ពីខែឧសភា នេះតទៅ នៅទីតាំងចំនួន ១៦ ក្នុងខេត្តចំនួន ៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម ក្រសួងវប្បធម៌ និងវិចិត្រសិល្បៈ ជំនាញវិជ្ជាជីវៈដូនតា ដែលនឹងត្រូវបណ្ដុះបណ្ដាលនោះរួមមាន ៖ តម្បាញសូត្រ និងអំបោះ , តម្បាញក្រមា ពណ៌ត្រុំ , ប៉ាក់ឌិន , ចម្លាក់ប្រាក់/ស្ពាន់ , ចម្លាក់ស្បែក , ចម្លាក់ថ្ម , ខ្មុកស្មាច់ , ខ្មុកម្រក្ស័ណ៍ , ធ្វើសាជី , តម្បាញកន្ទេល ផ្កា, ស្មូនឆ្នាំង , ផលិតឧបករណ៍ភ្លេង , ចម្លាក់ពុម្ព , កុលាលភាជន៍ និងគំនូរបុរាណ។

ដោយឡែកសម្រាប់ខេត្តដែលត្រូវបណ្ដុះបណ្ដាលជំនាញវិជ្ជាជីវៈដូនតាចំនួន ៧ នោះ រួមមាន ៖ កំពង់ស្ពឺ , កំពង់ឆ្នាំង , កំពង់ធំ , សៀមរាប , កណ្ដាល , កំពង់ចាម និង តាកែវ។

ចំពោះសិស្សមកពីគ្រួសារក្រីក្រដែលមានបណ្ណសមធម៌ និងគ្រួសារងាយរងហានិភ័យមានបណ្ណសម្គាល់គ្រួសារងាយរងហានិភ័យ រាជរដ្ឋាភិបាល នឹងឧបត្ថម្ភប្រាក់ចំនួន ២៨០,០០០ (ម្ភៃប្រាំបីម៉ឺន) រៀល ក្នុង ១ ខែ តែត្រូវបំពេញលក្ខខណ្ឌសិក្សាឲ្យបានត្រឹមត្រូវ។

ជាមួយនេះ ក្រសួងវប្បធម៌ និងវិចិត្រសិល្បៈ ក៏បានអំពាវនាវដល់សាធារណជន ពិសេសយុវជនដែលមានបំណងចង់សិក្សាជំនាញខាងលើ សូមទាក់ទងមកលេខាធិការដ្ឋានបណ្ដុះបណ្ដាលជំនាញវិជ្ជាជីវៈដូនតា ពីថ្ងៃចន្ទ ដល់ ថ្ងៃសុក្រ រៀងរាល់ម៉ោងធ្វើការ តាមរយៈលេខទូរសព្ទ ៖ ០១៧ ៤៣១ ៣០២/០៨៨ ៨៨៣ ៥៦៣៦ ឬTelegram: ០១៧ ៤៣ ១៣ ០២ ឬ អ៊ីម៉ែល: [email protected] និង Facebook ៖ កម្មវិធីបណ្ដុះបណ្ដាលជំនាញវិជ្ជាជីវៈដូនតា៕

អត្ថបទ ៖ ពិសី